រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិជំរឿនទូទៅប្រជាជនកម្ពុជា បានថ្លែងថា តួលេខបណ្តោះអាសន្នក្នុងឆ្នាំ២០១៩នេះ…
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិជំរឿនទូទៅប្រជាជនកម្ពុជា បានថ្លែងថា តួលេខបណ្តោះអាសន្នក្នុងឆ្នាំ២០១៩នេះ គឺមានប្រជាជនជាង១៥លាននាក់នៅទូទាំងប្រទេស ហើយក្នុងនោះស្ត្រីមានច្រើនជាងបុរសរហូតដល់ជាង៤ម៉ឺននាក់។
សម្តេចក្រឡាហោមស ខេង បានថ្លែងបែបនេះនៅក្នុងពិធីប្រកាសតួលេខបណ្តោះអាសន្ននៃជំរឿនទូទៅប្រជាជននៅព្រះរាជាណាចក្រកម្ពុជាឆ្នាំ២០១៩ កាលព្រឹកថ្ងៃទី៧ ខែសីហា ឆ្នាំ២០១៩នេះ នៅសណ្ឋាគារភ្នំពេញ ។
សម្តេចក្រឡាហោម បានថ្លែងទៀតថា តាមតួលេខបណ្តោះអាសន្នក្នុងទូទាំងប្រទេសកម្ពុជា គិតត្រឹមថ្ងៃទី៣ ខែមីនា ឆ្នាំ២០១៩ ប្រជាជនសរុបតាមវិធីសាស្ត្រឃើញរាប់ (de-facto) មានចំនួន១៥.២៨៨.៤៨៩នាក់ ក្នុងនោះប្រុស៧,៤១៨.៥៧៧នាក់ និងស្រី៧.៨៦៩.៩១២នាក់។ តាមតួលេខបណ្តោះអាសន្ននេះ ពិនិត្យឃើញថា ចំនួនប្រជាជនកម្រិតថ្នាក់ជាតិមាននិន្នាការកើនឡើងយឺត ដោយសារអត្រាផ្តល់កំណើត និងអត្រាកំណើនប្រជាជនបានថយចុះ ស្របតាមការព្យាករណ៍ដែលបានរំពឹងទុក។
អត្រាកំណើនប្រជាជនប្រចាំឆ្នាំបានថយចុះពី ១,៥ភាគរយ ក្នុងចន្លោះឆ្នាំ១៩៩៨ និង២០០៨មក ១,២ភាគរយ ក្នុងចន្លោះឆ្នាំ២០០៨ និង២០១៩ ហើយអត្រាកំណើនប្រចាំឆ្នាំរបស់កម្ពុជាក្នុងទសវត្សចុងក្រោយនេះពិនិត្យឃើញថា ខ្ពស់ជាងអត្រាកំណើនមធ្យមនៅអាស៊ីអាគ្នេយ៍ដែលមានតែ ១,០ភាគរយ។
រាជធានី-ខេត្ត ដែលមានចំនួនប្រជាជនច្រើនជាងគេបំផុត គឺភ្នំពេញមាន ២,១២៩,៣៧១នាក់ ហើយខេត្តកែប មានប្រជាជនតិចជាងគេបំផុត ៤១,៧៩៨នាក់ ប៉ុណ្ណោះ។ ដង់ស៊ីតេប្រជាជនស្មើនឹង៨៦នាក់ ក្នុងផ្ទៃដីមួយគីឡូម៉ែត្រការ៉េ នៅឆ្នាំ២០១៩។ អត្រាភេទតាមតួលេខបណ្តោះអាសន្ន នៃជំរឿនប្រជាជន ឆ្នាំ២០១៩ មានបុរស ៩៤នាក់ ក្នុងចំណោមស្ត្រី ១០០នាក់ ដោយមិនមានការប្រែប្រួលបើប្រៀបធៀបនឹងឆ្នាំ២០០៨។
យ៉ាងណាក៏ដោយ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងថា ការជំរឿនក្នុងឆ្នាំ២០១៩នៅកម្ពុជានេះ នឹងផ្តល់ទិន្នន័យច្បាស់លាស់អំពីទំហំប្រជាជន និងចរិកលក្ខណៈប្រជាជន បន្ទាប់ពីជំរឿនប្រជាជនឆ្នាំ២០០៨។ ទិន្នន័យទាំងអស់នេះ គឺមានសារសំខាន់ណាស់សម្រាប់រាជរដ្ឋាភិបាលកម្ពុជា ដៃគូអភិវឌ្ឍន៍ និងអ្នកប្រើប្រាស់ទាំងឡាយធ្វើសេចក្តីសម្រេចប្រកបដោយប្រសិទ្ធភាពក្នុងការកសាងផែនការឆ្ពោះទៅរកការអភិវឌ្ឍន៍ជាតិប្រកបដោយចីរភាព។
សម្តេចក្រឡាហោម ស ខេង ក៏បានបញ្ជាក់ថា គោលនយោបាយជាតិប្រជាជន គឺជាលទ្ធផលសំខាន់មួយដែលទទួលបានពីការធ្វើជំរឿនប្រជាជនឆ្នាំ២០១៩ផងដែរ ហើយការធ្វើចំណាលប្រជាជនដោយផ្អែកលើទិន្នន័យជំរឿនក៏ត្រូវបានប្រើប្រាស់យ៉ាងទូលំទូលាយដោយរាជរដ្ឋាភិបាល ក្រសួងផែនការ និងបណ្តាក្រសួងផ្សេងៗជាដើម។
នៅក្នុងឱកាសនោះដែរ លោក ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានថែ្លងក្នុងកម្មវិធីខាងលើនេះថា ការធ្វើជំរឿនឆ្នាំ២០១៩នេះ វាមានលក្ខណៈទំនើបជាងការធ្វើជំរឿនក្នុងឆ្នាំ១៩៩៨ និងឆ្នាំ២០០៨កន្លងទៅ ដោយក្រុមការងារបានដាក់ប្រព័ន្ធសម្រាប់វាយតម្លៃភាពសុក្រឹត្យនៃការធ្វើជំរឿន ដោយប្រើប្រាស់ប្រព័ន្ធ Tablet PDA និងបច្ចេកទេសNBS។ ការធ្វើជំរឿនឆ្នាំនេះ គឺមានដៃគូអភិវឌ្ឍន៍មួយចំនួនបានចូលរួមប្រឹក្សាជំនួយបច្ចេកទេស ដែលក្នុងនោះមានប្រទេសចិន បានផ្តល់នូវ រថយន្ត ម៉ូតូ កុំព្យូទ័រ ម៉ាស៊ីនថតចម្លងជាដើម។
សូមបញ្ជាក់ថា រាជរដ្ឋាភិបាលបានចាប់ផ្តើមជំរឿនប្រជាជនរបស់ខ្លួន ជាលើកទី៣ គឺមានរយៈពេល១១ថ្ងៃ ចាប់ពីថ្ងៃទី៣ ដល់១៣ ខែមីនា ឆ្នាំ២០១៩កន្លងទៅ ហើយសម្រាប់ការធ្វើជំរឿននៅកម្ពុជាក្នុងឆ្នាំ២០១៩ រដ្ឋាភិបាលកម្ពុជាបានចំណាយថវិកាសរុបចំនួនជាង ៨លានដុល្លារ និងប្រើប្រាស់មន្ដ្រីជំរឿន ៥ម៉ឺននាក់៕ (កែសម្រួលដោយ ៖ បុប្ផា)
ចែករំលែកព័តមាននេះ