អង្គការសហប្រជាជាតិ ៖ កាសែតអង់គ្លេសTHE GUARDIANកាលពីថ្ងៃទី៤សីហាបានលាតត្រដាងរបាយការណ៍មួយរបស់អ.ស.បដែលថា ការវាយប្រហារភេរវកម្មថ្មីៗមួយចំនួន អាចកើតមាននាចុងឆ្នាំ២០១៩នេះ។
ការគំរាមកំហែងភេរវកម្មនៅពុំទាន់លុបបំបាត់បានទាំងស្រុងនៅឡើយ។ ចាប់តាំងពីការវាយប្រហារភេរវកម្មនៅក្រុងប៉ារីសនិងក្រុងព្រុចសែលក្នុងឆ្នាំ២០១៥និង២០១៦មក ការវាយប្រហារភេរវកម្មត្រូវបានកាត់បន្ថយយ៉ាងច្បាស់។ ប៉ុន្តែរបាយការណ៍នាពេលថ្មីៗនេះរបស់អ.ស.បអះអាងថា ពួកអ៊ិស្លាមជ្រុលនិយមទោះបីទទួលរងបរាជ័យនាពេលថ្មីៗនេះក្ដី ក៏នៅតែជាការគំរាមកំហែងធ្ងន់ធ្ងរនិងសំខាន់។
ពួកគេអាចពឹងផ្អែកជាពិសេសលើជនបរទេសប្រមាណជា៣០.០០០នាក់ ដែលធ្លាប់ចូលរួមប្រយុទ្ធជួយដល់ក្រុមរដ្ឋអ៊ិស្លាមដែលប្រមុខរបស់គេនៅពុំទាន់មានការអះអាងថាស្លាប់ជាផ្លូវការនៅឡើយ។
ក្នុងចំណោមមនុស្សទាំងនេះមួយចំនួន អាចវិលទៅចូលរួមជាមួយក្រុមអាល់កៃដា ឬក្រុមភេរវកម្មដទៃៗទៀតដែលអាចលេចមុខ។ គ្រៅពីនេះនៅមានពួករ៉ាឌីកាល់និយម។ ពួកអ្នកឯកទេសនៃក្រុមប្រឹក្សាសន្តិសុខ អ.ស.ប បានធ្វើការជាមួយជំនួយរបស់បណ្ដាភ្នាក់ងារសើុបការណ៍ជាច្រើន។ របាយការណ៍បន្តថាការដួលរលំនៃរដ្ឋអ៊ិស្លាមពុំមានន័យថា ជាការបញ្ចប់ការវាយប្រហារភេរវកម្មឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ