រាជធានីភ្នំពេញ៖ បន្ទាប់ពីធនាគារជាតិនៃកម្ពុជាបានដាក់ឱ្យដំណើរការសាកល្បងគម្រោង «បាគង» ប្រើប្រាស់បច្ចេកវិទ្យា ប្លុកឆេន (Blockchain) សម្រាប់វិស័យហិរញ្ញវត្ថុថ្មីៗនេះ មន្ត្រីជាន់ខ្ពស់ផ្នែកបច្ចេកទេសបង្ហាញការវាយតម្លៃមួយថា កម្ពុជាអាចជាប្រទេសមួយឈានមុខគេក្នុងតំបន់ប្រើប្រាស់បច្ចេកវិទ្យានេះ ។
អគ្គនាយកបច្ចេកទេសធនាគារជាតិនៃកម្ពុជាលោកស្រី ជា សិរី បានមានប្រសាសន៍កាលពីពេលថ្មីៗនេះថា អ្វីដែលយើងកំពុងអភិវឌ្ឍន៍ថ្មីជាងគេហើយទើបដាក់ឱ្យដំណើរការកន្លងទៅនេះគឺប្រព័ន្ធ «បាគង» ។ ប្រព័ន្ធបាគងនេះគឺជាការទូទាត់ Mobile Payment ដោយប្រើបច្ចេកវិទ្យា Blockchain ។ លោកស្រីបញ្ជាក់ថា «ការប្រើបច្ចេកវិទ្យា Blockchain ក្នុងប្រព័ន្ធបាគងនេះ វាក៏ជាទំនើបកម្មមួយ បើយើងនិយាយប្រៀបធៀបប្រទេសទៅក្នុងតំបន់ និងពិភពលោក យើងស្ថិតក្នុងចំណោមជាប្រទេសឈានមុខមួយដែលប្រើបច្ចេកវិទ្យា» ។
បើតាមធនាគារជាតិនៃកម្ពុជា «ការដាក់ដំណើរការសាកល្បងប្រព័ន្ធ បាគង ជាមួយធនាគារដៃគូចំនួនបួនដំបូងគេរួមមាន៖ ធនាគារ អេស៊ីលីដា, ធនាគារ FTB, ធនាគា រវឌ្ឍន: និងធនាគារ ឯកទេសវីង ហើយការដាក់ឱ្យដំណើរការសាកល្បងប្រព័ន្ធ បាគង គឺជាដំណើរវឌ្ឍនភាពក្នុងយុគសម័យថ្មីរបស់វិស័យហិរញ្ញវត្ថុនៅកម្ពុជា ។ យើងមានមោទនភាពណាស់ដែលក្លាយជាប្រទេសដំបូងគេក្នុងការដាក់ឱ្យដំណើរការប្រព័ន្ធបច្ចេកវិទ្យា Blockchain ដ៏ទំនើបចុងក្រោយគេក្នុងវិស័យហិរញ្ញវត្ថុ ដើម្បីផ្តល់លទ្ធភាពក្នុងការធ្វើ និងជំរុញបរិយាប័ន្នហិរញ្ញវត្ថុ សំដៅផ្តល់សេវាហិរញ្ញវត្ថុសម្រាប់ប្រជាជនកម្ពុជាគ្រប់រូប» ។
ធនគារជាតិបង្ហាញថា គម្រោង បាគង ដែលប្រើប្រាស់បច្ចេកវិទ្យា Distributed Ledger Technology(DLT) ក៏កំពុងត្រូវបានសិក្សាដើម្បីឆ្លើយតបនឹងការរីកចម្រើនសេដ្ឋកិច្ច និងបច្ចេកវិទ្យាហិរញ្ញវត្ថុនាពេលបច្ចុប្បន្ន ។ គម្រោងនេះនឹងរួមចំណែកពង្រឹងសុវត្ថិភាព និងប្រសិទ្ធភាពប្រព័ន្ធទូទាត់សងប្រាក់នៅកម្ពុជា កាត់បន្ថយការប្រើប្រាស់សាច់ប្រាក់ក្នុងទីផ្សារ និងចូលរួមលើកកម្ពស់បរិយាប័ន្នហិរញ្ញវត្ថុ ។
ធនាគារជាតិនៃកម្ពុជាបានបន្តរៀបចំបទប្បញ្ញាត្តិ ត្រួតពិនិត្យ និងអភិវឌ្ឍប្រព័ន្ធទូទាត់ ដើម្បីធានាឱ្យបាននូវស្ថិរភាព និងនិរន្តរភាព នៃដំណើរការប្រព័ន្ធទូទាត់ កាត់បន្ថយហានិភ័យជាប្រព័ន្ធ ការពារផលប្រយោជន៍អតិថិជន និងលើកកម្ពស់ការទូទាត់សងប្រាក់ ជាអេឡិចត្រូនិក ។ ហេដ្ឋារចនាសម្ព័ន្ធទូទាត់ត្រូវបានធ្វើទំនើបកម្ម និងដាក់ឱ្យដំណើរការជាបន្ទាប់ដើម្បីសម្រួលដល់ប្រតិបត្តិការទូទាត់អន្តរធនាគារដែលរួមមានប្រព័ន្ធខេមបូឌាស៊ែស្វីចកំពុងត្រូវបានដាក់ឱ្យដំណើរការបឋម និងប្រព័ន្ធទូទាត់រាយដទៃទៀត ក៏កំពុងអភិវឌ្ឍក្រោមជំនួយឧបត្ថម្ភពីរដ្ឋាភិបាលកូរ៉េតាមរយៈទីភ្នាក់ងារកិច្ចសហប្រតិបត្តិការអន្តរជាតិកូរ៉េ ។
ទន្ទឹមនឹងនេះធនាគារជាតិនៃកម្ពុជាកំពុងអភិវឌ្ឍន៍ប្រព័ន្ធទូទាត់ដុលភ្លាមៗ (RTGS) សម្រាប់សម្រួល និងកាត់បន្ថយហានិភ័យចំពោះប្រតិបត្តិការទូទាត់សងប្រាក់តម្លៃធំអន្តរធនាគារជាពិសេសប្រតិបត្តិការទូទាត់ក្នុងទីផ្សារហិរញ្ញវត្ថុ ។ បន្ថែមលើសពីនេះធនាគារជាតិនៃកម្ពុជាកំពុងរៀបចំយុទ្ធសាស្ត្រអភិវឌ្ឍន៍ប្រព័ន្ធទូទាត់សងប្រាក់ជាតិ ក្រោមជំនួយបច្ចេកទេសរបស់ធនាគារពិភពលោក ហើយបច្ចុប្បន្នសេចក្តីព្រាងយុទ្ធសាស្ត្រនេះកំពុងបានពិនិត្យ និងពិភាក្សាបន្តដោយផ្តោតសំខាន់លើការកំណត់ផែនការសកម្មភាពដែលត្រូវអនុវត្ត ។
ធនាគារជាតិសង្កត់ធ្ងន់ថា «ដោយមើលឃើញពីកាលានុវត្តភាពបច្ចេកវិទ្យាហិរញ្ញវត្ថុ ធនាគារជាតិនៃកម្ពុជាបានខិតខំដាក់ចេញនូវគោលនយោបាយសមស្របតាមរយៈបទប្បញ្ញត្តិផ្សេងៗ ដើម្បីលើកកម្ពស់ការប្រើប្រាស់បច្ចេកវិទ្យាហិរញ្ញវត្ថុឱ្យកាន់តែមានប្រសិទ្ធភាព កាត់បន្ថយហានិភ័យនានាដែលអាចកើតមានឡើង និងរួមចំណែកលើកកម្ពស់បរិយាប័ន្នហិរញ្ញវត្ថុ ។ ជាមួយគ្នានេះធនាគារជាតិនៃកម្ពុជាកំពុងរៀបចំផែនទីមគ្គុទេសបច្ចេកវិទ្យាហិរញ្ញវត្ថុ ដើម្បីជំរុញ និងគ្រប់បច្ចេកវិទ្យាហិរញ្ញវត្ថុ ជាពិសេសការធ្វើតេស្តសាកល្បងក្រោមជំនួយបច្ចេកទេសពីធនាគារអភិវឌ្ឍន៍អាស៊ី ADB» ៕ កែសម្រួលដោយ ៖សុឃាក់
ចែករំលែកព័តមាននេះ