ខេត្តបន្ទាយមានជ័យ ៖ ជនរងគ្រោះជាសិស្សស្រីថ្នាក់ទី៩ម្នាក់ជួបគ្រោះថ្នាក់ចរាចរណ៍ត្រូវរថយន្តបុកបែកលលាដ៍ក្បាលបណ្តាលស្លាប់ ដែលករណីនេះបានកើតឡើងនៅវេលាម៉ោង៨ព្រឹកថ្ងៃទី០១ ខែសីហា ឆ្នាំ២០១៩ តាមបណ្តោយផ្លូវជាតិ៦៩ ស្ថិតភូមិគោកអំពិល ឃុំអូរប្រាសាទ ស្រុកមង្គលបូរី ។
ជនរងគ្រោះមានឈ្មោះ ពឿន គឹមឡាង ភេទស្រី អាយុ១៥ឆ្នាំ ជាសិស្សថ្នាក់ទី៩B នៃអនុវិទ្យាល័យភ្នំធំ រស់នៅភូមិចំការចេក ឃុំរហាត់ទឹក ស្រុកមង្គលបូរី ។
មន្ត្រីនគរបាលចរាចរណ៍ជើងគោកស្រុកមង្គលបូរីបានប្រាប់ថា នៅពេលគ្រោះថ្នាក់ចរាចរណ៍កើតឡើងគឺជនរងគ្រោះបានមកពីបើកលុយម្តាយដែលវេពីប្រទេសថៃមក ដោយជិះម៉ូតូ១គ្រឿងម៉ាកហុងដាឌ្រីម ពាក់ផ្លាក់លេខ បាត់ដំបង 1N-6225 ម្នាក់ឯងតាមបណ្តោយផ្លូវជាតិលេខ៦៩ក្នុងទិសដៅពីកើតទៅលិចក្នុងល្បឿនលឿនបានឡើងវ៉ារថយន្តធុនធំដឹកដី១គ្រឿងដែលបើកបរក្នុងទិសដៅស្របគ្នាហើយបានប៉ះដៃចង្កូតដួលម៉ូតូស្របពេលដែលមានរថយន្តឡិចស៊ី RX-300 មួយគ្រឿងទៀតដែលពាក់ផ្លាក់លេខ បន្ទាយមានជ័យ 2B-5659 បើកបរក្នុងទិសដៅបញ្ច្រាសទិសដៅគ្នាក្នុងល្បឿនលឿនបានបុកបណ្តាលឱ្យបែកលលាដ៍ស្លាប់ភ្លាមៗនៅនឹងកន្លែង ។
មន្ត្រីនគរបាលបានបញ្ជាក់ថា ក្រោយពេលគ្រោះថ្នាក់ចរាចរណ៍កើតឡើងរថយន្តដឹកដីដែលទាក់ដៃចង្កូតម៉ូតូបណ្តាលដួលបានបើកទៅបាត់តែរថយន្តឡិចស៊ីសដែលបុកត្រូវបានអ្នកឃើញហេតុការនៅជិតខាងឃាត់ទុកតែអ្នកបើកបរត្រូវបានគេចខ្លួនបាត់ផងដែរ ៕
កែសម្រួលដោយ ៖ សំណាង
ចែករំលែកព័តមាននេះ