រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានប្រកាសយ៉ាងម៉ឺងម៉ាត់ថា នឹងអនុវត្តអភិក្រមទី៥ វះកាត់ចំពោះមន្ត្រីដែលប្រព្រឹត្តអំពើពុករលួយ ។ នេះបើតាមសេចក្តីប្រកាសព័ត៌មានរបស់គណៈរដ្ឋមន្ត្រី ។
នៅក្នុងកិច្ចប្រជុំគណៈរដ្ឋមន្ត្រី នាព្រឹកថ្ងៃទី២ សីហា ឆ្នាំ២០១៩ ថា «សម្តេចតេជោនាយករដ្ឋមន្ត្រីបានបង្ហាញជំហរម៉ឺងម៉ាត់ ក្នុងការអនុវត្តអភិក្រមទី៥ វះកាត់» ដោយបានធ្វើការព្រមានដកហូតបុណ្យសក្ដិ ព្រមទាំងបង្កកទ្រព្យសម្បត្តិ ចំពោះមន្ត្រីរាជការ និងកងកម្លាំងប្រដាប់ អាវុធទាំងឡាយណា ដែលបានប្រើតួនាទីប្រព្រឹត្តអំពើពុករលួយ កឹបកេងទ្រព្យសម្បត្តិរដ្ឋ កាប់បំផ្លាញព្រៃឈើ រំលោភយកដីរដ្ឋធ្វើជាទ្រព្យសម្បត្តិផ្ទាល់ខ្លួន និងត្រូវទទួលខុសត្រូវចំពោះមុខច្បាប់ជាធរមានថែមទៀត ។
សម្តេចតេជោនាយករដ្ឋមន្ត្រីក៏បានលើកទឹកចិត្តឱ្យមានការកែច្នៃសំរាមក្នុងស្រុក ដើម្បីផលិតជាថាមពលអគ្គិសនីបន្ថែមទៀត ក្នុងការចូលរួមការពារបរិស្ថាន និងដោះស្រាយបញ្ហាសំរាមក៏ដូចជា ទីលានចាក់សំរាម ជាពិសេសនៅរាជធានីភ្នំពេញ និងខេត្តព្រះសីហនុ ។ សម្តេចតេជោនាយករដ្ឋមន្ត្រីបានសង្កត់ធ្ងន់ថា កម្ពុជាមិនអនុញ្ញាតដាច់ខាតឱ្យមានការនាំចូលសំរាមពីបរទេស ដើម្បីកែច្នៃ ឬក៏ផលិតជាថាមពលអគ្គិសនីនោះទេ ។ ជាមួយគ្នានោះដែរ សម្តេចតេជោនាយករដ្ឋមន្ត្រីបានណែនាំដល់ក្រសួងស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិទាំងអស់ត្រូវរួមគ្នាបន្តយកចិត្តទុកដាក់ខ្ពស់លើការដោះស្រាយបញ្ហាទឹកជូនប្រជាពលរដ្ឋ ជាពិសេសចំពោះទីកន្លែងមួយចំនួនដែលនៅកំពុងបន្តជួបប្រទះគ្រោះរាំងស្ងួតនៅឡើយ និងត្រូវត្រៀមផ្ដល់ស្រូវពូជជូនប្រជាពលរដ្ឋដែលរងការខូចខាត និងមានការខ្វះខាត ។
ទន្ទឹមនឹងនេះ សម្តេចតេជោនាយករដ្ឋមន្ត្រីក៏បានក្រើនរំលឹកដល់ក្រសួងស្ថាប័ន និងរដ្ឋបាលដែនដីពាក់ព័ន្ធទាំងអស់ ជាពិសេសប្រជាពលរដ្ឋផ្ទាល់ត្រូវបង្កើនការប្រុងប្រយ័ត្នខ្ពស់ចំពោះការកើនឡើងនៃកម្ពស់ទឹកតាមដងទន្លេ នៅរដូវវស្សានេះ ដែលអាចបង្កជាគ្រោះទឹកជំនន់ ។
សម្តេចតេជោនាយករដ្ឋមន្ត្រីបានផ្តាំសួរសុខទុក្ខដល់មន្ត្រីរាជការគ្រប់ជាន់ថ្នាក់ ជាពិសេសកងកម្លាំងប្រដាប់អាវុធគ្រប់ប្រភេទដែលបាន និងកំពុងឈរជើងតាមខ្សែបន្ទាត់ព្រំដែន តាមបណ្តាកោះក្នុងដែនសមុទ្រកម្ពុជា និងប្រចាំការនៅតាមគ្រប់ទីកន្លែងដែលតែងតែខិតខំថែរក្សាការពារសន្តិភាព និងបូរណភាពទឹកដីជាតិមាតុភូមិដោយឥតងាករេ ៕ កែសម្រួលដោយ
ចែករំលែកព័តមាននេះ