រាជធានីភ្នំពេញ ៖ ក្រោយផ្ទុះរឿង ចម្រូងចម្រាសលើករណីថាមានកីឡាករឈប់ ប្រកួតដោយសារអន់ចិត្តមិនទទួលបានប្រាក់ រង្វាន់តាមការចង់បាន ក៏មន្ត្រីសហព័ន្ធនេះនៅតែអះអាងថា បានសម្រួលអារម្មណ៍កីឡាករដើម្បីឲ្យត្រៀមប្រកួតក្នុងព្រឹត្តិការណ៍នានាជាហូរហែ គឺមិនឈប់នោះទេ។
លោក សុខ មង្គលរស្មី ប្រធានសហព័ន្ធកីឡាកាយវប្បកម្ម បានអះអាងថា ថ្វីដ្បិតនៅខែ៩ខាងមុខនេះ សហព័ន្ធប្រកាសលុបចោលគម្រោងរៀបចំការប្រកួតធំមួយនៅក្នុងប្រទេសកម្ពុជា ព្រោះតែហេតុផលរៀបចំមិនទាន់ ប៉ុន្តែមិនមានន័យថា សហព័ន្ធទាំងមូលខ្វះខាតកីឡាករ និងមិនចង់បង្ហាញខ្លួននៅក្នុងព្រឹត្តិការណ៍បន្តបន្ទាប់នោះទេ ។ លោកថាអារម្មណ៍កីឡាករគឺនៅតែមាន និងបន្តចង់ប្រកួតមិនឈប់ដូចអ្វីដែលធ្លាប់ផ្ទុះឡើងនោះឡើយ បើទោះជាសហព័ន្ធខ្វះការជ្រោមជ្រែងខាងផ្នែកហិរញ្ញវត្ថុក្ដី ។
លោកថា សហព័ន្ធនៅតែត្រៀមជើងព្រួលបញ្ជូនកីឡាករឱ្យចេញទៅប្រកួតនៅក្នុងប្រទេសកូរ៉េ នាខែតុលា និងគ្រោងបញ្ជូនតំណាងឲ្យទៅប្រកួតនៅប្រទេសផ្សេងដោយក្នុងចំណោមកីឡាករសរុបជាង១០០នាក់ គឺនៅតែមានការតាំងចិត្តខ្ពស់ ។ លោកថា មិនមានករណីរឿងអ្នកនេះមិនទៅ ឬអ្នកនោះមិនទៅនោះទេ បើទោះជាកន្លងមកកីឡាករមួយចំនួនបាក់ទឹកចិត្តក្ដី ។ ក្នុងនោះអ្នកតំណាងឲ្យកម្ពុជាចេញប្រកួតគឺមិនអត់ទេ ដោយកីឡាករច្រើនរូបកំពុងស្ថិតក្នុងការហ្វឹកហាត់ ដែលពិបាកឱ្យសហព័ន្ធសម្រេចជ្រើសអ្នកណានាពេលនេះផង ព្រោះតែម្នាក់ៗ មានគុណសម្បត្តិរៀងខ្លួន ។
លោកទទួលស្គាល់ថា ការប្រកួតនៅក្រៅប្រទេស គឺជារឿងលំបាក ជាពិសេសបើការប្រកួតទាំងនោះតម្រូវឱ្យកំណត់អាយុកីឡាករក្មេងៗហើយ មានសាច់ដុំល្អ ដោយសារតែធនធានសហព័ន្ធនៅមានកម្រិត ។ លោកថា មកទល់សព្វថ្ងៃបណ្ដាប្រទេសដែលបានបើកប្រកួតបង្អួតសាច់ដុំ មិនមានការកំណត់អាយុ នោះទេ ដោយគេកំណត់ត្រឹមតែគីឡូប៉ុណ្ណោះ ដោយសារតែគេក៏បានដឹងថាកីឡាប្រភេទនេះ មិនងាយសំបូរក្មេងៗហ្វឹកហាត់ទេ ។
យ៉ាងណា មិញលោកថា នៅស្រុកគេ គឺសំបូរកីឡាករក្នុងវិស័យនេះជាងកម្ពុជា ដោយសារតែគេមានទីផ្សារឱ្យកីឡាករដែលមានសាច់ដុំត្រូវតាមការប្រកួតមានទីផ្សារ មានប្រាក់ចំណូល ដែលខុសពីកម្ពុជាកីឡាករបានលុយតែពេលប្រកួតឈ្នះ តែបើអត់ការប្រកួតគឺត្រូវធ្វើការផ្ទាល់ខ្លួន៕ (កែសម្រួលដោយ ៖ បុប្ផា)
ចែករំលែកព័តមាននេះ