ប្រទេសរុស្ស៊ី ៖ មនុស្សយ៉ាងតិចជាង៨០០នាក់ត្រូវបានចាប់ខ្លួនកាលពីថ្ងៃទី៣សីហា ក្នុងឱកាសនៃបាតុកម្មថ្មីមួយទាមទារឲ្យមានការបោះឆ្នោតដោយសេរីនៅក្រុងមូស្គូ ខណៈអាជ្ញាធរបានបង្កើនការគាបសង្កត់លើពួកប្រឆាំង ដោយធ្វើការស៊ើបអង្កេតលើការលាងលុយកខ្វក់ប្រឆាំងចលនារបស់មេដឹកនាំប្រឆាំងសំខាន់លោកអាឡិចសីណាវ៉ាល់នី។
យោងតាមអង្គការក្រៅរដ្ឋាភិបាលOVD-INFO មានឯកទេសក្នុងការតាមដានការចាប់ខ្លួននិងសកម្មភាពរបស់ប៉ូលិសថា មនុស្ស៨២៨នាក់បានត្រូវចាប់ខួន ក្នុងឱកាសនៃបាតុកម្មគ្មានការអនុញ្ញាតនោះ ទាមទារឲ្យការបោះឆ្នោតមូលដ្ឋាននាថ្ងៃទី៨កញ្ញានៅក្រុងមូស្គូ មានបេក្ខជនរបស់ពួកប្រឆាំងចូលរួម។ ការចាប់ខ្លួននោះកើតមាន បន្ទាប់ពីសកម្មភាពតវ៉ាមួយទៀតដែលត្រូវបង្រា្កបកាលពីចុងសប្ដាហ៍កន្លងទៅ ដោយមានការចាប់ខ្លួនមនុស្សជិត១.៤០០នាក់។ នេះជាការបង្ក្រាបពុំធ្លាប់ដែលឃើញ ចាប់តាំងពីការវិលត្រឡប់កាលពីឆ្នាំ២០១២របស់លោកវ្ល៉ាឌីមៀរពូទីន មកកាន់វិមានក្រឹមឡាំងវិញ។ អាជ្ញាធរលើកនេះហាក់ដូចជាប្ដេជ្ញាចិត្តកម្ទេចចលនាតវ៉ា។
យោងតាមប៉ូលិសថា មនុស្សប្រមាណជា១.៥០០នាក់បានចូលរួម ក្នុងការប្រមូលផ្ដុំគ្នាមួួយ ហើយប៉ូលិសបានបង្ក្រាបជាមួយការចាប់ខ្លួនមនុស្សច្រើនរយនាក់។ បាតុកម្មនោះធ្វើដោយគ្មានអ្នកដឹកនាំ ព្រោះបណ្ដាមេខ្លោងស្ទើរទាំំងអស់ត្រូវបានចាប់ឃុំឃាំង ចាប់តាំងពីការតវ៉ាពីចុងសប្ដាហ៍មុនមក៕ (កែសម្រួលដោយ ៖ បុប្ផា)
ចែករំលែកព័តមាននេះ