អ្នកជិតខាងបានមកជួបជុំគ្នាដើម្បីជួយសង្គ្រោះក្មេងប្រុសអាយុ ៣ ឆ្នាំម្នាក់ដែលបានតោងរបងដែកយ៉មុខផ្ទះពីជាន់ទី ៦ នៃអគារលំនៅឋានមួយកន្លែងនៅភាគនិរតីនៃប្រទេសចិនក្នុងសប្តាហ៍នេះ ។
ឧប្បត្តិហេតុដ៏គួរឱ្យភ្ញាក់ផ្អើល និងរន្ធត់នេះត្រូវបានគេថតវីដេអូ និងបានកើតឡើងនៅក្នុងស្រុក Jiulongpo ខេត្ត Chongqing កាលពីថ្ងៃចន្ទ ។ ដូចដែលបានឃើញនៅក្នុងវីដេអូក្មេងនោះបានកាន់តោងរបងដែកយ៉មុខផ្ទះមុននឹងគេទម្លាក់ខ្លូនមកដី ។ តែជាសំណាងល្អអ្នកជិតខាងបានបង្កើតជាទម្រសម្រាប់ទ្រក្មេងប្រុសនោះនៅពេលធ្លាក់មកក្រោម ។ មិនទាន់មានព័ត៌មានច្បាស់នៅឡើយថាហេតុអ្វីបានជាក្មេងប្រុសនោះមកតោងរបងដែកយ៉មុខផ្ទះបែបនេះនោះទេ ។
យោងតាម Sina News បានឱ្យដឹងថា សាក្សីឈ្មោះ Liu ដែលរស់នៅជាន់ទី ២៧ បាននិយាយថា «មានសំឡេងស្រែកយ៉ាងខ្លាំង» ហើយក្មេងប្រុសនោះបានប្រើដៃទាំងពីរតោងរបងដែកយ៉មុខផ្ទះមួយរយៈហើយបានព្យាយាមយកជើងតោងឡើងតាមជញ្ជាំងមុននឹងរបូតដៃធ្លាក់មកក្រោម ។
ក្នុងពេលកើតហេតុឪពុក-ម្តាយរបស់កុមារនេះនៅកន្លែងធ្វើការហើយកុមាររងគ្រោះត្រូវបានបញ្ជូនទៅមន្ទីរពេទ្យដើម្បីព្យាបាលរបួសស្រាល ។ វីដេអូនៃការជួយសង្គ្រោះនេះបានរីករាលដាលនៅលើ Weibo ដោយមានមនុស្សជាច្រើនបានអំពាវនាវឱ្យឪពុក-ម្តាយរបស់ក្មេងនេះមានទំនួលខុសត្រូវខ្ពស់ ៕
ប្រភព៖ nextshark , កែសម្រួលដោយ ៖ សំណាង
ចែករំលែកព័តមាននេះ