ខេត្តកណ្ដាល ៖ សេចក្តីរាយការណ៍បឋមបានឲ្យដឹងថា ក្មេងប្រុសទើបអាយុ១៥ឆ្នាំម្នាក់មានគំនិតជាចោរដោយបានចូលទៅធ្វើសកម្មភាពលួចទ្រព្យសម្បត្តិនៅក្នុងផ្ទះអ្នកភូមិជាមួយគ្នារាប់មិនអស់មកហើយ លុះលើកចុងក្រោយក្មេងប្រុសរូបនេះបានចូលទៅរើកកាយនៅក្នុងផ្ទះមួយកន្លែង ដើម្បីលួចយកទ្រព្យសម្បត្តិ ។ ប៉ុន្តែរើកកាយអស់ចិត្តមិនមានលុយសូម្បីតែ១រៀលឬមានទ្រព្យសម្បត្តអ្វីផ្សេងដែលមានតម្លៃសោះ បន្ទាប់មកក្មេងប្រុសម្នាក់នេះក៏បានចេញពីផ្ទះខាងលើ រួចបានចូលទៅកាន់ផ្ទះ១ទៀត ដែលស្ថិតនៅក្បែរគ្នានោះ ដើម្បីលួចទៀត ។
ហេតុការណ៍នេះបានកើតឡើងកាលពីវេលាម៉ោង១និង៤៥នាទីរសៀល ថ្ងៃទី០៧ ខែសីហានេះ នៅក្នុងភូមិព្រៃទទឹង ឃុំលំហាច ស្រុកអង្គស្នួល ខេត្តកណ្តាល ។ ប៉ុន្តែមិនទាន់បានអីផង ត្រូវបានម្ចាស់ទាន់ក៏រត់ចូលពួនក្រោមគ្រែ ហើយទីបំផុតត្រូវចាប់ខ្លួនប្រគល់ជូននគរបាលចាត់ការតាមច្បាប់តែម្ដង ។
ជនសង្ស័យខាងលើនេះឈ្មោះ ជាវ រុន អាយុ១៥ឆ្នាំ ជនជាតិខ្មែរ មុខរបរមិនពិត ស្នាក់នៅក្នុងភូមិកើតហេតុខាងលើ ចំណែកម្ចាស់ផ្ទះមានឈ្មោះ ស្រ៊ុន វាសនា ភេទប្រុស អាយុ៤៥ឆ្នាំ ជនជាតិខ្មែរ មុខរបរជាងផ្សារដែក ។
តាមប្រភពព័ត៌មានបានឲ្យដឹងថា នៅមុនពេលកើតហេតុម្ចាស់ផ្ទះបានចាក់សោទ្វារបន្ទប់ រួចបានដេកនៅលើគ្រែក្រោមផ្ទះ ប៉ុន្តែខាងក្រៅបន្ទប់ដោយបានយកកូនសោដាក់ក្រោមពូកគ្រែដេកនោះ ។ លុះក្រោយពេលភ្ញាក់ពីដេកឡើងបាត់កូនសោ ហើយស្រាប់តែឃើញជនសង្ស័យរត់ចូលពួនក្រោមគ្រែ១ទៀត ដែលស្ថិតនៅក្បែរគ្រែខ្លួនដេកទើបចាប់ខ្លួនប្រគល់ជូននគរបាលប៉ុស្តិ៍លំហាចនាំទៅសាកសួរ ។
ប្រភពដែលបានបន្តថា នៅចំពោះមុខនគរបាលជនសង្ស័យបានសារភាពថា ដំបូងខ្លួនបានចូលបើកទូរើកកាយរកលុយនៅក្នុងផ្ទះក្បែរនោះទេ តែពុំមានលុយសោះទើបខ្លួនចូលមកផ្ទះជនរងគ្រោះលួចបានកូនសោបន្ទប់១ចង្កោម ដែលទុកក្រោមពូកក្បាលដំណេក ។ បន្ទាប់មកបានដើរទៅរកបន្ទប់ទុកម៉ូតូ ប៉ុន្តែពេលកំពុងតែចាក់សោមិនទាន់បានផង ត្រូវម្ចាស់ភ្ញាក់ទាន់ ទើបខ្លួនរត់ចូលពួនក្រោមគ្រែ ហើយនៅតែត្រូវម្ចាស់ចាប់ខ្លួនបានដដែល ។
មិនតែប៉ុណ្ណោះ កន្លងមកខ្លួនធ្លាប់ចូលលួចនៅក្នុងផ្ទះទី២នេះបាន២លើករួចមកហើយ ដោយលួចយកបានទូរស័ព្ទ២គ្រឿង និងលុយមួយចំនួន ក្រៅពីនេះធ្លាប់ចូលលួចក្នុងផ្ទះផ្សេងទៀត ដែលជាអ្នកភូមិជាមួយគ្នាជាច្រើនលើក និងបានលួចយកលុយព្រមទាំងទូរស័ព្ទជាច្រើនគ្រឿងផងដែរ ៕ កែសម្រួលដោយ ៖សុឃាក់
ចែករំលែកព័តមាននេះ