រាជធានីភ្នំពេញ ៖ យុវជនម្នាក់សង្ស័យប្រើប្រាស់ថ្នាំញៀនហួសកម្រិត រហូតដល់ញៀនយ៉ាងងប់ងុលវង្វេង ស្មារតី លែងដឹងខុសត្រូវ បានកាន់ពូថៅ និងកាំបិតក្នុងដៃ រួចដើរគំរាមរកកាប់សម្លាប់អ្នកភូមិនៅតាមផ្លូវបង្កឲ្យមានការភ្ញាក់ផ្អើល និងភ័យខ្លាចយ៉ាងខ្លាំង…
រាជធានីភ្នំពេញ ៖ យុវជនម្នាក់សង្ស័យប្រើប្រាស់ថ្នាំញៀនហួសកម្រិត រហូតដល់ញៀនយ៉ាងងប់ងុលវង្វេង ស្មារតី លែងដឹងខុសត្រូវ បានកាន់ពូថៅ និងកាំបិតក្នុងដៃ រួចដើរគំរាមរកកាប់សម្លាប់អ្នកភូមិនៅតាមផ្លូវបង្កឲ្យមានការភ្ញាក់ផ្អើល និងភ័យខ្លាចយ៉ាងខ្លាំង ។ ខណៈនោះ កម្លាំងនគរបាលរួមជាមួយកម្លាំងប្រជាការ ពារភូមិបានអន្តរាគមន៍ ប៉ុន្តែយុវជនរូបនោះមិនឲ្យចូលទៅជិតឡើយ ដោយបានគំរាមគ្រប់បែបយ៉ាង ។
ដោយសារតែនគរបាលនិងប្រជាការពារតាមជាប់រហូត យុវជនខាងលើបានយកពូថៅកាប់ក្បាលខ្លួនឯង បណ្ដាលឲ្យរងរបួសយ៉ាងដំណំហូរឈាមកក្លាក់ ។ ដោយគ្មានជម្រើសផ្សេង នគរបាលរួមនឹងប្រជាការពារបានយកបំពង់ពន្លត់អគ្គិភ័យបាញ់បង្ហុយដាក់ឱ្យផ្សារភ្នែក ទើបអាចចូលទៅចាប់ខ្លួនបាន ។
បាតុភាពនេះបានកើតឡើង កាលពីវេលាម៉ោង៨និង៥០នាទីព្រឹកថ្ងៃទី១ ខែសីហា តាំងពីចំណុចក្រោយអាងទឹកស្ថិតនៅក្នុងភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ ហើយយុវជននេះបានរត់រហូតដល់ប្លុកផ្ទះជួលអតីតឡឥដ្ឋ ស្ថិតនៅក្នុងភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ៣ រាជធានីភ្នំពេញ ទើបចាប់ខ្លួនបាន ។
យុវជនខាងលើនេះ ឈ្មោះ សង សានម៉ៅ អាយុ២៣ឆ្នាំ ស្នាក់នៅម្តុំអាងទឹកអូឡាំពិក ខណ្ឌ៧មករា រាជធានីភ្នំពេញ និងមានស្រុកកំណើតនៅក្នុងភូមិត្រពាំងជ្រៃ ឃុំស្មោង ស្រុកទ្រាំង ខេត្តតាកែវ មានឪពុកឈ្មោះ ឆាត ផារ៉ា អាយុ៥៧ឆ្នាំ ជាកម្មករសំណង់ មានម្ដាយឈ្មោះ ចេក នួន អាយុ៦០ឆ្នាំ ជាកម្មករសំណង់ ដូចគ្នាស្នាក់នៅក្នុងសង្កាត់ចោមចៅ១ និងបងប្អូនចំនួន៦នាក់ យុវជននេះគឺជាកូនពៅ ។
អ្នកភូមិត្រពាំងថ្លឹង១បាននិយាយឲ្យដឹងថា នៅវេលាព្រឹកថ្ងៃកើតហេតុ ពួកគាត់បានឃើញយុវជនខាងលើដើរតាមផ្លូវ ដោយដៃម្ខាងកាន់ពូថៅ១ និងដៃម្ខាងទៀតកាន់កាំបិត១ ហើយបានគម្រាមកាប់សម្លាប់អ្នកភូមិ ព្រមទាំងកាប់បំផ្លាញរបស់របរដែលនៅចំពោះមុុខរបស់គេជាបន្តបន្ទាប់ បង្កការភ័យខ្លាចនិងភ្ញាក់ផ្អើលគ្រប់ៗគ្នា មិនមាននរណាម្នាក់ហ៊ានតស៊ូជាមួយទេ ដោយខ្លាចយុវជននេះកាប់សម្លាប់ ។ ភ្លាមៗនោះកម្លាំងនគរបាលប៉ុស្តិ៍ចោមចៅ១ រួមជាមួយកម្លាំងប្រជាការពារភូមិបាននាំគ្នាចេញអន្តរាគមន៍ដើម្បីឃាត់ខ្លួនយុវជននេះ ប៉ុន្តែយុវជននោះមិនព្រមឲ្យចាប់ខ្លួនស្រួលៗឡើយ ។
ប្រភពដដែលបានបន្តថា កម្លាំងខាងលើ បានត្រឹមតែរត់ដេញតាមពីក្រោយយុវជននេះ ដែលគំរាមមិនឲ្យចូលជិត រហូតដល់ចំណុចផ្ទះជួលអតីតឡឥដ្ឋ ស្ថិតនៅក្នុងភូមិដំណាក់ធំ៣ សង្កាត់ស្ទឹងមានជ័យ ។ យុវជនខាងលើបានគំរាមថា បើហ៊ានចូលជិតខ្លួននឹងកាប់សម្លាប់ខ្លួនឯងហើយ ប៉ុន្តែកម្លាំងនគរបាលរួមជាមួយកម្លាំងប្រជាការពារនិងប្រជាពលរដ្ឋបាននាំគ្នាព្យាយាមចូលទៅចាប់ ។ ស្រាប់តែយុវជននេះ កាប់ក្បាល និងដៃខ្លួនឯង បណ្ដាលឲ្យរងរបួសហូរឈាមកក្លាក់ ខណៈនោះដោយគ្មានជម្រើសទើបកងកម្លាំងយកបំពង់ពន្លត់អគ្គិភ័យ ទៅបាញ់បង្ហុយផ្សែងដាក់មុខ ទើបចាប់បានរួចនាំយកទៅកាន់សាលាសង្កាត់ចោមចៅ១ ដើម្បីប្រគល់ជូនមន្ទីរសង្គមកិច្ចរាជធានីភ្នំពេញចាត់ការបន្ត ។
ដោយឡែក ស្ត្រីឈ្មោះ ទីត ស្រីល័ក្ខ អាយុ២៨ឆ្នាំ ជាកម្មការិនីរោងចក្រ ស្នាក់នៅភូមិត្រពាំងថ្លឹង១ សង្កាត់ចោមចៅ១ បានប្រាប់ឲ្យនគរបាលដឹងថា យុវជនខាងលើ គឺត្រូវជាប្អូនថ្លៃរបស់នាង បានមកលេងផ្ទះនាង២ថ្ងៃហើយ ។ លុះនៅព្រឹកថ្ងៃទី១ ខែសីហា នាងបានឲ្យលុយ២មុឺនរៀល ចំណែកអ្នកជិតខាងម្នាក់ទៀតអាណិតបានឲ្យ២មុឺនរៀលដែរ សរុបបានចំនួន៤មុឺនរៀល ហើយនាងបានប្រាប់ឲ្យវិលត្រឡប់ទៅស្រុកវិញ ។ បន្ទាប់មកប្អូនថ្លៃរូបនេះ ក៏ដើរចេញពីផ្ទះនាងបាត់ហើយនាងនឹកស្មានថា ត្រឡប់ទៅស្រុកវិញបាត់ហើយ ។ ដឹងអីក្រោយមក ស្រាប់តែមានរឿងអាក្រក់បែបនេះកើតឡើងទៅវិញ ៕ (សម្រួលដោយ៖ ស្រីណា)
ចែករំលែកព័តមាននេះ