រាជធានីភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថា ការទិញអាវុធពីចិន ដើម្បីបង្ក្រាបអំពើអនាធិបតេយ្យក្នុងសង្គម ពិសេសនោះជនក្បត់ជាតិដែលចង់បំផ្លាញសន្តិសុខជាតិ…
រាជធានីភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថា ការទិញអាវុធពីចិន ដើម្បីបង្ក្រាបអំពើអនាធិបតេយ្យក្នុងសង្គម ពិសេសនោះជនក្បត់ជាតិដែលចង់បំផ្លាញសន្តិសុខជាតិ ។ លោក សុខ ឥសាន បានបញ្ជាក់ឲ្យដឹងនៅថ្ងៃទី៦ ខែសីហាថា កម្ពុជាទិញអាវុធត្រឹម៤០លានដុល្លារពីប្រទេសចិនថា ជាការគម្រាមប្រទេសដទៃ ជាការមិនពិតនោះទេ ព្រោះថាប្រទេសខ្លះមានអាវុធតម្លៃរាប់រយពាន់លាននោះ តើជាការគម្រាមប្រទេសដទៃដែរប្ញទេ ? ។
អ្នកនាំពាក្យដដែលបានបញ្ជាក់ឲ្យដឹងថា អាវុធដែលទិញមកសម្រាប់ការពារឯករាជ្យ អធិបតេយ្យភាព បូរណភាពទឹកដី ការពារសន្តិភាព ការពារប្រជាជន និងទប់ស្កាត់ និងបង្ក្រាបអំពើអនាធិបតេយ្យក្នុងសង្គម ជាពិសេសក្រុមជនក្បត់ជាតិដែលចង់នាំមកនូវគ្រោះមហន្តរាយដល់សន្តិសុខជាតិ ។ ជាមួយគ្នានោះដែរលោកសុខ ឥសាន បញ្ជាក់ចំពោះការចោទប្រកាន់ថាកម្ពុជាបានចុះហត្ថលេខាជាសង្កាត់ ដើម្បីផ្តល់មូលដ្ឋានទ័ពចិននៅតំបត់រាមក្នុងខេត្តព្រះសីហនុ គឺជាការមិនពិតទេ ។ ព្រោះថា មានអ្នកសារព័ត៌មានរាប់សិបនាក់ទៅពិនិត្យមិនឃើញមានមូលដ្ឋានទ័ពចិននោះមិនមាននោះទេ ។
សូមរឮកថា កាលពីចុះពិនិត្យការដ្ឋានសាងសង់ពហុកីឡដ្ឋាន «មរតកតេជោ» កន្លងមកនេះ សម្តេចតេជោហ៊ុនសែន នាយករដ្ឋមន្ត្រី ហ៊ុន សែន ថ្លែងថា កម្ពុជាចំណាយ៤០លានដុល្លារ ក្នុងឆ្នាំ ២០១៩ ដើម្បីទិញអាវុធរាប់ម៉ឺនដើមពីចិន ហើយទទូចឲ្យអាមេរិករឹបអូសប្រាក់ដែលជនពុករលួយយកទៅផ្ញើនៅអាមេរិក មុនពេលច្បាប់ «លទ្ធិប្រជាធិបតេយ្យកម្ពុជា ២០១៩» ត្រូវបានអនុម័ត ។ ការបង្ហើបឲ្យដឹងពីថវិកាទិញអាវុធចិននេះធ្វើឡើងនៅពេលមានការរិះគន់លើការលើកឡើងរបស់អាមេរិកដែលបានចោទថា មានកិច្ចព្រមព្រៀងសម្ងាត់រវាងកម្ពុជា និងចិនដែលអនុញ្ញាតឲ្យមានមូលដ្ឋានយោធាចិននៅរាមក្នុងខេត្តព្រះសីហនុ ។
ចំណុចចោទប្រកាន់មកកម្ពុជាពីសំណាក់អាមេរិកនេះ ត្រូវបានសម្តេចតេជោ ហ៊ុន សែន ប្រៀបប្រដូចទៅនឹងព្រឹត្តិការណ៍កាលពីមុនឆ្នាំ១៩៧០ ដែលឈានទៅដល់ការធ្វើរដ្ឋប្រហារទម្លាក់សម្ដេចព្រះនរោត្តមសីហនុ ដោយលោកសេនាប្រមុខ លន់ នល់ ។ សម្តេចបានបញ្ជាក់ថា ៖ «អស់លោកត្រូវចាំមុនឆ្នាំ១៩៧០ មុនរដ្ឋប្រហារអស់លោកបាននិយាយពីវត្តមានកងទ័ពរំដោះវៀតណាមនៅលើទឹកដីកម្ពុជា ។ តែប៉ុន្មានរយៈក្រោយមកអស់លោកធ្វើរដ្ឋប្រហារទម្លាក់សម្ដេចព្រះនរោត្តមសីហនុអស់លោកត្រូវចាំទៅលើចំណុចនេះហើយ អស់លោកក៏ត្រូវចាំនូវប្រវត្តិចោទអ៊ីរ៉ាក់ថា មានអាវុធប្រល័យលោកដល់វ៉ៃចូលអ៊ីរ៉ាក់ ឥឡូវអាវុធប្រល័យលោកទីបំផុតនៅឯណា ? ស្លាប់មនុស្សរាប់ម៉ឺននាក់នៅអ៊ីរ៉ាក់» ។
សម្តេចបានដាក់សំណួរថា ៖ «តើជាវត្ថុបំណងចង់ធ្វើដូចឆ្នាំ ១៩៧០ទេ នៅក្នុងការមួលបង្កាច់បែបនេះ ។ កម្ពុជានឹងចិនមានបញ្ហាអ្វីដេលត្រូវចាំបាច់ចុះហត្ថលេខាជាមួយគ្នាលើបញ្ហាកិច្ចព្រមព្រៀងសម្ងាត់ ។ គ្មានត្រូវការចាំបាច់អ្វីសោះ ។ ឥឡូវនិយាយឲ្យត្រង់ទៅ ។ ខ្ញុំកំពុងតែដឹកមកឥឡូវកំពុងដឹកតាមនាវាមកនេះ ។ ឆ្នាំនេះខ្ញុំឲ្យដកលុយជិត៤០លានដុល្លារ ដើម្បីទិញអាវុធមួយចំនួនពីចិនបន្ថែមទៅលើ ២០០លានដុល្លារ ដែលឲ្យពីមុនសម្រាប់ការទិញ ហើយនិង៩០ លានដុល្លារ ដែលឲ្យលើកក្រោយក្នុងពេលដែលខ្ញុំទៅនេះ» ។ ជាមួយគ្នានោះដែរសម្តេចពន្យល់ថា ការទិញអាវុធនេះ គឺចង់ពង្រឹងសមត្ថភាពកងទ័ព ហើយក៏មិនមែនដោយសារតែកម្ពុជា មានការភ័យខ្លាចអ្វីដែរ ។ ព្រោះនៅលើលោកនេះគ្មានប្រទេសណាដែលគ្មានកាំភ្លើងទេ ។
ការទិញក៏ដោយសារតែកាំភ្លើងរបស់កម្ពុជាវារាងចាស់ៗបន្តិច ហើយដូច្នេះការទិញបន្ថែម ប៉ុន្មានម៉ឺនដើមនេះ គឺយកមកស្តុកទុកបំពាក់ ហើយយកអាវុធចាស់ៗទៅជួសជុល ។ ក្នុងឱកាសនោះដែរសម្តេចថា កាលពីឆ្នាំ២០១៨ សម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិបានស្នើថវិកា២៥លានដុល្លារ ដើម្បីទិញអាវុធ ។ ប៉ុន្តែការចំណាយ៤០លានដុល្លារក្នុងឆ្នាំនេះ គឺជាការគិតគូរបស់សម្តេច ។ ជាមួយគ្នានោះដែរសម្តេចបញ្ជាក់ថា ការធ្វើសមយុទ្ធចាប់ពីពេលនេះទៅត្រូវបាញ់គ្រាប់ពិត ដោយមិនគ្រាន់តែឈរតម្រង់ជួរ ហើយអត់គ្រាប់បាញ់នោះទេ ៕ កែសម្រួលដោយ ៖សុឃាក់
ចែករំលែកព័តមាននេះ