រាជធានីភ្នំពេញ ៖ បន្ទាប់ពីមានមតិរិះគន់ចំពោះការលុបចោលថ្ងៃឈប់សម្រាកចំថ្ងៃទី២៣ តុលា និងថ្ងៃមួយចំនួនរបស់រាជរដ្ឋាភិបាលត្រូវបានអ្នកនាំពាក្យគណបក្សប្រជាជនកម្ពុជាបានបកស្រាយថា ការលុបថ្ងៃនេះដោយសារកិច្ចព្រមព្រៀងសន្តិភាពទីក្រុងប៉ារីស នេះដោយសារខ្លឹមសារត្រូវបញ្ជូលក្នុងរដ្ឋធម្មនុញ្ញ រួចហើយចំណែកសម្រាប់ថ្ងៃផ្សេងនោះ ដើម្បីផ្តល់ឱកាសឲ្យអ្នកវិនិយោគបរទេសមកវិនិយោគកម្ពុជាកាន់តែច្រើន ។
លោក សុខ ឥសាន គណបក្សនាំពាក្យគណបក្សប្រជាជនកម្ពុជាបានសម្ភាសន៍តាមទូរស័ព្ទនៅថ្ងៃទី៨ សីហាយ៉ាងដូច្នេះថា «យើងដឹងហើយថា កិច្ចព្រមព្រៀងទីក្រុងប៉ារីស ត្រូវបានបញ្ចប់នៅក្រោយការបោះឆ្នោតឆ្នាំ១៩៩៣ ដែលរៀបចំដោយអ៊ុន តាក់ ។ អាហ្នឹងមានចែងក្នុង ប្រការ១ ក្នុងកិច្ចព្រមព្រៀងទីក្រុងប៉ារីសរួចហើយ គឺថា កិច្ចព្រមព្រៀងសន្តិភាពប៉ារីសចាប់ផ្តើមពីអ៊ុនតាក់ធ្វើការរហូតដល់ការបោះឆ្នោតនីតិកាលទី១ រៀបចំរាជរដ្ឋាភិបាលរួចហើយមានរដ្ឋធម្មនុញ្ញ ហើយខ្លឹមសារនៃកិច្ចព្រមព្រៀងនេះបានដាក់បញ្ចូលក្នុងរដ្ឋធម្មនុញ្ញរួចហើយ» ។
លោកសុខ ឥសាន បានបន្ថែមថា ប្រសិនបើទុកខ្លឹមសារនៃកិច្ចព្រមព្រៀងទីក្រុងប៉ារីសនឹងជាន់គ្នាជាមួយនឹងខ្លឹមសាររដ្ឋធម្មនុញ្ញ ។ ជាងនេះនៅក្នុងប្រទេសកម្ពុជាយើងមានថ្ងៃឈប់ សម្រាករហូតដល់២៨ថ្ងៃ រហូតដល់មានអ្នកមួយចំនួនធំបានរិះគន់ថា នៅកម្ពុជាមានថ្ងៃឈប់ សម្រាកច្រើន ហើយធ្វើឲ្យមានការអល់អែកពីអ្នកវិនិយោគទន់បរទេសមកបណ្តាក់ទន់មកកម្ពុជា ។
ទាក់ទិននឹងការលុបថ្ងៃឈប់សម្រាកនេះដែរ អ្នកនាំពាក្យគណបក្សប្រជានកម្ពុជាក៏បានអះអាងថា រាជរដ្ឋាភិបាលធ្វើនេះក៏ ដើម្បីជាគោលនយោបាយបើកទូលាយចំពោះអ្នកវិនិយោគទន់បរទេសមកធ្វើការវិនិយោគនៅកម្ពុជាផងដែរ ។ លោកបញ្ជាក់ថា ៖«អីញ្ចឹងយើងចាំបាច់ត្រូវតែកាត់បន្ថយនៅថ្ងៃណាខ្លះដែលមិនចាំបាច់ និងមិនសំខាន់ដូចជាថ្ងៃ២៣ តុលាយើងបានបញ្ចូលស្មារតី ឬខ្លឹមសារក្នុងរដ្ឋធម្មនុញ្ញហើយ ។ យើងយកស្មារតីតាមរដ្ឋធម្មនុញ្ញ» ។
ពាក់ព័ន្ធនឹងការការលុបថ្ងៃ២៣ តុលានេះ ដែរលោក អ៊ូ ច័ន្ទរ័ត្ន អតីតមន្ត្រីជាន់ខ្ពស់គណបក្សសង្គ្រោះជាតិបានស្នើឲ្យរាជរដ្ឋាភិបាលកុំលុបចោលអី ព្រោះវាជាថ្ងៃប្រវត្តិសាស្ត្រ ដែលត្រូវបានអន្តរជាតិបានដឹង ពិសេសនោះទុកឲ្យកូនខ្មែរបានដឹង ។ លោក អ៊ូ ច័ន្ទរ័ត្ន បានបញ្ជាក់ថា ៖«ខ្ញុំចង់ឲ្យមានថ្ងៃ២៣ តុលាហ្នឹង ព្រោះវាជាថ្ងៃប្រវត្តិសាស្ត្រ ហើយខ្ញុំគិតថា ជាថ្ងៃមួយ ជានិមិត្តរូបនៃការផ្សះផ្សាជាតិ និងឯករាជ្យជាតិផងដែរ ។ ខ្ញុំចង់ឲ្យពលរដ្ឋឈប់ចំថ្ងៃ២៣ តុលានឹង ដើម្បី ឲ្យគាត់បានយល់ថា នេះថ្ងៃប្រវត្តិសាស្ត្រក្នុងការផ្លាស់ប្តូររបបទៅជារបបប្រជាធិបតេយ្យ ចាប់ពីថ្ងៃទី២៣ តុលានឹងមកដែលមានទាំងការចរចាគ្នា និងឯកភាពគ្នា» ។
យ៉ាងណាក្តីលោកអ៊ូ ច័ន្ទរ័ត្ន បានឯកភាពឲ្យមានការលុបថ្ងៃឈប់សម្រាកចំថ្ងៃ១០ធ្នូផងដែរ ។ លោកថា ថ្ងៃ១០ធ្នូ គឺជាថ្ងៃបុណ្យសកល ទោះបីជាកម្ពុជាយើងចង់ ឬមិនចង់វាមិនមែន សម្រាប់ប្រទេសជាតិប៉ុន្មានទេ ។ លោកបញ្ជាក់ថា ៖«ខ្ញុំឯកភាពព្រោះថា ប្រទេសលោកសេរីមួយចំនួនក៏គេមិនយកថ្ងៃ១០ធ្នូជាថ្ងៃឈប់សម្រាកដែរ ។ យើងចង់ឈប់ក៏ឈប់ទៅ តែសម្រាប់ខ្ញុំគិតថា វាមិនចាំបាច់ទេ ។ ប៉ុន្តែថ្ងៃ២៣តុលា គឺជាថ្ងៃប្រវត្តិសាស្ត្រសម្រាប់កម្ពុជាយើង ហើយថ្ងៃ២៣តុលា គឺជានិមិត្តរូបនៃការផ្សះផ្សារជាតិ និងឯកភាពជាតិ» ។
សូមជម្រាបកាលពីពេលថ្មីៗកន្លងមកនេះរាជរដ្ឋាភិបាលសម្រេចកាត់បន្ថយថ្ងៃឈប់សម្រាកប្រចាំឆ្នាំពី២៨ថ្ងៃ មកត្រឹម២២ថ្ងៃវិញ ។ ក្នុងបានលុបថ្ងៃបុណ្យមាឃបូជា ទិវានៃការចងចាំ២០ ឧសភា , ទិវាកុមារអន្តរជាតិ ១មិថុនា , ទិវារំលឹកខួបនៃកិច្ចព្រមព្រៀង សន្តិភាពទីក្រុងប៉ារីស ២៣តុលា និងថ្ងៃទិវាសិទ្ធិមនុស្សអន្តរជាតិ១០ធ្នូ ៕ កែសម្រួលដោយ ៖ សុឃាក់
ចែករំលែកព័តមាននេះ