រាជធានីភ្នំពេញ៖ នៅប៉ុន្មានឆ្នាំចុងក្រោយនេះ គេសង្កេតឃើញប្រជាពលរដ្ឋកម្ពុជាបានផ្លាស់ប្តូរឥរិយាបទសន្សឹមៗក្នុងការជ្រើសរើសចំណីអាហារមកទទួលទានសម្រាប់ក្រុមគ្រួសារ ពីប្រភេទអាហារដែលគ្មានស្តង់ដារមកគិតគូ និងចាប់អារម្មណ៍ខ្ពស់អាហារដែលមានសុវត្ថិភាពមិនប៉ះពាល់ដល់សុខភាពក្រោយពេលបរិភោគ ។
អ្នកស្រី តុង ចាន់ធាង នាយិកាអង្គការសេដាក មានប្រសាសន៍ឱ្យដឹងនៅថ្ងៃទី ៥ ខែសីហា ឆ្នាំ ២០១៩ ម្សិលមិញថា «តាមការសង្កេតមកដល់បច្ចុប្បន្ន ប្រជាពលរដ្ឋកម្ពុជាមានការយល់ដឹងច្រើនទាក់ទងនឹងការបរិភោគចំណីអាហារដែលមានគុភាព សុវត្ថិភាពសម្រាប់សុខភាពខ្លួនឯងមានការកើនឡើងច្រើនគួរឱ្យកត់សម្គាល់ទាំងនៅទីប្រជុំជន និងតាមបណ្តាខេត្ត ។ ពិសេសពលរដ្ឋដែលមានលទ្ធភាព ពួកគាត់បានទៅរកទិញបន្ថែ ឬអាហារនៅតាមហាងដែលពួកគាត់បានស្គាល់ជាក់លាក់ តួយ៉ាងនៅក្រុងភ្នំពេញ» ។ អ្នកស្រីបន្តថា «សម្រាប់ប្រជាពលរដ្ឋរស់នៅតាមជនបទ ពួកគាត់ក៏ចេះមើលដែរ អ្នកលក់បន្លែណាមួយលក់បន្ថែដែលមិនប្រើថ្នាំគីមី ពួកគាត់តែងតែទៅទិញនៅទីនោះជាប្រចាំ ។ ដោយឡែកអ្នកផ្សេងទៀត គាត់ជ្រើសរើសការដាំបន្ថែដោយខ្លួនឯងសម្រាប់ផ្គត់ផ្គង់ក្នុងក្រុមគ្រួសារ» ។
បើតាមអ្នកស្រីនាយិកា មកដល់សព្វថ្ងៃនេះប្រជាពលរដ្ឋកម្ពុជាមានការយល់ដឹងច្រើន ទាក់ទងតម្រូវការ បន្លែ អាហារ សាច់ ដែលគ្មានជាតិគីមីបើប្រៀបធៀបទៅនឹងពេលមុនៗ ហើយប្រជាកសិករដាំដុះបន្ថែក៏យល់ដឹងគ្រាន់ជាងមុនទៅលើការប្រើថ្នាំគីមីនៅតាមតំបន់ គាំំទ្រដោយស្ថាប័នពាក់ព័ន្ធនានា ។ អ្នកស្រីលើកឡើងថា «នៅតំបន់ដែលមានគម្រោងគាំទ្រដោយស្ថាប័នពាក់ព័ន្ធការដាំដុះបន្លែ មិនឱ្យប្រើថ្នាំគីមីច្រើនលើសកម្រិត វាបានចូលរួមផ្តល់ប្រយោជន៍ច្រើនដល់ទាំងអ្នកបរិភោគ និងកសិករដែលជាអ្នកដាំបន្លែខ្លួនឯង ពីព្រោះនៅពេលគាត់យកបន្ថែមកកាន់មជ្ឈមណ្ឌលត្រួតពិនិត្យគុណភាពបន្លែមុននឹងធ្វើនាំចេញទៅលក់តាមទីផ្សារ ។ ការធ្វើបែបនេះបន្លែរបស់កសិករមានការគាំទ្រ ឬបានបញ្ជាក់គុណភាពបន្លែគម្រោងគាំទ្រ វាបានធ្វើឱ្យបន្លែពួកគាត់លក់ដាច់ និងបានថ្លៃជាងមុន» ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ក្នុងពិធីបើកសម្ពោធដាក់ឱ្យប្រើប្រាស់មជ្ឈមណ្ឌលប្រមូលផ្តុំ ពិនិត្យគុណភាព និងចែកចាយបន្លែរបស់មន្ទីរកសិកម្ម រុក្ខាប្រមាញ់ និងនេសាទ ខេត្តកណ្តាលកាលពីថ្ងៃទី ២៩ ខែកក្កដាកន្លងទៅថា «ប្រជាជនយើងបានផ្លាស់ប្តូរឥរិយាបថមកបរិភោគចំណីអាហារដែលមានស្តង់ដារប្រកបដោយគុណភាព និងសុវត្ថិភាពខ្ពស់ ជាពិសេសផលិតផលបន្លែ និងផ្លែឈើ ។ រីឯភ្ញៀវទេសចរវិញក៏មានការកើនឡើងជាលំដាប់ពីមួយឆ្នាំទៅមួយឆ្នាំ ដែលធ្វើឱ្យសេចក្តីត្រូវការម្ហូបអាហារដែលមានសុវត្ថិភាពមានការកើនឡើងឥតឈប់ឈរ ។ ដូច្នេះ ដើម្បីឆ្លើយតប និងបំពេញនូវសេចក្តីត្រូវការនៃបរិបទថ្មីនេះ តម្រូវឲ្យមានកិច្ចសហការគ្នាយ៉ាងជិតស្និតពីគ្រប់ដៃគូពាក់ព័ន្ធតាមអភិក្រម «រដ្ឋ-ឯកជន-ដៃគូអភិវឌ្ឍន៍ និងសហគមន៍»។
លោករដ្ឋមន្ត្រីបានបញ្ជាក់ទៀតថា «មជ្ឈមណ្ឌលប្រមូលផ្តុំ ត្រួតពិនិត្យគុណភាព និងចែកចាយបន្លែនេះ គឺមានសារៈសំខាន់ និងចាំបាច់បំផុតទាំងពេលបច្ចុប្បន្ន ក៏ដូចជាសម្រាប់ពេលអនាគតសំដៅធានាបាននូវគុណភាព សុវត្ថិភាពផលិតផលដែលអាចប្រកួតប្រជែងលើទីផ្សារ ធានាសុខុមាលលភាពសាធារណៈ និងភាតរបរិស្ថាន ហើយគឺពិតជាស្របតាមគោលនយោបាយអភិវឌ្ឍវិស័យកសិកម្មរបស់ក្រសួង ក្នុងការជំរុញផលិតភាព គុណភាព និងសុវត្ថិភាពសម្រាប់ផ្គត់ផ្គង់ទីផ្សារក្នុងស្រុក និងក្រៅស្រុក ។ ជាការឆ្លើយតប ក្រសួងបានដាក់ចេញនូវគោលការណ៍ និងដាក់ឱ្យប្រើប្រាស់នូវរូបសញ្ញាជាតិនៃការអនុវត្តកសិកម្មល្អកម្ពុជា (CamGAP) ជាស្តង់ដារជាតិ ហើយនឹងប្រកាសដាក់ឱ្យប្រើប្រាស់នូវឯកសារស្តង់ដារកសិកម្មសរីរាង្គកម្ពុជាក្នុងពេលឆាប់ៗខាងមុខនេះ» ៕ កែសម្រួលដោយ ៖ សុឃាក់
ចែករំលែកព័តមាននេះ