រាជធានីភ្នំពេញ ៖ ក្រុមកីឡាប្រណាំងរថយន្តកម្រិតអាជីពកម្ពុជាចំនួន៦រូបក្នុងនោះមាននារី១រូបផង រថយន្តប្រណាំង២គ្រឿងនិងរថយន្តសង្គ្រោះព្រមទាំងគ្រឿងបន្លាស់មួយចំនួនទៀត បានចេញដំណើរពីរាជធានីភ្នំពេញហើយកាលពីព្រឹកថ្ងៃទី៨ សីហា ដើម្បីទៅចូលរួមប្រកួតជើងឯកAsia Cross Country Rally…
រាជធានីភ្នំពេញ ៖ ក្រុមកីឡាប្រណាំងរថយន្តកម្រិតអាជីពកម្ពុជាចំនួន៦រូបក្នុងនោះមាននារី១រូបផង រថយន្តប្រណាំង២គ្រឿងនិងរថយន្តសង្គ្រោះព្រមទាំងគ្រឿងបន្លាស់មួយចំនួនទៀត បានចេញដំណើរពីរាជធានីភ្នំពេញហើយកាលពីព្រឹកថ្ងៃទី៨ សីហា ដើម្បីទៅចូលរួមប្រកួតជើងឯកAsia Cross Country Rally 2019។ គោលដៅប្រណាំងគឺចាប់ពីទីក្រុមប៉ាតាយ៉ាប្រទេសថៃ ទៅដល់ទីក្រុងណៃពីដោ ប្រទេសមីយ៉ាន់ម៉ា។
លោក ហូ សិទ្ធិគុណ អនុប្រធានសហព័ន្ធកីឡាយានយន្តកម្ពុជា និងជាប្រធានដឹកនាំទៅចូលរួមប្រកួតលើកនេះបានឱ្យដឹងថា នេះគឺជាការប្រកួតប្រជែងមួយដែលមានកម្រិតខ្ពស់ជាងលើកមុនៗដោយមានរថយន្តសរុបរហូតដល់ទៅ៣៧គ្រឿង ហើយជាប្រភេទរថយន្តប្រើសាំងផងដែរ ។ ដូច្នេះសម្រាប់កីឡាករយើងដែលធ្លាប់តែប្រើរថយន្តប្រភេទម៉ាស៊ូតពីមុនមក លោក គិតថា នឹងមានការប្រែប្រួលខុសពីលើកមុនបន្តិច ។
អ្វីដែលជាក្ដីបារម្ភសម្រាប់យើងគឺលើកនេះជាលើកទី១ហើយដែលកីឡាករយើងធ្វើដំណើរទៅកាន់ប្រទេសមីយ៉ាន់ម៉ាបើនិយាយពីស្ថានភាពផ្លូវវិញក៏មានការលំបាកជាងមុនបន្តិចដែរ ។ ដូច្នេះលោករំពឹងថា ការប្រកួតអាចនឹងមានភាពតានតឹងជាងមុន ។ ម្យ៉ាងវិញទៀត ក្នុងនាមក្រុមការពារជើងឯក លោកសង្ឃឹមថា នឹងអាចរក្សាចន្លោះពិន្ទុសមរម្យណាមួយ ។
លោកបញ្ជាក់ថា កាលពីឆ្នាំមុនព្រឹត្តិការណ៍បែបនេះយើងធ្លាប់ធ្វើនៅកម្ពុជានិងថៃ ដោយឡែកសម្រាប់ឆ្នាំនេះការប្រណាំងធ្វើនៅថៃនិងមីយ៉ាន់ម៉ា ដូច្នេះទាក់ទងនឹងភូមិសាស្ត្រក៏ខុសគ្នាដែរ តែយើងត្រូវតែខិតខំប្រឹងប្រែងធ្វើឱ្យបានល្អ ។ ព្រោះមុនពេលប្រកួតប៉ុន្មានខែមកនេះយើងបានត្រៀមខ្លួនរួចជាស្រេចទាំងរថយន្ត សម្ភារបច្ចេកទេសជាដើម ។
ការប្រកួតចាប់ផ្ដើមពីថ្ងៃទី១១ ដល់១៦ សីហា ដោយបញ្ចប់នៅប្រទេសមីយ៉ាន់ម៉ាដែលមានចម្ងាយផ្លូវជាង២២០០គីឡូម៉ែត្រ ។ សម្រាប់កីឡាករ កីឡាការិនីដែលត្រូវទៅចូលរួមលើកនេះប្រើរថយន្តលេខ១១៥បើកបរដោយលោក សោម កុសល និងជំនួយការបើកបរលោក វង្ស គឹមហួត រីឯរថយន្តលេខ១០៧បើកបរដោយកីឡាករ ហូ សិទ្ធិគុណ និងជំនួយការបើកបរកីឡាការិនី សេង សុជាតា និងកីឡាករ ពៅ តិចឡេង៕ (កែសម្រួលដោយ ៖ បុប្ផា)
ចែករំលែកព័តមាននេះ