ខេត្តកំពត ៖ សេចក្តីរាយការណ៍បឋម កម្លាំងការិយាល័យព្រហ្មទណ្ឌកំរិតស្រាលស្នងការដ្ឋានខេត្តកំពតបានឲ្យដឹងថា នៅវេលាម៉ោង៣ទៀបភ្លឺ ថ្ងៃទី០៥ ខែសីហានេះ កម្លាំងសមត្ថកិច្ចនគរបាលនៃស្នងការខេត្តកំពតបានស្ទាក់ចាប់ចោរលួចរថយន្តបានម្នាក់ ដោយរថយន្តម៉ាកលុចស៊ីសមួយគ្រឿង ស្ថិតនៅរមណីយដ្ឋានទឹកឈូ ក្នុងភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូ ខេត្តកំពត ។
សេចក្តីរាយការណ៍បានបន្ត ជនល្មើសមានឈ្មោះ សេង លាង ភេទប្រុស អាយុ២៧ឆ្នាំ មុខរបរជាកម្មករផ្សារដែកជាមួយ ក្រុមហ៊ុនចិននៅកំពង់សោម មានស្រុកកំណើតនៅភូមិស្រែហ៊ុយ ឃុំស្រែហ៊ុយ ស្រុកកោះញែក ខេត្តមណ្ឌលគីរី ។
ប្រភពបានបន្តថា នៅវេលាម៉ោង២១យប់ ថ្ងៃទី០៤ ខែសីហានេះ ម្ចាស់រថយន្តបានទុកសោនៅ ក្នុងរថយន្ត រួចដើរចូលទៅក្នុងផ្សារម៉ាត ដើម្បីទិញឥវ៉ាន់ ឃើញឱកាសល្អជនល្មើសបានលួចរថយន្តដែលម្ចាស់ចតនៅមុខផ្សារម៉ាតចូលទិញឥវ៉ាន់នោះ រួចបើកចេញមកសំដៅខេត្តកំពត ដោយសារតែរថយន្តបានបំពាក់ប្រព័ន្ធ GPS ទើបម្ចាស់រថយន្តបានទូរស័ព្ទទំនាក់ទំនងមកកម្លាំងសមត្ថកិច្ចស្នងការនគរបាលខេត្តកំពត ដើម្បីជួយអន្តរាគមន៍ពួនស្ទាក់ចាប់ជនល្មើស ។
ប្រភពបានបន្តថា ក្រោយទទួលបានពាក្យបណ្តឹងពីម្ចាស់រថយន្តភ្លាមៗនោះ លោកឧត្តមសេនីយទោ ម៉ៅ ច័ន្ទមធុរិទ្ធ ស្នងការខេត្តបានចេញបញ្ជាឲ្យកងកម្លាំងអន្តរាគមន៍ចេញប្រតិបត្តិការពួនស្ទាក់នៅចំណុចដែលម្ចាស់រថយន្តបានរាយការមករហូតឈានទៅចាប់បានជនល្មើសដោយជោគជ័យ ។
ចំណែករថយន្តដែលចោរលួចម៉ាកលុចស៊ីស RX300 ពណ៌ទឹកមាស ពាក់ផ្លាកលេខភ្នំពេញ2T -0748 ។ ប្រភពបានបន្តទៀតថា ក្រោយពីចាប់បានទាំងជនល្មើសទាំងវត្ថុតាងកម្លាំងសមត្ថកិច្ចនគរបាលខេត្តកំពតបានប្រគល់ជូនទៅឲ្យកម្លាំងនគរបាលខេត្តព្រះស៊ីហនុដើម្បីចាត់ការបន្ត ៕ កែសម្រួលដោយ ៖សុឃាក់
ចែករំលែកព័តមាននេះ