រាជធានីភ្នំពេញ ៖ ស្លាកប៉ាណូផ្សាយពាណិជ្ជកម្ម និងស្លាកយីហោយ៉ាងអនាធិបតេយ្យដែលសង់រំលោភចិញ្ចើមផ្លូវសាធារណៈបង្កឱ្យបាត់បង់សណ្តាប់ធ្នាប់ ត្រូវបានអាជ្ញាធរខណ្ឌជ្រោយចង្វារចុះទៅកាត់ដោយលើកដាក់រថយន្តបញ្ជូនទៅកាន់សាលាខណ្ឌ បន្ទាប់ពីអាជ្ញាធរបានធ្វើការណែនាំ និងជូនដំណឹងជាច្រើនលើកមកហើយ តែម្ចាស់មិនស្តាប់តាមការណែនាំ។
ការប្រើវិធានការរដ្ឋបាលនេះធ្វើឡើងកាលពីព្រឹកថ្ងៃទី១ ខែសីហា ឆ្នាំ២០១៩ នៅចំណុចរង្វង់មូលព្រហ្មមុខបួន ស្ថិតនៅគល់ស្ពានជ្រោយចង្វារ ក្នុងសង្កាត់ជ្រោយចង្វារ ខណ្ឌជ្រោយចង្វារដឹកនាំដោយលោក ឡេង រ៉ាវង្ស អភិបាលរងខណ្ឌជ្រោយចង្វារ។
តាមប្រភពព័ត៌មានបានអោយដឹងថា នៅព្រឹកនោះ អាជ្ញាធរបានប្រើធម៌ក្តៅដោយយកប៉ុស្តិ៍ផ្សារដែកមកកាត់ស្លាកប៉ាណូផ្សាយពាណិជ្ជកម្ម និងស្លាកយីហោ សរុបចំនួន៣ផ្ទាំង ក្នុងនោះមានប៉ាណូស្រាបៀរចំនួន២ផ្ទាំង និងស្លាកសណ្ឋាគារ១ ដែលដាក់លើចិញ្ចើមផ្លូវ គ្មានច្បាប់អនុញ្ញាត និងបង្កអោយបាត់បង់សណ្តាប់ធ្នាប់សាធារណៈ។
លោកឡេង រ៉ាវង្ស អភិបាលរងខណ្ឌបានឱ្យដឹងថា ការប្រើវិធានការរដ្ឋបាលនេះធ្វើឡើងតាមការណែនាំរបស់រដ្ឋបាលរាជធានីភ្នំពេញជំរុញអាជ្ញាធររៀបចំសណ្តាប់ធ្នាប់តាមដងផ្លូវដោយទុក១ភាគ៣នៃចិញ្ចើមផ្លូវជាការចូលរួមលើកកម្ពស់ សោភ័ណភាពរាជធានីភ្នំពេញអោយកាន់តែប្រសើរឡើង។
លោក អភិបាលរង ក៍បានអោយដឹងទៀតថា ដោយមានការណែនាំពីលោកឃ្លាំង ហួត អភិបាលខណ្ឌជ្រោយចង្វារ អាជ្ញាធរតែងតែចុះរៀបចំសណ្តាប់ធ្នាប់នៅតាមផ្លូវជាតិលេខ៦ ព្រមទាំងធ្វើការណែនាំដល់ប្រជាពលរដ្ឋដែលរកស៊ីលក់ដូរ ចូលរួមសហការ ហើយលក់ដូរត្រូវទុកចិញ្ចើមផ្លូវ១ភាគ៣ ដើម្បីអោយអ្នកថ្មើរជើង ។ នៅមុនការចុះកាត់ស្លាកប៉ាណូខាងលើ អាជ្ញាធរក៏បានជួនដំណឹងណែនាំជាច្រើនលើក តែម្ចាស់មិនស្តាប់តាមការណែនាំ ដោយដាក់ស្លាកប៉ាណូរំលោភចិញ្ចឹមផ្លូវ ធ្វើអោយបាត់បង់សណ្តាប់ធ្នាប់ទើបអាជ្ញាធរចុះកាត់តែម្តង។
លោកអភិបាលក៏បានបញ្ជាក់ថា ការរៀបចំសណ្ដាប់ធ្នាប់សាធារណៈនេះ គោលបំណង ដើម្បីលុបបំបាត់ការយកចិញ្ចើមចំណីផ្លូវរបស់រដ្ឋមកធ្វើអាជីវកម្មផ្ទាល់ខ្លួន និងម្យ៉ាងទៀតដើម្បីកាត់បន្ថយការកកស្ទះចរាចរ និងបាត់បង់សណ្ដាប់ធ្នាប់ ជាការលើកកម្ពស់សោភ័ណ្ឌភាព រាជធានីភ្នំពេញអោយកាន់តែប្រសើរឡើង៕ (កែសម្រួលដោយ ៖ ធីតា)
ចែករំលែកព័តមាននេះ