រាជធានីភ្នំពេញ ៖ អ៊ុល សំអាង ឡើងតំណែងជាឯកឧត្តមក្នុងចំណោមទីប្រឹក្សាក្រសួងព័ត៍មាន១០៦រូបដែលទើបតែងតាំងថ្មី ដោយលោកត្រូវបានគេស្គាល់ថា ជាតួឯកល្ខោន និងជាថៅកែវង់ល្ខោនបាសាក់ ក៏មានឈ្មោះនៅក្នុងបញ្ជីនោះផងដែរ ។…
រាជធានីភ្នំពេញ ៖ អ៊ុល សំអាង ឡើងតំណែងជាឯកឧត្តមក្នុងចំណោមទីប្រឹក្សាក្រសួងព័ត៍មាន១០៦រូបដែលទើបតែងតាំងថ្មី ដោយលោកត្រូវបានគេស្គាល់ថា ជាតួឯកល្ខោន និងជាថៅកែវង់ល្ខោនបាសាក់ ក៏មានឈ្មោះនៅក្នុងបញ្ជីនោះផងដែរ ។ លោកត្រូវបានព្រះមហាក្សត្រត្រាស់បង្គាប់ជាទីប្រឹក្សាក្រសួងព័ត៍មាន មានឋានៈស្មើនឹងអគ្គនាយកដែលមានគោរមងារជាឯកឧត្តម ។
ព្រះរាជក្រឹត្យ នស/រកត/០៧១៩/១១៦២ ដែលបានត្រាស់បង្គាប់ដោយព្រះមហាក្សត្រ បានសម្រេចទទួលស្គាល់លោក អ៊ុល សំអាង ជាអ្នកសិល្បៈផ្នែកល្ខោនបាសាក់ឲ្យក្លាយជាទីប្រឹក្សាផ្លូវការ ខណៈដែលតួនាទីជាឯកឧត្តមរបស់លោកក៏ជាតំណែងមិនធ្លាប់មានសម្រាប់អ្នកជំនាញផ្នែកល្ខោនបាសាក់បែបនេះផងដែរ ។
តួនាទីរបស់លោកត្រូវគេមើលឃើញថា ជាការលើកទឹកចិត្តចំពោះអ្នកសិល្បៈល្ខោនបាសាក់ដែលត្រូវបានគេមើលរំលង និងជាការជំរុញឲ្យសិល្បៈមួយនេះមានសំឡេងឡើងវិញក្នុងកិច្ចការធំៗរបស់ក្រសួងព័ត៍មាន ។
លោក អ៊ុល សំអាង បានថ្លែងបញ្ជាក់ថា លោកពិតជាមានអារម្មណ៍រំភើបចិត្តយ៉ាងខ្លាំងដែលលោកត្រូវបានព្រះមហាក្សត្រសម្រេចតែងតាំងជាទីប្រឹក្សាក្រសួងព័ត៍មាន ដើម្បីឲ្យលោកបានរួមចំណែកក្នុហកិច្ចការសង្គម និងជួយដល់កិច្ចការរបស់ក្រសួងព័ត៍មាន ។
លោកថាខ្លួនបានបម្រើវិស័យសិល្បៈក្នុងជំនាញល្ខោនបាសាក់ និងចម្រៀងជាយូរមកហើយ ប៉ុន្តែមិនបានដឹងថាខ្លួនមានកិត្តិយសដូចអ្វីដែលមហាជនទើបបានដឹងឮនោះឡើយ ។ ជាមួយនឹងតំណែងជាឯកឧត្តមនេះលោកថាសប្បាយចិត្ត ហើយក៏កាន់តែមានកម្លាំងចិត្តផងដែរ បើទោះជាពេលកន្លងមកអាជីពល្ខោនបាសាក់ និងការតស៊ូបើកវង់ល្ខោន ធ្វើឲ្យលោករារែកម្ដងៗព្រោះតែការគាំទ្រធ្លាក់ចុះក្ដី ។ លោកប្រកាសថាខ្លួននឹងបន្តបំផុសឲ្យមានការយកចិត្តទុកដាក់លើល្ខោនបាសាក់ឡើងវិញដើម្បីអភិរក្សសិល្បៈរបស់ខ្មែរមួយនេះកុំឲ្យបាត់បង់ ៕
កែសម្រួលដោយ ៖ សំណាង
ចែករំលែកព័តមាននេះ