ខេត្តប៉ៃលិន ៖ នៅវេលាម៉ោង១២និង៥នាទីថ្ងៃត្រង់ថ្ងៃទី៥ សីហា សព នួន ជា ត្រូវបានដឹកតាមរថយន្តសាមុយមកដល់កន្លែងតម្កល់សពដែលត្រូវបានរៀបចំនៅក្នុងបរិវេណវត្តព្រំគិរីមរកត ក្នុងភូមិផ្សារព្រំជើង ឃុំស្ទឹងកាច់…
ខេត្តប៉ៃលិន ៖ នៅវេលាម៉ោង១២និង៥នាទីថ្ងៃត្រង់ថ្ងៃទី៥ សីហា សព នួន ជា ត្រូវបានដឹកតាមរថយន្តសាមុយមកដល់កន្លែងតម្កល់សពដែលត្រូវបានរៀបចំនៅក្នុងបរិវេណវត្តព្រំគិរីមរកត ក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ។
បើតាមប្រភពព័ត៌មានពីព្រះតេជគុណ វ៉ែន ចាន់សុម៉ៃ ព្រះចៅអធិការវត្តព្រំគិរីមរកត បានឱ្យដឹងថា សពលោក នួន ជា និងធ្វើបុណ្យតាមប្រពៃណីនៅក្នុងវត្ត ដោយកូនចៅនាំគ្នាធ្វើតាមបណ្តាំរបស់គាត់កាលពីនៅរស់ ។ កាលគាត់នៅមានជីវិតបានផ្តាំថា ពេលគាត់អស់ជីវិតទៅ ត្រូវតែយកសពរបស់គាត់ធ្លាប់បូជានៅទីនេះ ព្រោះគាត់ធ្វើបុណ្យទាននៅវត្តនេះតាំងពីដើមមក ។
ប្រភពបន្តថា ម្យ៉ាងវិញទៀត នៅទីធ្លាផ្ទះរបស់គាត់តូចចង្អៀត ពិបាកធ្វើរោងទទួលភ្ញៀវ ខណៈបងប្អូនកូនចៅ និងសាច់ញាតិមកចូលរួមបុណ្យមានគ្នាច្រើន ។ សព នួន ជា នឹងត្រូវតម្កល់រយៈពេល១អាទិត្យរហូតដល់ថ្ងៃទី១១ សីហាទើបបូជា ។ ប្រភពព័ត៌មានពីសាច់ញាតិបានបង្ហើបឱ្យដឹងថា លោក នួន ជា មានកូនចំនួន៣នាក់ ស្រី២ នាក់ ប្រុសម្នាក់ (កូនទី២ទើបតែស្លាប់ថ្មីៗនេះ) ។ ចំណែកប្រពន្ធរបស់គាត់មិនស្គាល់ឈ្មោះនោះទេ មានអាយុប្រហែល៨០ឆ្នាំ នៅមានជីវិតរស់នៅក្នុងខេត្តប៉ៃលិន ។
តាមការសង្កេតនៅកន្លែងធ្វើបុណ្យសព គឺសាមញ្ញធម្មតា បើប្រៀបធៀបនិងពិធីបុណ្យសពលោក អៀង សារី នៅម៉ាឡៃដែលមានការរៀបចំអធឹកអធមជាង ។ ពិតជាមានការលំបាកបំផុត ក្នុងការស្វែងរកព័ត៌មានពីអ្នក ដែលទៅចូលរួម ឬក្រុមសាច់ញាតិ ព្រោះមិនមាននរណាម្នាក់ផ្តល់សម្ភាសន៍ឡើយ ដោយម្នាក់ៗលាក់បាំងមិនហ៊ាននិយាយ ។ (សម្រួលដោយ៖ ស្រីណា)
ចែករំលែកព័តមាននេះ