រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអះអាងថា ទស្សនៈកិច្ចរបស់លោកប្រធានាធិបតីស្រីលង្កានឹងពង្រឹងកិច្ចសហប្រតិបត្តិការទ្វេភាគីកម្ពុជា និងស្រីលង្កាកាន់តែប្រសើរថែមទៀត ។ សម្តេចបានសរសេរលើបណ្តាញសង្គម…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអះអាងថា ទស្សនៈកិច្ចរបស់លោកប្រធានាធិបតីស្រីលង្កានឹងពង្រឹងកិច្ចសហប្រតិបត្តិការទ្វេភាគីកម្ពុជា និងស្រីលង្កាកាន់តែប្រសើរថែមទៀត ។ សម្តេចបានសរសេរលើបណ្តាញសង្គម នៅថ្ងៃទី៧ សីហាថា កម្ពុជារីករាយស្វាគមន៍លោក Maithripala Sirisena ប្រធានាធិបតីស្រីលង្កា និងលោកជំទាវ ដែលបានអញ្ជើញមកបំពេញទស្សនកិច្ចជាផ្លូវការ នៅព្រះរាជាណាចក្រកម្ពុជានៅថ្ងៃនេះ ។
សម្តេចតេជោបញ្ជាក់ថា៖«តាមរយៈទស្សនកិច្ចនេះ គឺនឹងពង្រឹងបាននូវចំណងមិត្តភាព និងកិច្ចសហប្រតិបត្តិការរវាងប្រទេសយើងទាំងពីរអោយកាន់តែរឹងមាំល្អប្រសើរថែមទៀត» ។
សូមរឮកថា លោក ម៉ៃទ្រីប៉ាឡា ស្រ៊ីសេនា (MaithripalaSirisena) ប្រធានាធិបតីនៃសាធារណរដ្ឋប្រជាធិបតេយ្យសង្គមនិយមស្រីលង្កាបានមកដល់កម្ពុជានៅម៉ោងប្រមាណជា១១ព្រឹកថ្ងៃទី៧ ខែសីហានេះ ដើម្បីបំពេញទស្សនកិច្ចចាប់ពីថ្ងៃទី៧-១០ ខែសីហា ឆ្នាំ២០១៩ តបតាមការអញ្ជើញរបស់ព្រះករុណាព្រះបាទសម្តេចព្រះបរមនាថនរោត្តមសីហមុនីព្រះមហាក្សត្រកម្ពុជា ។
យោងតាមសេចក្ដីប្រកាសព័ត៌មានក្រសួងការបរទេសខ្មែរបានឲ្យដឹងថា ក្នុងដំណើរទស្សនកិច្ចផ្លូវរដ្ឋលោកប្រធានាធិបតីនឹងចូលគាល់ព្រះមហាក្សត្រ ។ លោកក៏នឹងជួបប្រជុំទ្វេភាគីជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីពង្រឹងកិច្ចសហប្រតិបត្តិការទ្វេភាគីរវាងប្រទេសទាំងពីរ ។ ព្រមទាំងធ្វើការផ្លាស់ប្តូរទស្សនគ្នាលើបញ្ហាតំបន់ និងអន្តរជាតិដែលជាការព្រួយបារម្ភ និងផលប្រយោជន៍រួមផងដែរ ។ បន្ទាប់ពីបញ្ចប់កិច្ចប្រជុំលោកប្រធានាធិបតី និងសម្តេចតេជោនឹងអញ្ជើញធ្វើសាក្សីក្នុងពិធីចុះហត្ថលេខាលើឯកសារកិច្ចសហប្រតិបត្តិការមួយចំនួន ។
ក្នុងអំឡុងពេលស្នាក់នៅកម្ពុជាលោកប្រធានាធិបតីនឹងអញ្ជើញទៅវត្តលង្កា និងប្រគេនសម្តេចព្រះមហាអរិយវង្ស សៅរ៍ ច័ន្ទថុល្ល ព្រះចៅអធិការវត្តលង្កានូវកូនដើមពោធិ៍នៃមហាពោធិព្រឹក្សពីក្រុងអនុរាធបុរៈ ។ បន្ទាប់មកនឹងចូលរួមដាំដើមឈើតំណាងប្រទេសស្រីលង្កាចំនួន១០ដើមនៅមជ្ឈមណ្ឌលវិបស្សនាភ្នំឧត្តុង្គ ។
លោក ម៉ៃទ្រីប៉ាឡា ស្រ៊ីសេនា និងសមាជិកគណៈប្រតិភូក៏នឹងទស្សនាប្រាសាទនានានៅខេត្តសៀមរាបផងដែរ ។ ទស្សនកិច្ចជាលើកដំបូងមកកម្ពុជារបស់លោកប្រធានាធិបតីម៉ៃទ្រីប៉ាឡា ស្រ៊ីសេនានឹងរួមចំណែកយ៉ាងសំខាន់ដល់ការពង្រឹងចំណងមិត្តភាព និងពង្រីកកិច្ចសហប្រតិបត្តិការក្នុងវិស័យសេដ្ឋកិច្ច ពាណិជ្ជកម្ម និងវប្បធម៌រវាងកម្ពុជា និងស្រីលង្កា ៕ កែសម្រួលដោយ ៖ សុឃាក់
ចែករំលែកព័តមាននេះ