ការពិត ត្រចៀកកាំជាសត្វដែលមានសំណាង…ផ្ទះធំៗបែបនេះទើបវានៅ

ថ្ងៃទី ០២ ខែ សីហា ឆ្នាំ ២០១៩
ម៉ោង ១៤:០៩
សេង សុធា

ខេត្តតាកែវ ៖ សព្វថ្ងៃនេះ គេសង្កេតឃើញមុខរបរចិញ្ចឹមសត្វត្រចៀកកាំយកសម្បុកទឹកមាត់ ហាក់បីដូចជារីកច្រើនគួរសមនៅតាមបណ្ដាស្រុកឬក្រុងមួយចំនួនក្នុងខេត្ត ព្រោះមានទីផ្សារល្អ ទោះមានសម្បុកប៉ុន្មានក៏លក់អស់ដែរ ។ ដោយឡែក មានអ្នកប្រកបមុខរបរចិញ្ចឹមច្រើនគួរសមដែរ ទាំងនៅក្នុងទីប្រជុំជន និងតាមទីវាលមាត់បឹងជាដើម ។

គួររំលឹកថា៖ មិនធម្មតា…! សត្វត្រចៀកកាំអ្នកខ្សត់ជីវភាព ចង់ចិញ្ចឹមវាលក់ គឺមិនអាច ឡើយដោយសារត្រូវសង់អគារសម្រាប់ឱ្យវារស់នៅយ៉ាងស្ងៀមស្ងាត់ និងមានសុវត្ថិភាពដោយត្រូវចំណាយដើមទុនច្រើន ។

បើយើងធ្វើដំណើរតាមបណ្តោយផ្លូវជាតិលេខ២ ព្រំប្រទល់ស្រុកទ្រាំង ទៅស្រុកគីរីវង់ រហូតភ្នំដិន យើងក្រឡេកឃើញមានសំណង់សម្រាប់ចិញ្ចឹមសត្វត្រចៀកកាំសាងសង់ថ្មីប្រមាណជា៤កន្លែង ហើយ២កន្លែងទៀតនៅខាងត្បូងផ្សារទន្លាប់ និងខាងកើតផ្សារទន្លាប់ ជាទីតាំងចាស់ដែលគេបានចិញ្ចឹមត្រចៀកកាំមកយូរហើយ ។ ដោយឡែក នៅក្នុងក្រុងដូនកែវវិញ សំណង់ចិញ្ចឹមត្រចៀកកាំបាននិងកំពុងតែសាងសង់ថ្មីៗជាច្រើនកន្លែងផងដែរ ។

លោក ចេវ នេត បានប្រាប់កោះសន្តិភាពយើងឱ្យដឹងថា គាត់បានបែកគំនិតមកសាងសង់កន្លែងចិញ្ចឹមត្រចៀកកាំនៅលើដីរបស់គាត់ពីខាងក្រោយក្នុងភូមិប្រហ៊ូតសង្កាត់រកាក្រៅ ក្រុងដូនកែវ បន្ទាប់ពីលក់ដីបាន ។ សំណង់ចិញ្ចឹមត្រចៀកកាំនេះគាត់បានចាប់ផ្តើមសាងសង់ចាប់តាំងខែកុម្ភៈ ឆ្នាំ២០១៩មក ដោយមានកម្ពស់៤ជាន់នៅសល់ប្រមាណជាង២ខែទៀត ទើបរួចរាល់ ។ គាត់ថា ចំពោះតម្លៃសំណង់ទាំងអស់ត្រូវចំណាយជាង១០មុឺនដុល្លារ ។

លោក ចេវ នេត បានបន្តទៀតថា នៅពេលនេះយើងពិបាកបន្តិច ព្រោះតែអ្នកមានលុយគេសម្លឹងឃើញថា ទឹកមាត់ត្រចៀកកាំមានតម្លៃថ្លៃមានទីផ្សារល្អនោះ គេបានសាងសង់សំណង់សម្រាប់ចិញ្ចឹមត្រចៀកកាំជាច្រើនកន្លែង ទីតាំងទី១នៅពីខាងក្រោយផ្ទះលោក គង់ សំអូន ដែលគេចិញ្ចឹមយូរមកហើយ ។ ចំណែកនៅខាងជើងវត្តឈើទាលនិងនៅខាងកើតផ្ទះរបស់គាត់មួយកន្លែងទៀត នៅខាងត្បូងវត្តតុំមួយកន្លែង និងនៅខាងកើតភូមិចាមមួយកន្លែង សរុបទៅ៦កន្លែងទើបសាងសង់រួចរាល់បានកន្លែង រួមជាមួយកន្លែងចាស់២ទៀតសរុប៦កន្លែង ។

មូលហេតុ ដែលគាត់បែកគំនិតចិញ្ចឹមត្រចៀកកាំដោយហា៊នចំណាយដើមទុនធ្វើកន្លែងឱ្យវារស់នៅអស់រាប់មុឺនដុល្លារបែបនេះ ដោយសារសំបុករបស់វាដែលកើតចេញពីទឹកមាត់ លក់ទៅបានតម្លៃខ្ពស់ និងមានខាងក្រុមហ៊ុនគេមកទទួលទិញដល់កន្លែងតែម្តង មានប៉ុន្មានក៏គេទិញដែរ ។ លោកថា តែវាពិបាកបន្តិច ព្រោះយើងទើបនឹងធ្វើមិនដឹងឆ្នាំណាទទួលបានផលមកវិញទេណាមួយមានច្រើនកន្លែងទៀតហើយនៅខាងជើងផ្សារស្វាយព្រៃ ស្រុកសំរោង មានមួយកន្លែងទៀត ។

កោះសន្តិភាពមិនអាចទាក់ទងសួរនាំពីលោក ញឹប ស្រ៊ន ប្រធានមន្ទីរកសិកម្ម រុក្ខាប្រម៉ាញ់និងនេសាទបានទេ ។ តែមន្ត្រីមន្ទីរកសិកម្មខេត្តបានឱ្យដឹងថា កន្លែងចិញ្ចឹមត្រចៀកកាំមានតែនៅស្រុកគីរីវង់៦កន្លែង ក្រុងដូនកែវ៦កន្លែង និងស្រុកសំរោង១កន្លែង សរុប១៣កន្លែង ហើយថ្ងៃខាងមុខទៀតមុខរបរចិញ្ចឹមត្រចៀកកាំនឹងកើតមានជាបន្តបន្ទាប់ទៀត ព្រោះជាមុខរបរបានចំណូលច្រើន ដោយសារតែមានទីផ្សារល្អ ទោះបីមានប៉ុន្មានក៏អត់សល់ដែរ ៕ (សម្រួលដោយ៖ ស្រីណា)