បន្ទាប់ពីលេចធ្លាយវីដេអូដែលទាក់ទងទៅនឹងលោកម្ចាស់តាក់ស៊ីសុំលាចាកសិក្ខាបទ(សឹក)នៅថ្ងៃចន្ទនេះព្រោះតែបញ្ហាសុខភាពភ្លាម បណ្តាមហាជននៅក្នុងបណ្តាញសង្គមបានបញ្ចេញមតិគួរខ្លះមិនគួរខ្លះ ដែលមតិភាគច្រើនបានវាយប្រហារដោយប្រើពាក្យសម្តីបែបមិនគប្បីទៅលើលោកម្ចាស់ដោយមិនសំចៃមាត់ថា បួសបែបយកព្រះពុទ្ធសាសនាទៅលេងសើច ។
ចំពោះមតិខាងលើហាក់ដូចជារសើបដែរ ព្រោះបើយោងទៅលើជីវិតអ្នកបួសស្ទើរតែគ្រប់ជំនាន់ កម្រនឹងលាចាកសិក្ខាបទនៅក្នុងរដូវចាំវស្សាណាស់ បើទោះជាមានទុក្ខធំយ៉ាងក៏ដោយ វៀរលែងតែព្រះសង្ឃអង្គនោះត្រូវអាបត្តិបារាជិក ឬត្រូវទោសនាសនង្គៈ ដែលជាទោសធំបំផុតតាមផ្លូវវិន័យ នោះនឹងមិនអាចទុកអ្នកបួសរូបនោះឱ្យនៅគ្រងចីវរបន្តទៀតបានឡើយ ត្រូវតែផ្សឹកចេញជាបន្ទាន់ ។
ប៉ុន្តែបើសឹកព្រោះរោគាពាធ(ជំងឺ)គឺកម្រនឹងកើតមានណាស់ ព្រោះចាស់បុរាណលោកប្រកាន់ខ្លាំងនៅក្នុងរដូវកាន់វស្សា តែបើតាមទ្រឹស្តីព្រះពុទ្ធសាសនាមិនមានខុសឆ្គងអ្វីទេ ។ នេះមានន័យថា មិនមែនលោកម្ចាស់តាក់ស៊ីប្រព្រឹត្តខុសទៅនឹងធម៌វិន័យអ្វីទេ តែដោយសារមិនអាចទ្រាំទ្រនឹងជំងឺដ៏ធ្ងន់ធ្ងរបានទើបព្រះគុណម្ចាស់សុំសឹកទាំងក្នុងវស្សាបែបនេះ ។
គេនៅចាំបានថា លោកម្ចាស់តាក់ស៊ីដែលមុននឹងបួសបានពោលប្តេជ្ញាថានឹងបូជាជីវិតក្នុងភេទជាបព្វជិតអស់មួយជីវិតគឺលែងវិលត្រឡប់មកជាគ្រហស្ថវិញឡើយ ។ ប៉ុន្តែបន្ទាប់ពីបួសបានត្រឹមតែមួយរយៈពេលខ្លីប៉ុណ្ណោះ អ្វីៗត្រូវប្តូរផ្លាស់ ផ្លាស់ប្តូរទាំងស្រុងដោយលោកម្ចាស់បានចេញមកចម្រើនពរ ប្រកាសតាមរយៈវីដេអូដែលបង្ហោះនៅលើបណ្តាញសង្គមថា នឹងលាចាកសិក្ខាបទនៅថ្ងៃចន្ទនេះហើយ ព្រោះមិនអាចទ្រាំទ្រនឹងជំងឺរួមរឹតរាងកាយបាន គឺសឹកត្រឹមត្រូវតាមធម៌វិន័យ ។
ទោះជាយ៉ាងណាង នេះជាដំណឹងអកុសលមួយដែលធ្វើឱ្យមហាជនអ្នកគោរពរាប់អានព្រះពុទ្ធសាសនាមានការខកចិត្តយ៉ាងខ្លាំង តែជាដំណឹងយ៉ាងរសើបសម្រាប់អ្នកដែលតែងតែមើលស្រាលដល់សង្គមសង្ឃដោយប្រើពាក្យសម្តីបែបគួរខ្លះមិនគួរទៅលើវិស័យព្រះពុទ្ធសាសនាមួយនេះ ។
ចែករំលែកព័តមាននេះ