រាជធានីភ្នំពេញ ៖ វេជ្ជបណ្ឌិតមួយក្រុម មកពីមន្ទីរពេទ្យរ៉ូយ៉ាល់ភ្នំពេញ និងមន្ទីរពេទ្យបាងកក ប្រទេសថៃ បានបង្ហាញនូវរោគសញ្ញាមួយចំនួន ដែលប្រជាពលរដ្ឋកម្ពុជាគួរយល់ដឹង និងការពារជាបន្ទាន់ ដើម្បីកុំឱ្យមានបញ្ហាកាន់តែធ្ងន់…
រាជធានីភ្នំពេញ ៖ វេជ្ជបណ្ឌិតមួយក្រុម មកពីមន្ទីរពេទ្យរ៉ូយ៉ាល់ភ្នំពេញ និងមន្ទីរពេទ្យបាងកក ប្រទេសថៃ បានបង្ហាញនូវរោគសញ្ញាមួយចំនួន ដែលប្រជាពលរដ្ឋកម្ពុជាគួរយល់ដឹង និងការពារជាបន្ទាន់ ដើម្បីកុំឱ្យមានបញ្ហាកាន់តែធ្ងន់ ។ បទបង្ហាញនេះ រៀបចំឡើងដោយមន្ទីរពេទ្យរ៉ូយ៉ាល់ភ្នំពេញ កាលពីថ្ងៃទី២៧ កក្កដា ២០១៩ ដោយមានការចូលរួមពីប្រជាពលរដ្ឋកម្ពុជាជាច្រើនផងដែរ ។
តាមបទបង្ហាញរបស់ក្រុមគ្រូពេទ្យទាំងនេះ រោគសញ្ញា ៣ ប្រភេទដែលគួរប្រុងប្រយ័ត្នខ្ពស់នោះ រួមមាន ទី១-ជំងឺស្ទះប្រព័ន្ធបង្ហូរទឹកប្រម៉ាត់,ទី២-ជំងឺលំពែង និងទី៣ -ជំងឺមហារីកថ្លើម ខណៈ រោគសញ្ញាទាំង៣ប្រភេទនេះ កំពុងកើតឡើងចំពោះពលរដ្ឋខ្មែរយ៉ាងច្រើន ដោយសារតែពួកគាត់កង្វះ ការប្រុងប្រយ័ត្ន ។
លោកវេជ្ជបណ្ឌិត ជា ចាន់ឌី អ្នកឯកទេសខាងជំងឺថ្លើមប្រចាំមន្ទីរពេទ្យរ៉ូយ៉ាល់ភ្នំពេញបានឲ្យដឹងថា ជំងឺមហារីកថ្លើមកើតមានច្រើនក្នុងប្រទេសខ្មែរ ហើយរហូតមកដល់ពេលនេះ យើងមិនមានការព្យាបាលដ៏ត្រឹមត្រូវនៅឡើយទេ ។ ជំងឺមហារីកថ្លើមនេះ មិនអាចព្យាបាលដោយបាញ់កាំរស្មីដូចជំងឺមហារីកផ្សេងៗទៀតឡើយ ។
លោកបន្ដថា ចំពោះការព្យាបាលជំងឺមហារីកថ្លើមនេះ ដោយវះកាត់ និងការព្យាបាលដោយអន្ដរាគមន៍វិទ្យុសាស្ដ្រ ជាការព្យាបាលដោយដុតដោយម្ជុល មានកំដៅដែលធ្វើឲ្យឆេះដុំមហារី និងធ្វើឲ្យដុំលួយ និងជាសះស្បើយ ។ ដោយឡែកការព្យាបាលមួយប្រភេទទៀត គឺការព្យាបាលដោយញុកសរសៃឈាម ។
លោកថា៖ « ជំងឺមហារីថ្លើមភាគច្រើនកើតនៅថ្លើម ដែលរលាករាំរៃ ឬថ្លើមរលាកដោយមេរោគ និងរលាកដោយមិនមានមេរោគ ហើយថ្លើមដែលរលាកដោយមេរោគ គឺថ្លើមប្រភេទ B និង C ។ ដោយឡែកសម្រាប់ការរលាកថ្លើម ដោយមិនមានមេរោគ គឺបណ្ដាលមកពីការទទួលទានសុរា ដែលធ្វើឲ្យរលាកថ្លើមរ៉ាំរៃ ការរលាករ៉ាំរ៉ៃនេះដែលបង្ក ឲ្យកើតជំងឺមហារីក ហើយការការពារ គឺកុំឲ្យកើតមានជំងឺរលាករ៉ាំរៃនេះ»។
ចំណែក ជំនាញផ្នែកប្រម៉ាត់មកពី មន្ទីរពេទ្យប្រទេសថៃ លោកវេជ្ជបណ្ឌិត Thun Ingkakulថ្លែងថា «ជំងឺក្នុងថង់ប្រម៉ាត់នេះកើតច្រើន មិនថាក្នុងប្រទេសកម្ពុជា ឬប្រទេសថៃឡើយ ទាំងនេះដោយសារការមិនទទួលបាន ការយល់ដឹងគ្រប់គ្រាន់ពី ការពារអំពីជំងឺនេះ»។
លោកអះអាងថា វិធានការការពារកុំឲ្យកើតជំងឺនេះ គឺឧស្សាហ៍មកមន្ទីរពេទ្យពិនិត្យសុខភាព, ជៀសវាង ឬឈប់ការទទួលទានបារី, ស្រា ឬទទួលទានអាហារដែលធ្វើឲ្យ បង្ករមានខ្លាញ់ច្រើន។
លោកឲ្យដឹងថា ជំងឺនេះព្យាបាលដោយការវះកាត់ ឬតាមរយៈការចោះដែលជួយឲ្យអ្នកជំងឺ ឈឺចាប់តិច និងសម្រាកក្នុងមន្ទីរពេទ្យមានរយៈពេលខ្លី ហើយអត្រាជោគជ័យ ជាពីជំងឺនេះមានច្រើន។ រោគសញ្ញានៃជំងឺស្ទះថង់ប្រម៉ាត់នេះ មានរោគសញ្ញាជាច្រើនរួមមាន ៖ ឈឺពោះផ្នែកខាងលើខ្លាំង, ក្ដៅខ្លួន, ភ្នែកឡើងពណ៌លឿង។
លោកវេជ្ជបណ្ឌិត ខាំ សោភា អ្នកឯកទេសផ្នែកប្រព័ន្ធរំលាយអាហារ បានឲ្យដឹងថា ដើម្បីបញ្ជៀសនូវការកើតជំងឺទាំងនេះ ពលរដ្ឋគួរការស្វែងយល់បន្ថែមថា តាមរយៈប្រព័ន្ធតិចណូឡូជី ដែលមានក្នុងទូរស័ព្ទដៃ ស្វែងរកតាមរយៈអ៊ីនធើរណេត ដោយបង្កើតការយល់ដឹងដោយខ្លួនឯងបន្ថែមទៀត។
លោកវេជ្ជបណ្ឌិតបានអំពាវនាវដល់ពលរដ្ឋសូមមេត្តាកាត់បន្ថយការញ៉ាំសុរាគ្រប់ប្រភេទ, ការជក់បារី ដើម្បីកុំឲ្យកើតជំងឺប្រម៉ាត់, និងជំងឺលំពែងនេះ។ មួយវិញទៀត ប្រសិនបើពលរដ្ឋមានរោគសញ្ញាដូចជា៖ រមាស់ខ្លួន, រមាស់ស្បែក, លឿងភ្នែក និងឈឺពោះតិចតួច សូមមកកាន់មន្ទីរពេទ្យជាបន្ទាន់ ដើម្បីពិនិត្យព្យាបាលបានទាន់ពេលវេលា ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ