រាជធានីភ្នំពេញ ៖ អតីតបវរកញ្ញាកម្ពុជា រឿន ណាត បានបើកបង្ហាញមុខគូស្នេហ៍របស់ខ្លួនជាលើកដំបូង បន្ទាប់ពីតារារូបនេះបានទទួលការចាប់អារម្មណ៍ខ្លាំង ក្រោយពីនាងបានចូលរួមការប្រកួតប្រជែងផ្នែកសម្រស់ជាលក្ខណៈអន្តរជាតិកន្លងមកនេះ។ យ៉ាងណាគូស្នេហ៍របស់ រឿន…
រាជធានីភ្នំពេញ ៖ អតីតបវរកញ្ញាកម្ពុជា រឿន ណាត បានបើកបង្ហាញមុខគូស្នេហ៍របស់ខ្លួនជាលើកដំបូង បន្ទាប់ពីតារារូបនេះបានទទួលការចាប់អារម្មណ៍ខ្លាំង ក្រោយពីនាងបានចូលរួមការប្រកួតប្រជែងផ្នែកសម្រស់ជាលក្ខណៈអន្តរជាតិកន្លងមកនេះ។
យ៉ាងណាគូស្នេហ៍របស់ រឿន ណាត នាពេលនេះគឺស្ថិតនៅក្នុងដំណាក់កាលស្វែងយល់ចិត្តគ្នាប៉ុណ្ណោះ ដោយមិនទាន់មានភាពច្បាស់ថា តើអាចនឹងឈានដល់ការដឹកដៃគ្នាចូលរោងការតាមប្រពៃណីខ្មែរឬយ៉ាងណាឡើយ?
រឿន ណាត បានអះអាងថា នាងនឹងគូស្នេហ៍ឈ្មោះ ជា ឃាងឆេ បានស្គាល់គ្នាយូរឆ្នាំហើយ ប៉ុន្តែពួកនាងបានចាប់ផ្តើមចាប់អារម្មណ៍គ្នា និងបានសិក្សាស្វែងយល់ចិត្តគ្នាទៅវិញទៅមកត្រឹមកន្លះឆ្នាំនេះប៉ុណ្ណោះ។ នាងបញ្ជាក់ថា ពួកនាងបានស្គាល់គ្នាដោយសារធ្លាប់នៅក្នុងក្រុមបង្ហាញម៉ូតជាមួយគ្នា ខណៈពេលដែលគូស្នេហ៍របស់នាង គឺមិនមែនរស់នៅក្នុងស្រុកខ្មែរឡើយ ពោលគឺជាអនិកជនខ្មែរនៅប្រទេសអូស្ត្រាលី។
រឿន ណាត បញ្ជាក់ថា ទំនាក់ទំនងរបស់ពួកនាងត្រូវបានចាស់ទុំទាំងសងខាងដឹងលឺអស់ហើយ ប៉ុន្តែពួកនាងនៅបន្តមើលចិត្តគ្នាសិន ខណៈពេលដែលដំណឹងចូលរោងការ គឺនាងមិនអាចកំណត់បានមុនឡើយ ដោយសារតែឆាប់ៗនេះគូស្នេហ៍របស់នាងនឹងត្រឡប់ទៅរស់នៅប្រទេសអូស្ត្រាលីវិញហើយ។
ទោះជាយ៉ាងណា តារារូបនេះហាក់នៅមានភាពស្ទាក់ស្ទើរនៅឡើយ ជុំវិញការបញ្ចេញមុខគូស្នេហ៍របស់នាងជាសាធារណៈនាពេលនេះ ដោយសារតែបច្ចុប្បន្នទីផ្សារសិល្បៈរបស់នាងទាំងការសម្តែង និងការថតម៉ូតសំអាងការផ្សេងៗកំពុងតែមានភាពកាកកបខ្លាំង។ ជាការកត់សម្គាល់រូបភាពនៃការស្និទ្ធស្នាលរវាង រឿន ណាត និងបុរសដែលជាគូស្នេហ៍នៅប្រាសាទអង្គរវត្ត ខេត្តសៀមរាប ត្រូវបានតារារូបនេះបង្ហោះតាមបណ្តាញសង្គមហ្វេសប៊ុក ដោយនៅក្នុងនោះគេសង្កេតឃើញមានការចាប់អារម្មណ៍យ៉ាងខ្លាំងពីសំណាក់ទស្សនិកជន។
បើទោះបីជាមានការជជីកសួរពីទំនាក់ទនងរវាងនាង និងបុរសនោះថា ជាគូស្នេហ៍ឬយ៉ាងណា រឿន ណាត ហាក់មិនមានការឆ្លើយតបវិញឡើយ ពោលគឺទំនងជានាងចង់ឲ្យទស្សនិកយល់ឃើញថា នោះគ្រាន់ជាដៃគូសម្តែងរបស់នាងប៉ុណ្ណោះ។ យ៉ាងណាក៏ដោយ បន្ទាប់ពីឃើញមានភាពស្និទ្ធស្នាលប្រកបដោយភាពផ្អែមល្ហែមរបស់នាងនាពេលនេះ មានប្រិយមិត្តគាំទ្រជាច្រើនបានសម្តែងការអបអរសាទរ និងជូនពរដល់រូបនាងឲ្យបានសុភមង្គល និងអាចឈានដល់ពិធីមង្គលការជាផ្លូវការ៕ (កែសម្រួលដោយ ៖ បុប្ផា)
ចែករំលែកព័តមាននេះ