ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា អាជ្ញាធរខេត្តមណ្ឌលគិរី បានបញ្ជូនកម្លាំងសង្គ្រោះបន្ទាន់ទៅតំបន់ដែលកំពុងរងគ្រោះដោយសារទឹកជំនន់ក្នុងស្រុកកោះញែក ដើម្បីត្រៀមបង្ការនូវ គ្រោះថ្នាក់នានាដែលកើតមានជាយថាហេតុ ដែលបណ្តាលមកពីទឹកទន្លេស្រែពក បានបន្តកើនឡើងតាំងពីថ្ងៃទី៦ ខែសីហា…
ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា អាជ្ញាធរខេត្តមណ្ឌលគិរី បានបញ្ជូនកម្លាំងសង្គ្រោះបន្ទាន់ទៅតំបន់ដែលកំពុងរងគ្រោះដោយសារទឹកជំនន់ក្នុងស្រុកកោះញែក ដើម្បីត្រៀមបង្ការនូវ គ្រោះថ្នាក់នានាដែលកើតមានជាយថាហេតុ ដែលបណ្តាលមកពីទឹកទន្លេស្រែពក បានបន្តកើនឡើងតាំងពីថ្ងៃទី៦ ខែសីហា ២០១៩ ។
លោក ស៊ិន វណ្ណវុឌ្ឍ អភិបាលស្រុកកោះញែក បានឲ្យដឹងថា ជំនាន់ទឹកភ្លៀងកំពុងជន់លិចភូមិអ្នកស្រុកចំនួន៤ភូមិ នៅស្រុកកោះញែក ដែលមានប្រជាពលរដ្ឋរស់នៅជាង៧០០គ្រួសារ ខណៈដែលអាជ្ញាធរស្រុកកំពុងតាមដានយ៉ាងយកចិត្តទុកដាក់ពីស្ថានភាពទឹកជំនាន់នេះ នៅព្រឹកថ្ងៃទី០៨ ខែសីហា នេះ។
លោកអភិបាលស្រុកបន្តថា នៅពេលនេះសាលារៀនកោះម្យើល កំពុងត្រូវទឹកជំនន់លិចនៅមុខសាលាជម្រៅត្រឹមចង្កេះ សិស្សានុសិស្សខកខានមិនបានរៀនសូត្រ ចំណែកនាយកសាលាកំពុងត្រៀមនឹងទុកដាក់សម្ភារៈ ជាពិសេសសៀវភៅសិក្សាគោលដាក់លើធ្នើខ្ពស់។
ដោយឡែកសាលារៀនស្រែជ្រៃ ក៏មានការពិបាកដល់គ្រូ និងសិស្សផងដែរ ដោយដំបូលលិចពីលើគ្រប់ថ្នាក់ទាំងអស់ ពេលនេះកំពុងឲ្យសិស្សផ្អាកការសិក្សាមួយពេលសិន ។ ចំណែកឯផ្លូវចូលទៅក្នុងភូមិ ត្រូវទឹកលិចហូរកាត់ផ្លូវជាច្រើនកន្លែង ហើយភូមិចំនួន៤កំពុងរងនូវការលិចទឹក ក្នុងនោះភូមិកោះម្យើយលើ ភូមិកោះម្យើយក្រោម ភូមិណង់ប៊ួ និងភូមជីមាត ដែលភូមិទាំង៤ ស្ថិតនៅឃុំណង់ឃីលឹក ស្រុកកោះញែក ខេត្តមណ្ឌលគិរី។
ទោះជាយ៉ាងណា គិតត្រឹមរសៀលថ្ងៃទី០៨ សីហា នេះ មិនទាន់មានរបាយការណ៍ណាមួយបញ្ជាក់ថា មានការប៉ះពាល់ដល់អាយុជីវិត មនុស្ស និងសត្វទេ ព្រោះអ្នកភូមិបានជម្លៀសទៅទីទួលសុវត្ថិភាពទាន់ពេលវេលា។ (កែសម្រួលដោយ ៖ បុប្ផា)
ចែករំលែកព័តមាននេះ