សហរដ្ឋអាមេរិក ៖ ខ្មាន់កាំភ្លើងម្នាក់កាលពីថ្ងៃទី៣ ខែសីហា បានបាញ់ប្រហារក្នុងផ្សារទំនើបមួយក្នុងទីក្រុង EL PASO រដ្ឋតិចសាស់ភាគខាងត្បូងអាមេរិក ដោយសម្លាប់មនុស្ស២០នាក់មុនពេលត្រូវចាប់ខ្លួន។
យោងតាមប៉ូលិសថាការបាញ់ប្រហារដែលកើតមាននាពេលព្រឹក នៅច្រកចូលនៃផ្សារទំនើបWALMART ក្រៅពីអ្នកស្លាប់មនុស្ស២៦នាក់ទៀតក៏រងរបួសដែរ ក្នុងនោះមួយចំនួននាយប់ថ្ងៃទី៣សីហាស្ថិតក្នុងស្ថានភាពដុនដាប។
ប៉ូលិសនិយាយថាខ្មាន់កាំភ្លើងជាយុវជនស្បែកសម្នាក់អាយុ២១ឆ្នាំ ដែលអាចមានទំនាក់ទំនងជាមួយបទឧក្រិដ្ឋដោយសារអំពើចងកំហឹងឬចងអាឃាត។ នៅសហរដ្ឋអាមេរិកការវាយប្រហារបែបនោះ ចាត់ទុកជាការវាយប្រហារដែលសំដៅប្រឆាំងមនុស្ស ជាគោលដៅនៃការស្អប់ប្រកាន់ពណ៌សម្បុរ ប្រភពដើមរបស់មនុស្សឬសាសនាដែលគេមិនចូលចិត្ត។
អភិបាលរដ្ឋតិចសាស់លោកGREG ABBOTT ក្នុងសន្និសីទសារព័ត៌មានមួយថ្លែងថា នេះជាទិវាដ៏សោកសៅមួយសម្រាប់បណ្ដាអ្នកដែលដើរផ្សារ ហើយជួបប្រទះនឹងការបាញ់ប្រហារយ៉ាងបង្ហូរឈាមបំផុតមួយនៃប្រវត្តិសាស្ត្ររដ្ឋតិចសាស់។ ជនស្លូតត្រង់២០នាក់នៅEL PASOបានបាត់បង់ជីវិត។ លោកអំពាវនាវដល់ប្រជាជនឲ្យរួបរួមគ្នាទោះជាអ្នកមានប្រភពមកពីទីណាក្ដី ដើម្បីជម្នះគ្រោះមហន្តរាយបែបនោះ។
ប្រជាជននៃទីក្រុងនេះដែលស្ថិតនៅជាប់ព្រំដែនជាមួយម៉ិកស៊ិក បានឆ្លើយតបចំពោះការអំពាវនាវ ឲ្យមានការផ្ដល់ឈាមសម្រាប់ជួយសង្គ្រោះបណ្ដាអ្នករបួស ដែលបញ្ជូនមកកាន់មន្ទីរពេទ្យជាច្រើននៃទីក្រុង។
យោងតាមសារព័ត៌មានក្នុងស្រុកមួយចំនួនថា ខ្មាន់កាំភ្លើងមានឈ្មោះPATRICK CRUSIUS មានដើមកំណើតមកពីជាយក្រុងដាឡាស់។ តាមអេក្រង់កាម៉ារ៉ាត្រួតពិនិត្យសន្តិសុខ ដែលចាក់ផ្សាយតាមទូរទស្សន៍ KTSM គេឃើញជននោះដើរចូលក្នុងផ្សារទំនើប ដោយកាន់កាំភ្លើងមួយដើមហើយត្រចៀករបស់គេពាក់កាស់ទប់សំឡេង។ យោងតាមប៉ូលិសថាមានភ្ញៀវរវាងពី១០០០ទៅ៣០០០នាក់បានលើកគ្នាមកកាន់ផ្សារទំនើបនេះ ពេលកើតមានសោកនាដកម្ម។ សាក្សីម្នាក់និយាយថា ខ្ញុំបានឃើញបុរសម្នាក់ពាក់អាវយឺតពណ៌ខ្មៅកាន់កាំភ្លើងមួយដើម។ គេបានបាញ់សំដៅលើមនុស្សម្នាដោយផ្ទាល់តែម្ដង ហើយឃើញមនុស្សច្រើននាក់ដួលដេកលើដី។
បណ្ដាវីដេអូបង្ហាញមនុស្សម្នាភ័យផ្អើលជ្រួយច្របល់ហើយរត់រកជម្រក ព្រមទាំងបណ្ដាសាកសពរាយប៉ាយលើដី។ នៅសហរដ្ឋអាមេរិកដែលការប្រើកាំភ្លើងមានភាពស្របច្បាប់ តែងកើតមានការបាញ់ប្រហារ ទាំងនៅតាមសាលារៀនក៏ដូចតាមទីតាំងសាសនា កន្លែងធ្វើការឬទីតាំងពាណិជ្ជកម្ម៕ (កែសម្រួលដោយ ៖ បុប្ផា) (ប្រភពវីដេអូ ៖ CGTN)
ចែករំលែកព័តមាននេះ