រាជធានីភ្នំពេញ៖ លោកជួន ជ័យសត្យា ប្រធាននាយកដ្ឋានជំរុញទេសចរណ៍ក្នុងស្រុក និងអប់រំការយល់ដឹងជាសាធារណៈនៃក្រសួងទេសចរណ៍កាលពីពេល ថ្មីៗកន្លងមក បានថ្លែងថា ការជំរុញឲ្យមានកំណើនភ្ញៀវទេសចរក្នុងស្រុកមានសារសំខាន់ណាស់ក្នុងការជួយទ្រទ្រង់វិស័យទេសចរណ៍ជាតិឲ្យកាន់តែមានលំនឹង ។ បើទោះបីជាមានបញ្ហា ផ្សេងៗនៅលើពិភពលោកក៏ដោយ ក៏ភ្ញៀវក្នុងស្រុកមិនភ័យខ្លាច ហើយនៅតែបន្តដើរលេងកម្សាន្តដដែល ខុសពីភ្ញៀវទេសចរអន្តរជាតិអាចនឹងថយចុះ ហើយមិនធ្វើដំណើរចេញក្រៅប្រទេសទេ បើសិនជាមានបញ្ហាពិភពលោកអ្វីមួយកើតឡើង ។
ប្រភពដដែលលើកឡើងថាដើម្បីជំរុញកំណើនភ្ញៀវទេសចរក្នុងស្រុកក្រសួងទេសចរណ៍ បាន និងកំពុង លើកទឹកចិត្តប្រជាពលរដ្ឋឲ្យឈ្វេងយល់ពីតំបន់ទេសចរណ៍ក្នុងស្រុកឲ្យកាន់តែទូលាយបន្ថែមទៀតដើម្បីបណ្តុះស្មារតីពួកគាត់ឲ្យចេះស្រឡាញ់ទឹកដីមាតុភូមិ អភិរក្សធនធានទេសចរណ៍ វប្បធម៌ ធម្មជាតិ និងបរិស្ថាន ។ ផ្តើមពីនោះប្រជាពលរដ្ឋនឹងធ្វើដំណើរកម្សាន្តក្នុងស្រុកកាន់តែច្រើនថែមទៀត ។ ការលើកទឹកចិត្តប្រជាពលរដ្ឋឈ្វេងយល់ពីតំបន់ទេសចរណ៍ក្នុងស្រុកនេះ ក្រសួងទេសចរណ៍បានផ្សព្វផ្សាយពីតំបន់ទេសចរណ៍នានាទូទាំងប្រទេស និងជំរុញឲ្យមានការអភិវឌ្ឍហេដ្ឋារចនាសម្ព័ន្ធផ្លូវថ្នល់ឲ្យកាន់តែល្អប្រសើរ ព្រមទាំងបំផុសឲ្យប្រជាសហគមន៍ខិតខំបង្កើតផលិតផលទេសចរណ ៍ថ្មីៗឲ្យបានច្រើន ។
ពាក់ព័ន្ធទៅនឹងការលើកកម្ពស់វិស័យទេសចរណ៍នេះ ក្រសួងទេសចរណ៍បានដាក់ចេញកម្មវិធីប្រឡងប្រណាំងរៀបចំបង្កើតខ្សែកញ្ចប់ទស្សនកិច្ចទេសចរណ៍ក្នុងស្រុក ក្រោមប្រធានបទ«កញ្ចប់ទស្សនកិច្ចមាតុភូមិខ្ញុំ»ទៅកាន់តំបន់ឆ្នេសមុទ្រ ។
កម្មវិធីនេះធ្វើឡើងក្នុងគោលបំណងជំរុញឲ្យប្រជាពលរដ្ឋ និងយុវជនស្គាល់ពីទឹកដី និងគោលដៅទេសចរណ៍ ពិសេសបណ្តុះស្មារតីស្រឡាញ់ទឹកដីមាតុភូមិកម្ពុជា និងបានយល់ដឹងពីការអភិរក្សធនធានទេសចរណ៍ វប្បធម៌ ធម្មជាតិ និងបរិស្ថាន ក៏ដូចជាលើកកម្ពស់កម្រិតជីវភាពរស់នៅក្នុងមូលដ្ឋាន តាមរយៈការផ្តល់នូវអត្ថប្រយោជន៍ដោយផ្ទាល់ពីវិស័យទេសចរណ៍ ។
ជារៀងរាល់ឆ្នាំកម្ពុជាមានអ្នកទេសចរក្នុងស្រុកដើរកម្សាន្តទូទាំងប្រទេសមានប្រមាណ១៦លាននាក់ ធ្វើឲ្យវិស័យទេសចរណ៍ជាតិកាន់តែរីកចម្រើន និងបង្កើតការងារជូនប្រជាពលរដ្ឋដោយផ្ទាល់ និងដោយយោលរាប់លាននាក់ ៕ (កែសម្រួលដោយ ៖ បុប្ផា)
ចែករំលែកព័តមាននេះ