រាជធានីភ្នំពេញ ៖ ថវិការជាង៤ម៉ឺនដុល្លារបានមកពីពិធីចេញម្លប់របស់កូនលោកឧកញ៉ាម្នាក់បានប្រគល់ជូនមន្ទីពេទ្យគន្ធបុប្ផាសម្រាប់ព្យាបាលកុមារកម្ពុជា ។ យោងតាមប្រកាសព័ត៌មានរបស់មូលនិធិគន្ធបុប្ផាកម្ពុជាបានឲ្យដឹងកាលពេលថ្មីៗនេះដោយទទួលបានចំណងដៃជាងបួនម៉ឺនដុល្លារបានប្រគល់ជូនមន្ទីពេទ្យគន្ធបុប្ផា ដើម្បីកុមារកម្ពុជា ។
ប្រភពបានបន្តថា កាលពីថ្ងៃទី១០ ខែសីហានេះ លោកឧកញ៉ា និងលោកជំទាវ បានបរិច្ចាគថវិកាចំនួន ៤១ ៨៩០ (សែសិបមួយពាន់ ប្រាំបីរយកៅសិប) ដុល្លារអាមេរិក និង ១ ០០០ (មួយពាន់) ដុល្លារអូស្ត្រាលី ព្រមទាំង ២៨០ ០០០ (ពីរយប៉ែតសិបពាន់) រៀល ជូនមូលនិធិគន្ធបុប្ផាកម្ពុជា ដែលជាមូលនិធិផ្លូវការបង្កើតឡើងដោយរាជរដ្ឋាភិបាលកម្ពុជា ដើម្បីកុមារគ្រប់រូបនៅកកម្ពុជា ។ ថវិការទាំងនេះបានមកពីពិធីចេញម្លប់របស់កូនស្រីលោកឧញ៉ា និងលោកជំទាវ ។
សូមជម្រាបជូនថា ថវិកាបរិច្ចាគនេះបានមកពីចំណងដៃក្នុងថ្ងៃចេញម្លប់គ្រប់១៥ឆ្នាំ កូនរបស់គាត់ ដែលត្រូវជាកូនស្រីច្បងរបស់លោកលោកឧកញ៉ា និងលោកជំទាវ ធ្វើឡើងកាលពីថ្ងៃទី០៦ ខែសីហា ឆ្នាំ២០១៩កន្លងទៅនេះ ។ ជាមួយគ្នានោះដែរ មូលនិធិគន្ធបុប្ផាកម្ពុជា សូមថ្លែងអំណរគុណយ៉ាងជ្រាលជ្រៅចំពោះកាយវិការសប្បុរសធម៌ដែលគួរឱ្យសរសើរ និងយកជាគំរូក្នុងការផ្ដួចផ្ដើមយកចំណងដៃទាំងអស់ដែលទទួលបានពីភ្ញៀវកិត្តិយសក្នុងថ្ងៃខួបកំណើតមកបរិច្ចាគជូនមូលនិធិគន្ធបុប្ផាកម្ពុជា ដើម្បីរួមគ្នានាំភាពញញឹមដល់កុមារដែលជាអនាគតដ៏ភ្លឺស្វាងរបស់កម្ពុជា ៕ កែសម្រួលដោយ ៖ សុឃាក់
ចែករំលែកព័តមាននេះ