ខេត្តមណ្ឌលគិរី ៖ ដីកាកោះ ដែលចេញដោយព្រះរាជអាជ្ញាអមសាលាដំបូងខេត្តមណ្ឌលគិរី យ៉ាងហោចណាស់ មានមនុស្ស២០នាក់ដែលពាក់ព័ន្ធនឹងបទល្មើសព្រៃឈើ ត្រូវបានកោះហៅឲ្យចូលបំភ្លឺ នៅអំឡុងខែសីហានេះ នៅសាលាដំបូងខេត្ត ។ នេះបើយោងតាមប្រភពព័ត៌មានបានឱ្យដឹងនៅថ្ងៃទី៤ សីហា ។
ដីកាកោះហៅនេះ បានចុះហត្ថលេខាដោយ លោក ហៀង សុភក្ត្រ ព្រះរាជអាជ្ញានៃអយ្យការអមសាលាដំបូង ខេត្តមណ្ឌលគិរី ។ អ្នកទាំង២០នាក់ដែលត្រូវបានកោះហៅឱ្យចូលបំភ្លឺ បើយោងតាមដីកាបញ្ជាឱ្យចូលខ្លួននេះខ្លះមុនថ្ងៃទី២៤ សីហា និងខ្លះមុនថ្ងៃទី៣០ សីហា ហើយការចូលបំភ្លឺនេះមានតែប្រធានក្រុមហ៊ុនប៉ាស៊ីហ្វិកឡូធើស ឱ្យចូលបង្ហាញខ្លួននៅអយ្យការអមសាលាដំបូងនិងក្រៅពីនេះឱ្យបង្ហាញខ្លួននៅទីបញ្ជាការកងរាជអាវុធហត្ថខេត្ត ។ ជនទាំង២០នាក់ដែលបានកោះហៅនេះមាន៖
១-ឈ្មោះ ស្រ៊ុន ម៉េងលាង ភេទប្រុស អាយុ៥៨ឆ្នាំ ជាម្ចាស់ក្រុមហ៊ុន ម៉េងលាង ។
២-ឈ្មោះ គង់ វិរៈ អាយុ៤៦ឆ្នាំ ជានាយកផ្នែករដ្ឋបាលព្រៃឈើ កោះញែក ។
៣-ឈ្មោះ តុប វីរដា ភេទប្រុស ជាម្ចាស់ក្រុមហ៊ុនវិជ្ជរី ។ ឈ្មោះនេះជាឈ្មួញឈើល្បីដុះស្លែយូរហើយ ។
៤-ឈ្មោះ យិន ហ្គ័រហុង ភេទប្រុស ជនជាតិចិន ជានាយកប្រតិបត្តិក្រុមហ៊ុន ចាន់ វួច (ខេមបូឌា) ខូលអិលធីឌី ។
៥-ឈ្មោះ វ៉ាង ភេទប្រុស អាយុ៥០ឆ្នាំ ជនជាតិវៀតណាម ជាម្ចាស់ហ៊ុនរោងសន្និធិ ។
៦-ឈ្មោះ ឆុន ផាន្និត ភេទប្រុស អាយុ៤០ឆ្នាំ ។
៧-ឈ្មោះ ចាង វិនតាវ ជនជាតិចិន ជានាយកក្រុមហ៊ុន យ៉ានចាវ (ខេមបូឌា) ។
៨-ឈ្មោះ ហាន ម៉ាប់ ភេទប្រុស អាយុ៥២ឆ្នាំ ។
៩-ឈ្មោះ សាំង សុខុន ភេទប្រុស អាយុ២៧ឆ្នាំ ជាអ្នកចាត់ចែង របស់ក្រុមហ៊ុនម៉ាស្ទ័រខេសាន់ ។
១០-ឈ្មោះ ណេង ម៉ៅ ភេទប្រុស អាយុ៥០ឆ្នាំ ជាអ្នកចាត់ចែងប្រមូលឈើ របស់ក្រុមហ៊ុនម៉ាស្ទ័រខេសាន់។
១១-ឈ្មោះ Nguyen Thai Son ជាអគ្គនាយកក្រុមហ៊ុន ប៉ាស៊ីហ្វិកឡូធើស ។
១២-ឈ្មោះ តុប ផាន់ណា ភេទប្រុស ជាអ្នកតំណាងឲ្យក្រុមហ៊ុនវិជ្ជរី ។
១៣-ឈ្មោះ សួន គឹមហេង ភេទស្រី អាយុ៦០ឆ្នាំ ជាម្ចាស់រោងសន្និធិ ។
១៤-ឈ្មោះ វន់ ប៊ុនថៃ ភេទប្រុស កើតឆ្នាំ១៩៦៤ ។
១៥-ឈ្មោះ លឿង ភិរុណ ភេទប្រុស អាយុ៥៥ឆ្នាំ ។
១៦-ឈ្មោះ PHAM QUOC LONG ភេទប្រុស អាយុ៦០ឆ្នាំ ជនជាតិវៀតណាម ជានាយកក្រុមហ៊ុន ផេស៊ីហ្វិកហ្គ្រេន ។
១៧-ឈ្មោះ Nguyen Manh Tham ភេទប្រុស អគ្គនាយកក្រុមហ៊ុន ប៉ាស៊ីហ្វិកភើល និងជាអគ្គនាយកក្រុមហ៊ុន ប៉ាស៊ីហ្វិក ។
១៨-ឈ្មោះ ម៉េង គ្រី ភេទប្រុស អាយុ៣៨ឆ្នាំ មុខរបរជាមេការឲ្យក្រុមហ៊ុន វិជ្ជរី ។
១៩-ឈ្មោះ ប៊ិញ ភេទប្រុស អាយុ៥០ឆ្នាំ ជនជាតិវៀតណាម ជាម្ចាស់ហ៊ុនរោងសន្និធិ (អ្នកផ្តល់លុយដំណើរការរោងសន្និធិ) ។
២០-ឈ្មោះ ឃុន ឈៀង ភេទប្រុស កើតឆ្នាំ១៩៤៣ ។
អាជ្ញាធរនិងសមត្ថកិច្ចថ្នាក់ខេត្តពង្រឹងការរក្សាការពារវត្ថុតាង
ក្រោយយុទ្ឋនាការបង្ក្រាបការកាប់ឈើយ៉ាងរង្គាលនៅស្រុកកោះញែក និងរឹបអូសឈើបានរាប់ពាន់ម៉ែត្រគូប និងមនុស្សជាច្រើននាក់បញ្ជូនទៅពន្ឋនាគារខេត្តមណ្ឌលគិរី កាលពីថ្ងៃទី៣ ខែសីហា លោក សុក សេរ៉ា នាយករងរដ្ឋបាលសាលាខេត្តមណ្ឌលគិរី ដឹកនាំក្រុមការងារជំនាញ ចុះត្រួតពិនិត្យឈើ និងវត្ថុតាងនៅតាមក្រុមហ៊ុននានា ក្នុងស្រុកកោះញែក ដែលគណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិចុះបង្ក្រាបកន្លងមក ។
លោក សុក សេរ៉ា បានបញ្ជាក់ថា បន្ទាប់ពីក្រុមការងារគណៈកម្មាធិការថ្នាក់ជាតិ បានចុះបង្ក្រាប លោក ស្វាយ សំអ៊ាង អភិបាលខេត្ត បានយកចិត្តទុកដាក់គិតគូរ និងរក្សាការពារឈើ និងវត្ថុតាង ដែលរឹបអូសបាននៅតាមក្រុមហ៊ុននានា ជាពិសេស បានដាក់កងកម្លាំង មានអាវុធ នគរបាល និងមន្ត្រីរដ្ឋបាលព្រៃឈើ ដើម្បីការពារវត្ថុតាងទាំងនោះផងដែរ ។
សូមរំឮកថា ចាប់ពីដើមខែកក្កដា ២០១៩ គណៈកម្មាធិការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានចាប់ខ្លួនឧកញ៉ា ស៊ឹង សំអុល និងមន្ត្រីជំនាញព្រៃឈើប្រចាំនៅស្រុកកោះញែកបីនាក់ រួមនឹងអ្នកពាក់ព័ន្ធជាង១០នាក់ទៀត បញ្ជូនទៅសាលាដំបូងខេត្តមណ្ឌលគិរីដើម្បីដំណើរការសំណុំរឿងបទល្មើសបំផ្លាញព្រៃឈើ ។ មនុស្សទាំងអស់ខាងលើនេះរកស៊ីបំផ្លាញព្រៃឈើ ឃុបឃិតគ្នាបំផ្លាញ ក្លាយជាអ្នកមាន ខ្លះមានសណ្ឋាគារប្រណីតៗយ៉ាងសុខសាន្ត ។ លុះដល់អាជ្ញាធរលេងធម៌ក្តៅទើបម្នាក់ៗបានដឹងខ្លួន ហើយមួយជីវិតដូចពាក្យចាស់ថា លួចបានវាគ្រាន់ ដល់ម្ចាស់គេទាន់វាក្រែលអុីចឹងហើយ ។
មុននេះអាជ្ញាធរស្រុកអូររាំង ក្រោមការបញ្ជាពីគណៈកម្មាធិការ បង្ក្រាបបទល្មើសធនធានធម្មជាតិថ្នាក់ជាតិ បានដុតកម្ទេចចោល រថយន្តដែលជាមធ្យោបាយដឹកបទល្មើសធនធានធម្មជាតិ ក្រោយការបង្ក្រាបបានកាលពីថ្ងៃទី៣១ កក្កដាកន្លងទៅក្នុងភូមិសាស្ត្រភូមិអណ្តូងក្រឡឹង ឃុំសែនមនោរម្យ ស្រុកអូររាំងខេត្តមណ្ឌលគិរី ។
លោក សូ សំអាត មេបញ្ជាការកងរាជអាវុធហត្ថស្រុកអូរាំងបានឲ្យដឹងថា រថយន្តល្មើស ត្រូវបានសមត្ថកិច្ចចាប់ ខណៈពេលដឹកឈើបេងចំនួន៥៦ដុំ ដែលស្មើនិង០,៩៦៧ម៉ែត្រគូប ។ លោកថា រថយន្តនេះម៉ាកកាមរីគូទប៉ោង ចង្កូតឆ្វេង ពុំមានស្លាកលេខ ហើយម្ចាស់បានរត់គេចខ្លួនពេលសមត្ថកិច្ចធ្វើប្រតិបត្តិការបង្ក្រាប ។ លោកមេបញ្ជាការបញ្ជាក់ថា ឈើត្រូវដឹកទៅរក្សាទុកនៅសង្កាត់រដ្ឋបាលព្រៃឈើអូរាំង ។
ដោយឡែក រថយន្តត្រូវយកទៅដុតកម្ទេចចោលកាលពីម៉ោងជាង៩ព្រឹកថ្ងៃទី២ សីហា ។ ក្នុងខេត្ត មណ្ឌល គិរីតាមសេចក្តីរាយការបឋមបានបង្ហាញថា រថយន្តដឹកបទល្មើសធនធានធម្មជាតិទ្រង់ទ្រាយធំ(ប៉ាកុង)ចំនួន៣២គ្រឿង ត្រូវបានដុតចោលរួចរាល់ ។ ជាមួយគ្នានោះ រថយន្តធុនតូចក្នុងស្រុកកែវសីមាចំនួន៣គ្រឿង និងស្រុកអូររាំង១គ្រឿង ក៏ត្រូវដុតកម្ទេចចោលដូចគ្នាដែរ ៕ (សម្រួលដោយ៖ ស្រីណា)
ចែករំលែកព័តមាននេះ