ខេត្តកណ្ដាល ៖ តាមសេចក្តីរាយការណ៍បឋមបានឱ្យដឹងថា អ្នកបើកបររថយន្តកុងតឺន័រម្នាក់បានស្លាប់បាត់បង់ជីវិតនៅពេលដើរចូលមណ្ឌលសុខភាព ដើម្បីឲ្យគ្រូពេទ្យពិនិត្យឈាម កាលពីវេលាម៉ោង៧និង២០នាទីព្រឹកថ្ងៃទី៧ ខែសីហា ឆ្នាំ២០១៩ នៅមណ្ឌលសុខភាព ឃុំសំរោងធំ ស្ថិតក្នុងភូមិជ្រោយដង ឃុំសំរោងធំ ស្រុកកៀនស្វាយ ខេត្តកណ្តាល ។
ជនរងគ្រោះដែលស្លាប់ឈ្មោះ ឃឹម សុភ័ក្រ ភេទប្រុស អាយុ៥២ឆ្នាំ មុខរបរបើកបររថយន្តធុនធំដឹកកុងតឺន័រ មានទីលំនៅភូមិ៣ សង្កាត់៣ ក្រុងព្រះស៊ីហនុ ខេត្តព្រះសីហនុ ។
តាមសាក្សីដែលឃើញហេតុការណ៍បានរៀបរាប់ប្រាប់សមត្ថកិច្ចថា មុនកើតហេតុ គេឃើញជនរងគ្រោះបានឈប់រថយន្តចតនៅលើចិញ្ចើមផ្លូវជាតិលេ១ រួចក៏បានដើរចូលទៅមណ្ឌលសុខភាពឃុំសំរោងធំ ដើម្បីពិនិត្យឈាម ។
តាមប្រភពដដែលបានបន្តថា ពេលជនរងគ្រោះនោះចុះពីលើរថយន្តដំបូងមិនទាន់បានពន្លត់ម៉ាស៊ីនរថយន្តនោះទេ ហើយជនរងគ្រោះក៍ដើរត្រឡប់ក្រោយវិញ និងបានពន្លត់ម៉ាស៊ីនរថយន្ត និងបិទទ្វារថយន្តយ៉ាងត្រឹមត្រូវ បន្ទាប់មកជនរងគ្រោះក៏ដើរចូលទៅកាន់មណ្ឌលសុខភាព ស្រាប់តែដួលនៅលើចិញ្ចើមថ្នល់បង្កការភ្ញាក់ផ្អើលដល់អ្នកស្រុកភូមិ និងអ្នកដំណើរបាននាំគ្នាជួយគ្រាហ៍ជនរងគ្រោះចូលមណ្ឌលសុខភាពដែរ តែហួសពេលទៅហើយ ដោយគ្រូពេទ្យបានពិនិត្យរួចប្រាប់ថា ជនរងគ្រោះបានស្លាប់បាត់ទៅហើយ ។
ក្រោយពីទទួលបានព័ត៌មានខាងលើនេះ កម្លាំងនគរបាលប៉ុស្តិ៍បានចុះទៅដល់ និងបានសហការជាមួយផ្នែកជំនាញ អាជ្ញាធរមូលដ្ឋានឃុំ ព្រមទាំងគ្រូពេទ្យឃុំសំរោងធំ ធ្វើការពិនិត្យសព និងបានបញ្ជាក់ថា នៅលើសពជនរងគ្រោះរកមិនឃើញមានស្លាកស្នាមអ្វីគួរឲ្យកត់សំគាល់នោះទេ តាមការសន្និដានគឺជនរងគ្រោះស្លាប់ដោយសារខ្យល់គរ ។
បច្ចុប្បន្ន សពជនរងគ្រោះត្រូវបានសាច់ញាតិមកដឹកយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ