រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា មានហេតុការណ៍ភ្ញាក់ផ្អើលមួយបានកើតឡើងកាលពីវេលាម៉ោង១១ព្រឹក ថ្ងៃទី០៥ ខែសីហានេះ ក្នុងផ្សារស៊ិនជូរីផ្លាហ្សារ ភូមិតាងួន សង្កាត់កាកាប១ ខណ្ឌពោធិ៍សែនជ័យ…
រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា មានហេតុការណ៍ភ្ញាក់ផ្អើលមួយបានកើតឡើងកាលពីវេលាម៉ោង១១ព្រឹក ថ្ងៃទី០៥ ខែសីហានេះ ក្នុងផ្សារស៊ិនជូរីផ្លាហ្សារ ភូមិតាងួន សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ខណៈដែលស្ត្រីអ្នកលក់សាច់ជ្រូក២តូបផ្សេងគ្នាស្រែកឆោឡោថា ចោរៗ យ៉ាងកងរំពងពេញក្នុងផ្សារ ។
សេចក្តីរាយការណ៍បានបន្ត ដោយម្នាក់ថា ខ្លួនត្រូវជនសង្ស័យចូលទៅបន្លំលួចលុយអស់៨០ម៉ឺនរៀល និងម្នាក់ទៀតស្រែកថា ខ្លួនក៏បាត់កាបូបមួយ ដែលមានលុយជិត១លានរៀល ព្រមទាំងទូរស័ព្ទម៉ាក iPhone -X ១គ្រឿងផងដែរ ។ ខណៈពេលមានការភ្ញាក់ផ្អើលខាងលើកម្លាំងសន្តិសុខយាមនៅក្នុងផ្សារស៊ិនជូរីផ្លាហ្សារ បានចេញអន្តរាគមន៍ឃាត់ខ្លួនបុរសជាជនសង្ស័យដែលជាជនជាតិចិនម្នាក់ និងបុរសម្នាក់ទៀតជាជនជាតិខ្មែរ ប្រគល់ជូននគរបាលសាកសួរ និងចាត់ការតាមច្បាប់ ។
ដោយជនសង្ស័យដែលត្រូវឃាត់ខ្លួននោះម្នាក់ជាជនជាតិចិន មិនទាន់ស្គាល់អត្តសញ្ញាណ មានអាយុជាង៣០ឆ្នាំ បន្ទាប់ពីក្រុមសន្តិសុខធ្វើការឆែកឆេរបានរកឃើញលុយចំនួន៨០ម៉ឺនរៀល នៅក្នុងកាបូបរបស់គាត់ ដែលជននេះ គឺជាចោរពិតប្រាកដ ។ ចំណែកជនសង្ស័យម្នាក់ទៀតជាជនជាតិខ្មែ ឈ្មោះ សា យី ហៅសឿន អាយុ៣១ឆ្នាំ មានទីលំនៅក្នុងភូមិបាក់ទូក សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ ។ ពេលឆែកឆេរមិនឃើញមានអ្វីដែលគួរឲ្យសង្ស័យឡើយ ហើយកាបូបដែលស្ត្រីអាជីវករម្នាក់ទៀតថា មានលុយជិត១លានរៀល និងទូរស័ព្ទម៉ាកiPhone -X ១គ្រឿងនោះត្រូវបានរកឃើញនៅក្បែរស្ថានីយ៍ប្រេងឥន្ធនៈមួយកន្លែងដែលត្រូវជនសង្ស័យបោះចោល ។
ដោយឡែកស្ត្រីជាអ្នកលក់សាច់ជ្រូកទាំង២នាក់នោះ គឺលក់នៅតូប២ផ្សេងគ្នា ប៉ុន្តែស្ថិតនៅក្នុងផ្សារតែមួយ ហើយទី១ នៅមិនទាន់ត្រូវបានស្គាល់នៅឡើយទេ គាត់មានអាយុប្រហែលជាង៣០ឆ្នាំ ហើយលុយរបស់គាត់ចំនួន៨០ម៉ឺនរៀល ត្រូវបានរកឃើញនៅក្នុងកាបូបជនសង្ស័យជាជនជាតិចិន ។ រីឯទី២- ឈ្មោះ ទូច ស្រីនិច អាយុ២៨ឆ្នាំ មានទីលំនៅក្នុងភូមិដីថ្មី សង្កាត់គោកឃ្លាង ខណ្ឌសែនសុខ ហើយកាបូបលុយរកឃើញវិញនៅក្បែរស្ថានីយប្រេងឥន្ធនៈ ។
ស្ត្រីទី១ បានឲ្យដឹងថា នៅមុនកើតហេតុជនជាតិចិនម្នាក់ខាងលើបានចូលទៅសុំដូរលុយ៥០ដុល្លារ ដោយសុំយកតែប្រាក់រៀលសុទ្ធ ហើយខណៈដែលគាត់កំពុងរវល់រាប់លុយរាយៗ ស្រាប់តែជនជាតិចិននោះប្រាប់ថា ឈប់ដូរវិញហើយភ្លាមៗនោះគាត់ក៏បានហុចលុយ៥០ដុល្លារនោះឲ្យវិញ ។ បន្ទាប់មកបុរសជជាតិចិនសង្ស័យខាងលើបានដើរចេញទៅបាត់ទើបគាត់ដឹងថា បាត់លុយ១ដុំចំនួន៨០ម៉ឺនរៀលក៏មានការឆោឡោ ហើយគាត់ក៏ស្ទុះចុះរត់ដេញតាមជនជាតិចិនដែលកំពុងរត់គេចចេញទៅតាមផ្លូវលេខ២០០៤ ខាងក្រោយផ្សារស៊ិនជូរីផ្លាហ្សារ ។ ប៉ុន្តែភ្លាមៗនោះក្រុមសន្តិសុខ រួមជាមួយប្រជាពលរដ្ឋ នាំគ្នាជួយដេញតាមចាប់ឃាត់ខ្លួនបាន រួចហើយនាំចូលទៅកាន់ទីស្នាក់ការផ្សារ រួចទើបប្រគល់ជូននគរបាលនាំទៅសាកសួរបន្តទៀត ។
ចំណែកស្ត្រីទី២- ឈ្មោះ ទូច ស្រីនិច បានឲ្យដឹងថា នៅមុនកើតហេតុ ខណៈដែលគាត់កំពុងលក់ដូរ ស្រាប់តែមានជនជាតិចិនម្នាក់ផ្សេងទៀត មិនមែនជនជាតិចិនដែលត្រូវចាប់ខ្លួនខាងលើនេះទេ រួម និងបុរសសង្ស័យដែលជាជនជាតិខ្មែរម្នាក់សាយី ហៅ សឿន ខាងលើនេះបានចូលទៅរកទិញសាច់ជ្រូក ដោយទិញបន្តិចម្ដងៗ សរុបចំនួន៤លើក ហើយខណៈដែលគាត់រវល់តែលក់សាច់ជ្រូកភ្លេចខ្លេចខ្លួន ស្រាប់តែបាត់កាបូបលុយ ។ ដែលនៅក្នុងកាបូបនោះមានលុយជិត១លានរៀល ទូរស័ព្ឌ I phone x មួយគ្រឿង រីឯជនសង្ស័យទាំងចិន និងខ្មែរបានបាត់ខ្លួនដែរទើបបង្កឲ្យមានការភ្ញាក់ផ្អើលឆោរឡោ ស្របពេលជាមួយនឹងករណីទី១ដែរ ហើយគាត់ក៏ស្ទុះរត់តាមស្វែងរក ស្រាប់តែប្រទះឃើញបុរសជនជាតិខ្មែរម្នាក់ខាងលើទើបចាប់ខ្លួននាំទៅទៅសាកសួរនៅទីស្នាក់ការផ្សារ បន្ទាប់មកប្រគល់ជូននគរបាល ចំណែកជនសង្ស័យជាជនជាតិចិនម្នាក់ទៀតរត់គេចខ្លួនបាត់ ។
ក្រោយពេលចាប់ខ្លួនសន្តិសុខបានឆែកឃើញលុយ១ដុំចំនួន៨០ម៉ឺនរៀល នៅក្នុងកាបូបរបស់ជនសង្ស័យជាជនជាតិចិន ចំណែបុរសជនជាតិខ្មែរមិនមានអ្វីនៅជាប់ខ្លួននោះទេ ដោយកាបូបលុយរបស់ស្ត្រីទី២ដែលបាត់ គឺត្រូវបានរកឃើញនៅជិតស្ថានីយប្រេងឥន្ធនៈមួយនៅក្បែរផ្សារនោះដែរ ។ មិនតែប៉ុណ្ណោះជនសង្ស័យជាជនជាតិខ្មេរបានបដិសេធន៍ថា គាត់មិនដែលស្គាល់ជនជាតិចិនរូបនេះឡើយ ហើយក៏មិនបានលួចកាបូបលុយនោះដែរតែ គាត់ពិតជាបានចូលទៅទិញសាច់ជ្រូកពិតប្រាកដមែន គាត់មិនប្រកែកថា មិនបានចូលទៅទិញសាច់ជ្រូកនោះទេ។ពេលនេះនគរបាលបានកំពុងធ្វើការសាកសួរ ដើម្បីកសាងសំណុំរឿងចាត់ការតាមច្បាប់ហើយដែរ ៕ កែសម្រួលដោយ ៖ សុឃាក់
ចែករំលែកព័តមាននេះ