រាជធានីភ្នំពេញ៖ គិតត្រឹមឆមាសទី១ នៃឆ្នាំ២០១៩ នេះ កម្ពុជាធ្វើការនាំចេញសម្រេចបាននូវទឹកប្រាក់ជាង៦ប៊ីលានដុល្លារអាមេរិក ខណៈការនាំចូលមកវិញមានជាង១០ប៊ីលានដុល្លារអាមេរិក ធំជាង១០ដងនៃការនាំចេញ ដូច្នេះមានន័យថាការប្រើប្រាស់ចំណាយរបស់កម្ពុជាគឺច្រើនជាងចំណូល។ នេះបើតាមធនាគារជាតិនៃកម្ពុជា (NBC)…
រាជធានីភ្នំពេញ៖ គិតត្រឹមឆមាសទី១ នៃឆ្នាំ២០១៩ នេះ កម្ពុជាធ្វើការនាំចេញសម្រេចបាននូវទឹកប្រាក់ជាង៦ប៊ីលានដុល្លារអាមេរិក ខណៈការនាំចូលមកវិញមានជាង១០ប៊ីលានដុល្លារអាមេរិក ធំជាង១០ដងនៃការនាំចេញ ដូច្នេះមានន័យថាការប្រើប្រាស់ចំណាយរបស់កម្ពុជាគឺច្រើនជាងចំណូល។ នេះបើតាមធនាគារជាតិនៃកម្ពុជា (NBC) ។
យោងតាមរបាយការណ៍របស់ធនាគារជាតិនៃកម្ពុជាបានបង្ហាញឲ្យដឹងថា គិតត្រឹមឆមាសទី១ឆ្នាំ២០១៩ នេះ កម្ពុជាបានធ្វើការនាំចេញផលិតផលទៅបរទេសគិតជាទំហំសាច់ប្រាក់សរុបមានប្រមាណ៦,៨ប៊ីលានដុល្លារអាមេរិក លើទីផ្សារធំៗចំនួន៤ ពោលគឺបាននាំចេញទៅប្រទេសជប៉ុនមាន៧,៧%, ចក្រភពអង់គ្លេសមាន៦,៦%, សហរដ្ឋអាមេរិកមាន២៨% និងតំបន់អឺរ៉ុបមាន២៦,៦%។ ទន្ទឹមនឹងការនាំចេញសរុបមានជាង៦ប៊ីលានដុល្លារអាមេរិកនេះ កម្ពុជានាំចូល ឬក៏ពីតំបន់ធំៗខាងលើបាននាំចូលមកមានទំហំទឹកប្រាក់សរុបដល់១០,៥ប៊ីលានដុល្លារអាមេរិក ក្នុងនោះប្រទេសចិនមាន៤៦%, ថៃមាន១៥,៦%, វៀតណាមមាន១៣,២% និងប្រទេសជប៉ុនមានចំនួន ៤,៥%។
ពាក់ព័ន្ធការធ្វើពាណិជ្ជកម្មរបស់កម្ពុជាក្នុងឆមាសទី១ឆ្នាំ២០១៩កន្លងទៅនេះលោកស្រី ជា សិរី អគ្គនាយកបច្ចេកទេសធនាគារជាតិនៃកម្ពុជាមានប្រសាសន៍នាឱកាសប្រជុំបូកសរុបលទ្ធផលសម្រាប់ឆមាសទី ១ ធ្វើឡើងកាលពីថ្ងៃទី ២៧ កក្កដា ថា «ក្នុងឆមាសទី១ឆ្នាំនេះយើងនាំចេញមានទឹកប្រាក់៦,៨ប៊ីលានដុល្លារអាមេរិក ហើយយើងនាំចូលមាន១០,៥ប៊ីលានដុល្លារអាមេរិក។ ចំណុចនេះបានន័យថាយើងប្រើប្រាស់ចំណាយរបស់យើងច្រើនជាងចំណូល»។ លោកស្រីបានបន្តថា «សេនារីយូដែលល្អ គឺយើងត្រូវធ្វើការនាំចេញឱ្យបានច្រើនជាងការនាំចូល តែក្នុងករណីបច្ចុប្បន្ននេះកំណើនសេដ្ឋកិច្ចយើងខ្ពស់ ហើយតម្រូវការក្នុងស្រុកមានច្រើន ជាហេតុធ្វើឱ្យការនាំចូលមានច្រើន អីចឹងយើងនៅមានឱកាសធ្វើយ៉ាងណាឱកាសជំរុញការនាំចេញរបស់យើងកើនឡើងបន្ថែមទៀត ហើយការនាំចេញមិនត្រូវរំពឹងតែទៅលើវិស័យណាមួយនោះទេ ត្រូវរំពឹងទៅលើគ្រប់វិស័យ»។
តាមធនាគារជាតិនៃកម្ពុជាសេដ្ឋកិច្ចកម្ពុជាបន្តទទួលបានកំណើនខ្ពស់ ដែលគាំំទ្រដោយកំណើនការនាំចេញវិស័យសំណង់ និងអចលនទ្រព្យ និងទេសចរណ៍ ខណៈដែលវិស័យកសិកម្ម បន្តមានកំណើនទាបប៉ុន្តែកើនឡើងសន្សឹមៗ។ វឌ្ឍនៈភាពល្អទាំងនេះរក្សាការរំពឹងទុកថាកំណើនសេដ្ឋកិច្ចនឹងអាចសម្រេចបាន៧,១% នៅឆ្នាំ២០១៩ ក្នុងស្ថានភាពដែលមូលដ្ឋានកំណើនបាននឹងកំពុងត្រូវបានធ្វើពិពិធកម្ម ហើយការកែទម្រង់ស៊ីជម្រៅបន្តអនុវត្តយ៉ាងស្វាហាប់ សំដៅកំណើនវិនិយោគនិងពាណិជ្ជកម្ម។
តាមរបាយការណ៍ ទោះជាយ៉ាងណាសេដ្ឋកិច្ចកម្ពុជាអាចប្រឈមនឹងហានិភ័យខាងក្រៅ ជាពិសេសការកើនឡើងនៃការប្រកួតប្រជែងលើទីផ្សារអន្តរជាតិ ការថយចុះលើសពីការរំពឹងទុកនៃសេដ្ឋកិច្ចចិន និងការប្រែប្រួលតម្លៃដុល្លារអាមេរិកដែលអាចប៉ះពាល់ដល់សមត្ថភាពប្រកួតប្រជែងកម្ពុជា ដោយសារកម្ពុជាមានដុល្លារូបនីយកម្មខ្ពស់៕ កែសម្រួលដោយ ៖សុឃាក់
ចែករំលែកព័តមាននេះ