ខេត្តសៀមរាប ៖ បើតាមសម្តីរបស់សមត្ថកិច្ចបានប្រាប់នៅល្ងាចថ្ងៃទី៩ ខែសីហា ឆ្នាំ២០១៩ ថាជនរងគ្រោះទាំង២នាក់ដែលបានស្លាប់ក្នុងហេតុការណ៍គ្រោះថ្នាក់ចរាចណ៍នៅព្រឹកថ្ងៃទី៩ សីហា នោះស្គាល់អត្តសញ្ញាណហើយ ក្នុងចំណោមជនរងគ្រោះទាំង៥នាក់ដែល៣នាក់បានស្លាប់ និងព្រះសង្ឃ២អង្គរងរបួសធ្ងន់នៅផ្លូវទៅស្រះស្រង់ ក្នុងតំបន់រមណីដ្ឋានអង្គរ ស្ថិតនៅចំណុចខាងកើតកន្លែងឆែកសំបុត្រផ្លូវទៅស្រះស្រង់ ស្ថិតក្នុងភូមិក្រវ៉ាន់ សង្កាត់នគរធំ ក្រុងសៀមរាប ខេត្តសៀមរាប ។
តាមប្រភពពីសមត្ថកិច្ចមូលដ្ឋានបានប្រាប់ទៀតថា ជនរងគ្រោះទាំង២នាក់ដែលស្លាប់ត្រូវបានសមត្ថកិច្ចស្រាវជ្រាវរកឃើញហើយនោះមានទី១-ឈ្មោះ ហ៊ាន ប៉េង លីហូវ ភេទប្រុស អាយុ១៦ឆ្នាំ (ស្លាប់) រស់នៅភូមិធ្លកអណ្ដូង សង្កាត់ស្លក្រាម ក្រុងសៀមរាប ជាអ្នកបើកបរម៉ូតូម៉ាក Zoomer-X ពណ៌ខ្មៅលាយស ពាក់ផ្លាកលេខ សៀមរាប 1Z-7242 បើកបរទិសដៅពីលិចទៅកើត ។ ទី២-ឈ្មោះ ហ៊ុយ លីតាវហ៊ួ ភេទប្រុស អាយុ១៦ឆ្នាំ រស់នៅស្រុកពួក ខេត្តសៀមរាប ។
ចំណែកភាគីដឹកលោកសង្ឃ២អង្គទៅបិណ្ឌបាតនៅក្នុងក្រុងសៀមរាបនោះមានឈ្មោះ នី យ៉ែង ភេទប្រុស អាយុ២២ឆ្នាំ រស់នៅភូមិជ្រៃ ឃុំសន្លុង ស្រុកទ្រាំង ខេត្តតាកែវ (ស្លាប់) បើកបរទិសដៅពីកើតទៅលិច បើកបរម៉ូតូម៉ាកសង់សេ១២៥ ពណ៌ខ្មៅ ស៊េរីឆ្នាំ២០១៤ ពាក់ផ្លាកលេខ ភ្នំពេញ 1CE-7784 ដោយដឹកព្រះសង្ឃ២អង្គព្រះនាមទី១-ភិក្ខុ ហ៊ន យុក ព្រះជន្ម២២វស្សា មានស្រុកកំណើត នៅខេត្តតាកែវ(របួសធ្ងន់) កំពុងសម្រាកនៅក្នុងមន្ទីរពេទ្យឯកជនយីហោ ស៊ឹង រិទ្ធីរ៉េត ក្នុងក្រុងសៀមរាប និងទី២-សាមណេ ម៉េង ចិន្ដា ព្រះជន្ម១៥វស្សា មានស្រុកកំណើតនៅខេត្តកំពង់ធំ (របួសធ្ងន់) ត្រូវបានញាតិញោមដឹកតាមរថយន្តសង្គ្រោះបន្ទាន់យកទៅសង្គ្រោះនៅខេត្តបាត់ដំបង ។
ប្រភពបានបញ្ជាក់ថា នៅល្ងាចថ្ងៃទី៩ ខែសីហា ឆ្នាំ២០១៩ ព្រះសង្ឃទាំង២អង្គនោះមានមួយអង្គបញ្ជូនបន្តទៅសង្គ្រោះនៅខេត្តបាត់ដំបង និងមួយអង្គទៀត កំពុងរៀបចំបញ្ជូនទៅរាជធានីភ្នំពេញវិញ ។ នេះបើតាមមន្ត្រីជំនាញបានបញ្ជាក់បន្ថែមនៅល្ងាចថ្ងៃកើតហេតុ ។
ចំពោះមូលហេតុដោយសារការបង្កឡើងរវាងម៉ូតូ និងម៉ូតូបើកបញ្ច្រាសទិសគ្នា ខណៈឡើងវ៉ារថយន្តទាំងសងខាងទើបទាញចង្កូតយកមកវិញមិនទាន់ក៏បុកគ្នាពេញទំហឹងបណ្តាលឱ្យស្លាប់ទាំងសងខាងបែបនេះ។
សូមបញ្ជាក់ថា ព្រះសង្ឃទាំងពីរអង្គនោះបច្ចុប្បន្នគង់នៅវត្ត កេកន្យារាម ហៅវត្តបន្ទាយក្តី ស្ថិតក្នុងភូមិស្រង់ត្បូង សង្កាត់នគរធំ ក្រុងសៀមរាប ខេត្តសៀមរាប ។ បច្ចុប្បន្នម៉ូតូទាំងសងខាងត្រូវបានកម្លាំងជំនាញយកទៅរក្សាទុកនៅស្នងការដើម្បីទុកដោះស្រាយទៅតាមផ្លូវច្បាប់ ៕
កែសម្រួលដោយ ៖ សំណាង
ចែករំលែកព័តមាននេះ