រាជធានីភ្នំពេញ៖ ធនាគារអភិវឌ្ឍន៍អាស៊ី ហៅកាត់ថា (ADB) បានព្យាករណ៍ពីកំណើនសេដ្ឋកិច្ចកម្ពុជាក្នុងឆ្នាំ ២០១៩ នេះដោយអះអាងថានឹងរក្សាបាននូវភាពរឹងមាំដដែល ពោលគឺក្នុងរង្វង់ ៧ភាគរយ ដែលកំណើនេះ…
រាជធានីភ្នំពេញ៖ ធនាគារអភិវឌ្ឍន៍អាស៊ី ហៅកាត់ថា (ADB) បានព្យាករណ៍ពីកំណើនសេដ្ឋកិច្ចកម្ពុជាក្នុងឆ្នាំ ២០១៩ នេះដោយអះអាងថានឹងរក្សាបាននូវភាពរឹងមាំដដែល ពោលគឺក្នុងរង្វង់ ៧ភាគរយ ដែលកំណើនេះ គឺខ្ពស់ជាងគេបំផុតក្នុងចំណោមបណ្ដាប្រទេសជាសមាជិកអាស៊ាន បន្ទាប់មកគឺប្រទេសវៀតណាមឈរលំដាប់ថ្នាក់បន្ទាប់ ។
យោងតាមរបាយការណ៍របស់ធនាគារអភិវឌ្ឍន៍អាស៊ីបានអោយដឹងថា GDP របស់កម្ពុជានឹងមានអាត្រាកំណើន ៦.៨ភាគរយនៅឆ្នាំ២០២០ ខណៈអតិផរណានឹងមានអាត្រា២.៥ ភាគរយក្នុងឆ្នាំ២០១៩នេះ និងឆ្នាំ២០២០ខាងមុខ ។ លើសពីនេះទៅទៀត GDP សម្រាប់ប្រជាជន កម្ពុជាម្នាក់ក៏ត្រូវបានរំពឹងផងដែរថានឹងមានកំណើន ៤.៤ភាគរយក្នុងឆ្នាំ២០១៩ និង៤.២ភាគរយក្នុងឆ្នាំ២០២០ ។
តាមការព្យាករណ៍របស់ធនាគារអភិវឌ្ឍន៍អាស៊ី ដដែលបានបង្ហាញថាប្រទេសវៀតណាមជាប្រទេសមានកំណើនរីកចម្រើនបន្ទាប់ពីកម្ពុជា ក្នុងនោះវៀតណាមត្រូវបានព្យាករណ៍ថានឹងមានកំណើន៦,៨ភាគរយ មីយ៉ាន់ម៉ា៦,៦ភាគរយ ឡាវ៦,៥ភាគរយ ហ្វីលីពីន៦,៤ភាគរយ ហើយប្រទេសដែលធនាគារអភិវឌ្ឍន៍អាស៊ីព្យាករណ៍ថាមានកំណើនទាបជាងគេនោះគឺប្រទេសព្រុយណេ មានកំណើនត្រឹមតែ១,០ភាគរយប៉ុណ្ណោះក្នុងឆនាំ ២០១៩នេះ ។
ដោយឡែកនៅក្នុងឆ្នាំ ២០២០ខាងមុខនេះធនាគារ ADB បានព្យាករណ៍ថាមីយ៉ាន់ម៉ានិងកម្ពុជា នឹងមានកំនើនសេដ្ឋកិច្ចប្រហាក់ប្រហែលគ្នានិងខ្ពស់ជាងគេនៅក្នុងតំបន់អាស៊ាន គឺប្រមាណ ៦,៨ភាគរយ ហើយកំណើនទាបជាងគេ ក៏ជាប្រទេសព្រុយណេដដែលគឺប្រមាណ១,៥ភាគរយ ហើយសម្រាប់ប្រទេសវៀតណាម និងឡាវក៏នៅរក្សាចំណាត់ថ្នាក់ល្អដដែលគឺលេខ១និងលេខ២ក្នុងតំបន់អាស៊ាន ។ របាយការណ៍ថ្មីមួយរបស់ធនាគារជាតិនៃកម្ពុជា បានបញ្ជាក់ថាសេដ្ឋកិច្ចកម្ពុជានៅតែបន្តភាពរឹងមាំ ដែលគាំទ្រដោយកំណើនវិស័យកាត់ដេរ សំណង់ និងទេសចរណ៍ ផ្គួបផ្សំនឹងការកើនល្បឿនបន្តិច នៃវិស័យកសិកម្ម ។ សេដ្ឋវិទូជាច្រើនបានផ្ដល់ជាមតិ ដល់កម្ពុជាសម្រាប់រក្សាកំណើនសេដ្ឋកិច្ចប្រកបដោយចីរភាព ដោយត្រូវធ្វើពិពិធកម្មសេដ្ឋកិច្ច ផ្លាស់ប្តូរពីការផលិតដែលផ្ដល់តម្លៃបន្ថែមទាបទៅរកការផលិតណាដែលមានតម្លៃខ្ពស់ សម្រាប់បម្រើដល់ការនាំចេញរបស់ខ្លួន ។
លោកបណ្ឌិតម៉ី កល្យាណ ទីប្រឹក្សាជាន់ខ្ពស់ នៃឧត្តមក្រុមប្រឹក្សាសេដ្ឋកិច្ចជាតិកម្ពុជា បានលើកឡើងថា កម្ពុជាត្រូវធ្វើពិពិធកម្មទាំងសេដ្ឋកិច្ច និងទីផ្សារបរទេស ជាក់ស្ដែងកម្ពុជាត្រូវបង្កើនការផលិតថ្មីៗផ្ដល់តម្លៃបន្ថែមខ្ពស់ជាងមុន និងត្រូវស្វែងរកទីផ្សារថ្មីៗបន្ថែមទៀតសម្រាប់ផលិតផលដែលខ្លួនផលិត ។ បើតាមរបាយការណ៍នាំចេញរបស់ក្រសួងពាណិជ្ជកម្មកម្ពុជាបានបង្ហាញថា ទីផ្សារនាំចេញធំជាងគេរបស់កម្ពុជាមានសហភាពអឺរ៉ុប និងសហរដ្ឋអាមេរិក ហើយថ្មីៗនេះដែរកម្ពុជាក៏បាននិងកំពុងចរចារជាមួយភាគី ផ្សេងទៀតដើម្បីទទួលបានការអនុគ្រោះពន្ធ សម្រាប់ការនាំចេញទំនេញដូចជា សហភាពអាស៊ី អឺរ៉ុប និងក្រុមប្រទេសRCEP ជាដើម ។
គួរបញ្ជាក់ថាសេដ្ឋកិច្ចកម្ពុជាក្នុងរយៈពេលប៉ុន្មានឆ្នាំមកនេះ នៅតែរក្សាបាននូវកំណើនគួរអោយកត់សម្គាល់ក្នុងនោះ ៦.៩ភាគរយនៅឆ្នាំ២០១៦ កំណើន៧.០ភាគរយ ឆ្នាំ២០១៧និងមានកំណើន៧.៣ភាគរយ ឆ្នាំ២០១៨ ដោយគាំទ្រដោយវិស័យឧស្សាហម្មកាត់ដេរសម្លៀកបំពាក់ សំណង់ និងទេសចរណ៍ ។ ជាមួយគ្នានេះ ធនាគារពិភពលោក (World Bank) និងមូលនិធិរូបិយវត្ថុពិភពលោក (IMF) សុទ្ធតែបានព្យាករផងដែរថា សេដ្ឋកិច្ចរបស់កម្ពុជា នៅរក្សាកំណើនរង្វង់ជិត៧ភាគរយ ក្នុងឆ្នាំ២០១៩៕កែសម្រួលដោយ ៖សុឃាក់
ចែករំលែកព័តមាននេះ