ខេត្តក្រចេះ ៖ អាជ្ញាធរខេត្តក្រចេះនៅថ្ងៃទី៩ សីហា នេះបានធ្វើពិធីទទួលទានសាច់ ជ្រូករួមគ្នាដើម្បីបំផុលចលនាឲ្យមានការទទួលទានសាច់ជ្រូកឡើងវិញដើម្បីផ្តល់ក្តីសង្ឃឹមដល់អ្នកចិញ្ចឹមជ្រូក ក្រោមប្រធានបទ «សាច់ជ្រូកនៅតែមានសុវត្ថិភាពក្នុងការទទួលទានដោយពុំចាំបាច់ព្រួយបារម្មណ៍»។ ពិធីទទួលទានសាច់ជ្រូកបានធ្វើឡើងនៅនិងមុខផ្សារសាមគ្គីក្រុងក្រចេះ ក្រោមវត្តមាន ចូលរួមពីមន្ត្រីជាន់ខ្ពស់នៃរដ្ឋសភាព លោកអភិបាលខេត្តក្រចេះក៏ដូចជាមន្ត្រីនៃមន្ទីពាក់ព័ន្ឋ នានានៅជុំវិញខេត្ត ។
អភិបាលខេត្តក្រចេះលោក វ៉ា ថន បានមានប្រសាសន៍ជម្រុញដល់ប្រជាពលរដ្ឋក្នុងទូទាំងខេត្តក្រចេះឱ្យងាកមកបរិភោគសាច់ជ្រូកជាធម្មតាវិញដោយកុំឲ្យមានភាពភ័យខ្លាចពីការឆ្លងជំងឺប៉ែស្តជ្រូកអាហ្វ្រិកពីព្រោះជំងឺនេះត្រូវបានគេរកឃើញថា មិនឆ្លងដល់មនុស្ស និងបង្ក គ្រោះថ្នាក់ដល់សុខភាពអ្នកទទួលទាននោះទេគឺវាកើតតែលើសត្វជ្រូកដូចគ្នាតែប៉ុណ្ណោះ ។
លោក វ៉ា ថន បានបញ្ជាក់ពីគោលបំណងនៃការធ្វើពិធីទទួលទាននេះគឺធ្វើឡើងក្នុង គោលបំណងចង់បំផុសស្មារតី និងបង្ហាញដល់ប្រជាពលរដ្ឋទាំងអស់ឱ្យនាំគ្នាទទួលទានសាច់ ជ្រូកតាមធម្មតាដើម្បីផ្តល់ក្តីសង្ឃឹមដល់អ្នកចិញ្ចឹម ។
ប្រធានការិយាល័យពស្យុព្យាបាលនៃមន្ទីរកសិកម្មខេត្តក្រចេះលោក កេត សារឿន ធ្លាប់បានបញ្ជាក់ប្រាប់ឲ្យដឹងថា ជំងឺប៉ែស្តជ្រូកអាហ្វ្រិកមិនបានគំរាមកំហែងការឆ្លងចូលក្នុង ខេត្តក្រចេះនោះទេ បើទោះបីជាខេត្តនេះមានព្រំដែនជាប់គ្នា និងប្រទេសវៀតណាមក៏ដោយ ។
ដោយលោកធ្លាប់បានអះអាងថា បើទោះបីជាមិនមានការឆ្លងជំងឺជ្រូកក៏ដោយក៏ សព្វថ្ងៃ មន្ត្រីជំនាញបាន និងកំពុងតែមានវិធានការទប់ស្កាត់នូវប្រភេទជំងឺឆ្លងនេះ ។ ដូចជា ការរឹតបន្តឹង លើការនាំជ្រូកចូលពីប្រទេសវៀតណាម ។ ជាមួយគ្នានេះមន្ត្រីជំនាញ ក៏កំពុងតែមានការទប់ស្កាត់ជាខ្លាំងលើការឆ្លងរីករាលដាលដូចជាការចុះបាញ់ថ្នាំ សម្លាប់មេរោគនៅគ្រប់ទីសត្វឃាត និងបាញ់ថ្នាំសម្លាប់មេរោគ គ្រប់មធ្យោបាយដឹកជញ្ជូន ជ្រូក និងផ្សព្វផ្សាយឲ្យពលរដ្ឋម្ចាស់អាជីវកម្មចិញ្ចឹម ជ្រូកមានការ យល់ដឹងពីវិធានការទប់ស្កាត់ប្រភេទជំងឺឆ្លងនេះដោយខ្លួនឯង ។
មន្ត្រីការិយាល័យជំនាញបានប្រាប់ឲ្យដឹងថា ក្រោយអំពីលេចឮតាមប្រព័ន្ធផ្សព្វផ្សាយផ្សេងៗ នៃការផ្ទុះឡើងពីជំងឺប៉ែស្តជ្រូកនៅតាមបណ្តារខេត្តនានាក្នុងប្រទេសកម្ពុជាបានធ្វើឲ្យបងប្អូនប្រជាពលរដ្ឋនៅក្នុងប្រទេសកម្ពុជាក៏ដូចជានៅក្នុងខេត្តក្រចេះផ្អាកទទួលទានសាច់ជ្រូក ជាហេតុធ្វើឲ្យប៉ះពាល់ជាខ្លាំងដល់សេដ្ឋកិច្ចអ្នកចិញ្ចឹមជ្រូក ខណៈចំនួនតួរលេខនៃ ចំនួនក្បាលជ្រូកដែលធ្លាប់លក់ប្រចាំថ្ងៃរបស់អាជីវករបានធ្លាក់ចុះដល់ទៅជាង៧០% ៕
កែសម្រួលដោយ ៖ សំណាង
ចែករំលែកព័តមាននេះ