ប្រសិនបើអ្នកចាប់អារម្មណ៍លើរថយន្ត Ferrari LaFerrari ដែលបានប្រើរួចហើយ អ្នកត្រូវត្រៀមខ្លួនជះលុយមិនតិចទេ។ តម្លៃរបស់វានៅពេលនេះឡើងដល់ទៅ៣លានដុល្លារ (មិនមានពន្ធនាំចូល)។ ម៉ាស៊ីន V12 ដែលមានកម្លាំង ៦.៣ លីត្រនេះបង្កើតបានជាកម្លាំងអតិបរមា ៧៨៩ សេះនិងកម្លាំងបង្វិល ៥១៦ ផោន – ហ្វីត។ វាត្រូវបានផ្គត់ផ្គង់ដោយម៉ូទ័រអេឡិចត្រិច ដែលមានកម្លាំង ១៦១ សេសសម្រាប់កម្លាំងសរុប ៩៥០ សេស។ ម៉ាស៊ីន V12 នេះមានតម្លៃថ្លៃណាស់ទោះបីប្រើរួចហើយក៏ដោយ។
ជាឧទាហរណ៍ស្រាប់ ម៉ាស៊ីន LaFerrari ឆ្នាំ ២០១៧ បច្ចុប្បន្ន ត្រូវបានដាក់លក់នៅលើ EBay ជាមួយនឹងតម្លៃ ៨០ម៉ឺនដុល្លារ។ នេះគឺមិនមានមកជាមួយនឹងរថយន្តទេ។ ពោលគឺគ្រាន់តែម៉ាស៊ីនតែប៉ុណ្ណោះ មានតម្លៃស្ទើរតែអាចយកទៅទិញផ្ទះវីឡាធំមួយបាន។ វាជាប្រភេទម៉ាស៊ីនគេប្រើរួចហើយ ដែលជិះបាន២០ម៉ាយ។ គេមិនដឹងថា តួរថយន្តទាំងមូលដាក់លក់នៅទីណាទេ។
វាអាចនឹងត្រូវបានគេបើកបុកជួបនឹងគ្រោះថ្នាក់ចរាចរណ៍ បានជាគេដាក់លក់តែម៉ាស៊ីនបែបនេះ។ សាកស្រមៃទៅមើល ប្រសិនបើអ្នកថ្ងៃណាមួយត្រូវការប្តូរម៉ាស៊ីនឱ្យរថយន្ត LaFerrari របស់អ្នក។ តើអ្នកហ៊ានជះលុយជិតលានដុល្លារនេះទៅលើម៉ាស៊ីនដែរឬទេ?
តាមពិតទៅ នៅពីរឆ្នាំមុន គេដាក់ម៉ាស៊ីននេះលក់ត្រឹមតែតម្លៃ ២៨៥០០០ដុល្លារប៉ុណ្ណោះ។ តែមកដល់ពេលនេះ គេស្រាប់តែតម្លើងថ្លៃវា ស្ទើរតែ៣ដងទៅហើយ។ តម្លៃនេះពិតជាសាកសមនឹងតម្លៃឈ្មោះ Ferrari មែន។
អ្វីដែលគួរឱ្យចាប់អារម្មណ៍ផងដែរនោះ គឺថាតម្លៃ៨០ម៉ឺនដុល្លារនេះ គឺមិនបូកបញ្ចូលជាមួយនឹងការដឹកជញ្ជូននោះទេ។ គេអាចនឹងយកប្រហែលជា២ពាន់ដុល្លារសម្រាប់ថ្ងៃដឹក។ បើនិយាយឱ្យស្រួលស្តាប់ទៅ ម៉ាស៊ីននេះមានតម្លៃស្មើនឹងរថយន្ត Farrari 812 Superfast ២គ្រឿងថ្មីស្រឡាង ដែលមានតម្លៃ ៣៦៣៧៣០ដុល្លារ៕
ប្រភព ៖ carbuzz , កែសម្រួលដោយ ៖ សំណាង
ចែករំលែកព័តមាននេះ