ខេត្តក្រចេះ ៖ សេចក្តីរាយការណ៍បឋម បុរសម្នាក់ក្នុងចំណោមគ្នីគ្នា២នាក់ ដែលបាននាំគ្នាដើរកាត់ព្រៃបម្រុងទៅឆក់ត្រីនៅទឹកអូរត្រូវបានឆក់ប្រកាច់ស្លាប់ នៅពេលដើរទៅជាន់ និងខ្សែភ្លើងដែលមានជនមិន ស្គាល់បានរាយនៅក្នុងព្រៃ ក្នុងគោលបំណងសម្រាប់ឆក់យកសត្វព្រៃ ។
សេចក្តីរាយការណ៍បានបន្តថា ជនរងគ្រោះឈ្មោះ ស៊ាង សាវី អាយុ៤០ឆ្នាំ មានទីលំនៅភូមិកំពង់ដរ ឃុំជ្រោយបន្ទាយ ស្រុកព្រែកប្រសព្វ ជាកម្មករ នៅក្នុងក្រុមហ៊ុនគ្រីនអាយលែន ភូមិស្រែស្បូវ ឃុំក្បាលដំរី ស្រុកសំបូរ ។
នគរបាលមូលដ្ឋានបានឲ្យដឹងថា កាលពីយប់ថ្ងៃទី១០ ខែសីហា បុរសរងគ្រោះជាកម្មករ ក្រុមហ៊ុនម្នាក់នេះ និងគ្នីគ្នាម្នាក់ទៀតបានដើរស្ពាយឧបករណ៍ឆក់ត្រីដើរកាត់ព្រៃ ក្នុងគោល បំណងទៅឆក់ត្រី ក្នុងទឹកអូរ នៅតាមក្រុមហ៊ុន ។ នៅពេលកំពុងដើរជនរងគ្រោះ ក៏ជាន់ឧបករណ៍ឆក់សត្វដែលមានជនមិនស្គាល់មុខដាក់ពង្រាយខ្សែភ្លើងក្នុងព្រៃបណ្តាលឲ្យឆក់ប្រកាច់ស្លាប់ភ្លាមៗមិនអាចសង្គ្រោះបាន ។
នគរបាលបញ្ជាក់ថា ជនរងគ្រោះពិតជាស្លាប់ដោយសារឆក់ និងខ្សែភ្លើង ។ ដោយករណីនេះមិនពាក់ព័ន្ធ និងករណីផ្សេងឡើយ ។ ការស្លាប់មនុស្សដោយសារជួបឧប្បត្តិហេតុឆក់ខ្សែភ្លើងពីការដាក់ពង្រាយសម្រាប់ឆក់ សត្វក្នុងព្រៃ គឺតែងតែកើតមានឡើងជាបន្តបន្ទាប់នៅតាមព្រៃនានាក្នុងស្រុកសំបូរ ។ ខណៈតំបន់ព្រៃទាំងនោះសព្វថ្ងៃគេដឹងថា នៅមានសេសសល់សត្វព្រៃដូចជា សត្វជ្រូកព្រៃ សត្វឈ្លូស ហើយការរាយអន្ទាក់សម្រាប់ចាប់យកក៏ដូចជា ពង្រាយខ្សែភ្លើងសម្រាប់ឆក់យក ពីក្រុមជនល្មើសនៅតែមានការលួចដាក់ពង្រាយជាហេតុ តែងតែធ្វើឲ្យមានការឆក់ដល់មនុស្ស ដែលដើរចូលទៅក្នុងព្រៃដោយមិនបានប្រុងប្រយ័ត្ន ៕ កែសម្រួលដោយ ៖ សុឃាក់
ចែករំលែកព័តមាននេះ