រាជធានីភ្នំពេញ៖ កាលពីពេល ថ្មីៗកន្លងមករូបថតរៀបមង្គលការរវាងតារាសម្ដែង លោកពៅ ពិសិដ្ឋ និងតារាចម្រៀងសុខ សីឡាលីន ត្រូវបានចែកចាយតាមហ្វេសប៊ុកធ្វើឲ្យមានការចាប់អារម្មណ៍ខ្លាំង ។ មហាជនហាក់ឆ្ងល់ចំពោះអាពាហ៍ពិពាហ៍របស់តារាល្បីដែលមិនបានដឹងជាមុន…
រាជធានីភ្នំពេញ៖ កាលពីពេល ថ្មីៗកន្លងមករូបថតរៀបមង្គលការរវាងតារាសម្ដែង លោកពៅ ពិសិដ្ឋ និងតារាចម្រៀងសុខ សីឡាលីន ត្រូវបានចែកចាយតាមហ្វេសប៊ុកធ្វើឲ្យមានការចាប់អារម្មណ៍ខ្លាំង ។ មហាជនហាក់ឆ្ងល់ចំពោះអាពាហ៍ពិពាហ៍របស់តារាល្បីដែលមិនបានដឹងជាមុន ហើយស្រាប់តែឃើញរូបថត ?
នៅក្នុងឆ្នាំនេះរាសីរបស់តារាចម្រៀងសុខ សីឡាលីន ឡើងខ្ពស់ត្រដែត ជាក់ស្ដែងនាងត្រូវផលិតកម្មហង្សមាសជ្រើសតាំងជាគណៈកម្មការដាក់ពិន្ទុក្នុងកម្មវិធីប្រឡងចម្រៀងលំដាប់អន្តរជាតិរដូលកាលទី១(X Factor Cambodia)។ ឆ្លងតាមការចាក់ផ្សាយកម្មវិធីប្រឡងនេះប៉ុន្មានសប្តាហ៍កន្លងមក ទស្សនិកជនមើលឃើញថាឡាលីន ជាតារាចម្រៀងមានចំណេះជំនាញនេះខ្ពស់ សក្ដិសមជាអ្នកដាក់ពិន្ទុបេក្ខជនប្រលងចម្រៀង ។ តាំងពីក្លាយជាមេប្រយោគប្រលងចម្រៀងមក នាងសម្បូរការងារខាងក្រៅ ឯតម្លៃការងារទទួលបានឃើញថាឡើងជាងមុនបន្តបន្ទាប់ ក្លាយជាតារាមានហាងឆេងខ្ពស់ដូចតារាលំដាប់ជួរមុខផ្សេងទៀត ។
ទាក់ទិននឹងរូបថតរៀបការនោះ តារាចម្រៀងសុខ សីឡាលីន បញ្ជាក់ថា វាមិនមែនជាការណ៍ពិត នាងមិនបានរៀបការទេ ។ ចំពោះរូបថតដែលនាំឲ្យមានការយល់ច្រឡំនោះ គឺជាការថតសម្រាប់បទចម្រៀងថ្មីរបស់នាងប៉ុណ្ណោះ។ កញ្ញាសុខ សីឡាលីន បានបញ្ជាក់បែបនេះតាមហ្វេសប៊ុក របស់នាង ។
ក្នុងពេលការងារសម្បូរពីមួយថ្ងៃទៅមួយថ្ងៃបែបនេះ សុខ សីឡាលីន មិននឹកនារឿងស្នេហាទេ នាងច្បាមយកឱកាសដែលផ្ដល់ប្រាក់ឲ្យនាងនេះសិន ។ វេលានេះនាងផ្ដោតយកចិត្តទុកដាក់លើការរកប្រាក់ជួយអ្នកផ្ទះជាធំ រឿងស្នេហាមិនចង់និយាយ ។ បើទោះបីជាមិត្តសិល្បៈរៀបការបន្តបន្ទាប់គ្នាក៏ដោយ ក៏នាងមិនខ្ចីច្រណែនទេ តែអបអរសាទរ និងជូនពរជ័យពួកគេឲ្យបានប្រកបដោយសេចក្តីសុខ ។
សុខ សីឡាលីន ធ្លាប់ឆ្លងកាត់ស្នេហ៍មិនសមប្រកបនាពេលកន្លងមក ហើយអាចជាមេរៀនសម្រាប់នាង ។ រហូតមកទល់នេះតារាចម្រៀងសុខ សីឡាលីន នៅតែមានឈ្មោះក្រមុំរូបស្រស់ដោយសារតែក្រោយពេលបែកបាក់ស្នេហ៍ជាមួយតន្ត្រីករល្បីឈ្មោះមក នាងមិនព្រមបើកបេះដូងទទួលយកបុរសណាទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ