រាជធានីភ្នំពេញ៖ រថយន្តដឹកដីមួយគ្រឿងបានបើកបុករុញរថយន្តម៉ាកកូរ៉ូឡាមួយគ្រឿងអូសទទឹងផ្លូវ ប្រមាណជាង២០ម៉ែត្រ តែសំណាងល្អពុំបណ្តាលអោយអ្នកបើកបររថយន្តម៉ាកកូរ៉ូឡាពុំមានរងរបួសឡើយ។
គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោងប្រមាណ១១និង៣០នាទីព្រឹកថ្ងៃទី៥ ខែសីហា ឆ្នាំ២០១៩ នៅតាមផ្លូវលេខ៥៩៨ ខាងជើងស្នងការដ្ឋាននគរបាលរាជធានីភ្នំពេញ ស្ថិតក្នុងភូមិ ខ.១ សង្កាត់ច្រាំងចំរេះទី២ ខណ្ឌឬស្សីកែវ។
រថយន្តដឹកដីមួយគ្រឿងខាងលើម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣A-៤៣០៥ បើកបរដោយបុរសម្នាក់ពុំស្គាល់អត្តសញ្ញាណឡើយ ។ ចំណែករថយន្តមួយគ្រឿងម៉ាកកូរ៉ូឡា ស៊េរីឆ្នាំ១៩៩៦ ពណ៌ស្លែ ពាក់ស្លាកលេខ ភ្នំពេញ ២D-៥៥៨៩ បើកបរដោយលោកវរៈសេនីយ៍ សួស សុវណ្ណារ៉ា ជាមន្ត្រីយោធា មានលំនៅសង្កាត់ព្រែកព្នៅ ខណ្ឌព្រែកព្នៅ។
តាមប្រភពពីសាក្សីបានអោយដឹងថា នៅមុនពេលកើតហេតុ គេឃើញរថយន្តទាំង២គ្រឿងធ្វើដំណើរក្នុងទិសដៅស្របគ្នាពីត្បូងទៅជើង លុះពេលធ្វើដំណើរមកដល់កន្លែងកើតហេតុខាងលើ ស្រាប់តែរថយន្តដឹកដីដែលនៅខាងឆ្វេងដៃក៍បានបុករួចរុញរថយន្តម៉ាកកូរ៉ូឡាផ្នែកខាងក្រោយ បណ្តាលអោយរថយន្តម៉ាកកូរ៉ូឡានោះទៅទទឹងផ្លូវពីមុខ ហើយត្រូវរថយន្តដឹកដីបុកអូសទទឹងផ្លូវប្រមាណជាង២០ម៉ែត្រទើបឈប់ បណ្តាលអោយរថយន្តកូរ៉ូបែកកញ្ចក់ក្រពឹតជាប់។
តាមប្រភពព័ត៌មានអោយដឹងបន្តថា ក្នុងគ្រោះថ្នាក់ចរាចរណ៍ខាងលើ ពុំបណ្តាលអោយមនុស្សណាម្នាក់រងរបួសឡើយ ដោយអ្នកបើកបររថយន្តកូរ៉ូឡាបានរំកិលខ្លួនទៅខាងស្តាំដៃគេផុតពីគ្រោះថ្នាក់។
តាមប្រភពពីលោកវរៈសេនីយ៍ សួស សុវណ្ណារ៉ា ជាម្ចាស់រថយន្តកូរ៉ូឡា បានអោយដឹងថា នៅមុនពេលកើតហេតុ គាត់បានចេញពីធ្វើការនៅអគ្គបញ្ជាការដ្ឋានកងខេមរភូមិន្ទ (ដេអិន) គោលបំណងបើករថយន្តត្រឡប់ទៅផ្ទះ លុះពេលកំពុងធ្វើដំណើរ ស្រាប់តែរថយន្តដឹកដីមកបុករថយន្តគាត់ពីក្រោយហើយរុញទៅទទឹងផ្លូវបុកអូសតែម្តង។
ដោយឡែកអ្នកបើកបររថយន្តដឹកដីបានអោយដឹងថា មកពីរថយន្តកូរ៉ូឡាបើកចេញកាត់ពីមុខ។
ក្រោយកើតហេតុ នគរបាលក៏បានចុះទៅវាស់វែងនៅកន្លែងកើតហេតុ រួចនាំយករថយន្តទាំង២គ្រឿងបញ្ជូនទៅកាន់ការិយាល័យចរាចរណ៍ផ្លូវគោក ដើម្បីធ្វើការដោះស្រាយផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ