ប្រទេសអុីរ៉ង់ ៖ ប្រទេសអុីរ៉ង់ប្រកាសនាថ្ងៃទី៤សីហាថា បានចាប់នាវាដឹកប្រេងបរទេសមួយគ្រឿងទៀតក្នុងឈូងសមុទ្រពែរ្ស៍ ជានាវាដឹកប្រេងទី៣ដែលប្រទេសនោះចាប់ ក្នុងអំឡុងពេលមិនដល់មួយខែផង ក្នុងតំបន់យុទ្ធសាស្ត្រនេះខណៈកំពុងមានភាពតានតឹងខ្លាំងរវាងក្រុងតេហេរ៉ង់និងក្រុងវ៉ាស៊ិនតោន។
យោងតាមសេចក្ដីប្រកាសមួយកងកម្លាំងឆ្មាំបដិវត្តន៍អុីរ៉ង់និយាយថា កងកម្លាំងជើងទឹករបស់ខ្លួនបានចាប់នាវាដឹកប្រេងមួយដែលពុំទាន់បង្ហាញថាជារបស់ប្រទេសណានៅឡើយ។ជនបរទេស៧នាក់ជាសមាជិកក្រុមនាវិកនៃនាវានេះបានត្រូវចាប់ខ្លួន ក្នុងឱកាសនៃប្រតិបត្តិការមួយ។
នាវានោះដឹកប្រេងរត់ពន្ធប្រមាណ៧០០.០០០លីត្រ នៅជុំវិញកោះFARSIភាគខាងជើងឈូងសមុទ្រ ហើយបើកសំដៅទៅកាន់ប្រទេសអារ៉ាប់នៃតំបន់នោះ។ ក្រោយការចាប់នាវានេះត្រូវបាននាំមកកាន់កំពង់ផែBOUCHEHR ហើយប្រេងរត់ពន្ធប្រគល់ឲ្យដល់អាជ្ញាធរ ដោយសហការជាមួយតុលាការអុីរ៉ង់។
នេះជានាវាដឹកប្រេងទី៣ដែលអុីរ៉ង់ចាប់ តាំងពីថ្ងៃទី១៤កក្កដាមក ក្នុងឈូងសមុទ្រពែរ្ស៍ ជាកន្លែងដែល១ភាគ៣នៃការដឹកប្រេងតាមសមុទ្រត្រូវកាត់តាមទីនោះ។ ថ្ងៃទី១៤កក្កដាអុីរ៉ង់បានចាប់នាវាដឹកប្រេងមួយដោតទង់ជាតិប៉ាណាម៉ា គឺនាវាMT RIAHដោយចោទថាដឹកប្រេងរត់ពន្ធដែរ។ រួចនាថ្ងៃទី១៩កក្កដាអីុរ៉ង់បានចាប់នាវាដឹកប្រេងស៊ុយអែត ដោតទង់ជាតិអង់គ្លេសឈ្មោះSTENA IMPERO ១៥ថ្ងៃបន្ទាប់ពីអង់គ្លេសចាប់នាវាដឹកប្រេងអុីរ៉ង់ឈ្មោះGRACE 1 ចោទថារំលោភបំពានទណ្ឌកម្មអឺរ៉ុប៕ (កែសម្រួលដោយ ៖ បុប្ផា)
ចែករំលែកព័តមាននេះ