រាជធានីភ្នំពេញ ៖ ទាំងអ្នកនាំពាក្យក្រសួងយុត្តិធម៌ និងអ្នកនាំពាក្យរាជរដ្ឋាភិបាលបានបញ្ជាក់ថា ការស្នើទម្លាក់បទចោទលើលោក កឹម សុខា អតីតប្រធានគណបក្សសង្គ្រោះជាតិមិនអាចទៅរួចទេ ព្រោះកម្ពុជាមានអធិបតេយ្យភាពបរទេសមិនអាចលូចដៃចូលកិច្ចការផ្ទៃក្នុងកម្ពុជាបានឡើយ ។…
រាជធានីភ្នំពេញ ៖ ទាំងអ្នកនាំពាក្យក្រសួងយុត្តិធម៌ និងអ្នកនាំពាក្យរាជរដ្ឋាភិបាលបានបញ្ជាក់ថា ការស្នើទម្លាក់បទចោទលើលោក កឹម សុខា អតីតប្រធានគណបក្សសង្គ្រោះជាតិមិនអាចទៅរួចទេ ព្រោះកម្ពុជាមានអធិបតេយ្យភាពបរទេសមិនអាចលូចដៃចូលកិច្ចការផ្ទៃក្នុងកម្ពុជាបានឡើយ ។
លោកជិន ម៉ាលីន អ្នកនាំពាក្យក្រសួងយុត្តិធម៌បានលើកឡើងក្នុងសន្និសីទសារព័ត៌មាននាព្រឹកថ្ងៃទី១ សីហាថា សំណើសុំការទម្លាក់ចោលការចោទប្រកាន់ទៅលើលោក កឹម សុខា អតីតប្រធានគណបក្សសង្គ្រោះជាតិ គឺមិនអាចទៅរួចនោះឡើយ ហើយក៏មិនអាចមកបញ្ជាមកលើរាជរដ្ឋាភិបាល ក្នុងនាមជារដ្ឋអធិបតេយ្យមួយនោះបានទេ ។ លោកថា រាជរដ្ឋាភិបាលមិនមានសិទ្ធិអ្វី ដើម្បីអន្តរាគមន៍ទៅស្ថាប័នតុលាការដែលជាស្ថាប័នឯករាជ្យ ហើយក៏មិនមែនជាប្រទេសកាន់លទ្ធិប្រជាធិបតេយ្យ និងមាននីតិរដ្ឋផងដែរ ។
ឆ្លើយតបសំណើរទូតអាមេរិកទម្លាក់បទចោទលើលោកកឹម សុខា លោក ជិន ម៉ាលីន ថា «រដ្ឋអធិបតេយ្យ គ្មាននរណាអាចមកបង្គាប់បញ្ជាបានឡើយ ហើយគ្មានឥទ្ធិពលអ្វីមកលើកម្ពុជា ទេ» ។ ចំណែលោក ផៃ ស៊ីផាន អ្នកនាំពាក្យរាជរដ្ឋាភិបាលបានបញ្ជាក់ថា មូលដ្ឋានគ្រឹះរបស់ កម្ពុជាបានអនុវត្តគោលនយោបាយការបរទេសបានចែងច្បាស់ពីទំនាក់ទំនងជាមួយបរទេស ហើយក្នុងរដ្ឋធម្មនុញកម្ពុជាក៏បានចែងច្បាស់ថា កម្ពុជារក្សាសន្តិភាព និងទទួលស្គាល់នូវ ដែលហៅសន្តិសហវិជ្ជមាន ហើយមិនរៀបចំឲ្យគូជម្លោះដូចស្ថានទូតអាមេរិកទេ ។
លោកបញ្ជាក់ថា ៖«យើងមិនធ្វើដូចពួកព្រៃនោះទេ (ទូតអាមេរិក) ក្រសួងការបរទេសបានចេញសេចក្តីប្រកាសប្រាប់ហើយ ។ អ្នកញុះញង់ គឺប្រើប្រាស់របៀបព្រៃផ្សៃតែប៉ុណ្ណោះ» ។ លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងថា ទូតអាមេរិកត្រូវបញ្ចប់ប្រើប្រាស់លក្ខណៈដ៏ព្រៃផ្សៃមកលើរាជរដ្ឋាភិបាល ដូច្នេះបើអាមេរិកមិនពេញចិត្តកម្ពុជាសូមវេចបង្វិចចេញពីកម្ពុជាទៅ ។ លោកផៃ ស៊ីផាន បានបញ្ជាក់ថា ក្នុងន័យនេះរាជរដ្ឋាភិបាលគ្មានបំណង់ដេញមន្ដ្រីទូតអាមេរិកប្រចាំកម្ពុជាចេញពីកម្ពុជាឡើយ ។
លោកថា សូមចាត់ទុកកម្ពុជាជាប្អូនស្រីមួយទើបតែពេញក្រមុំ កុំឆាឆៅកម្ពុជាមិនឲ្យអ្នកណាមករំលោភបានឡើយ ។ លោកថា៖ «ហើយមន្ដ្រីនៅក្នុងស្ថានទូត (ទូតអាមេរិក) ដែលប្រើប្រាស់លក្ខណៈព្រៃផ្សៃ គួរតែបញ្ចប់នេះជាសំណូមពររបស់យើង ។ ត្បិតយើងជាមិត្តជាមួយគ្នា ហើយ បើមន្ដ្រីនោះមិនពេញចិត្តស្រុកខ្មែរវេចឥវ៉ានចេញទៅវិញទៅយើងអត់ស្វាគមន៍ទេ អាហ្នឹង» ។ អ្នកនាំពាក្យបញ្ជាក់ថា គ្មានប្រទេសណាមួយជាចៅហ្វាយកម្ពុជាទេ ខណៈលោកអះ អាងថា ចិន-អាមេរិក មិនមែនជាចៅហ្វាយកម្ពុជាឡើយ ។ លោកថា ចៅហ្វាយរបស់កម្ពុជា គឺជាប្រជាពលរដ្ឋខ្មែរទូទាំងប្រទេស ។
សូមជម្រាបថា ការលើកឡើងរបស់លោក ផៃ ស៊ីផាន លើកបែបនេះបន្ទាប់ពីស្ថានទូតអាមេរិកប្រចាំកម្ពុជា កាលពីថ្ងៃទី៣០ កក្កដា បានសរសេរលើបណ្ដាញសង្គមហ្វេសប៊ុក ថា រដ្ឋាភិបាលអាមេរិកកត់សម្គាល់ខួប១ឆ្នាំនៃការបោះឆ្នោតនៅកម្ពុជាមានកំហុសឆ្គងយ៉ាងខ្លាំង ។ អាមេរិកថ ការបោះឆ្នោតនេះមិនមានភាពសេរី និងយុត្តិធម៌ក៏មិនតំណាងឲ្យឆន្ទៈរបស់ពលរដ្ឋឡើយ ។ ជាងនេះស្ថាតទូតបានស្នើឲ្យមានការទម្លាក់បទចោទប្រកាន់ទៅលើកកឹម សុខា អតីតប្រធានគណបក្សសង្គ្រោះជាតិថែមទៀត ។ មួយរយៈពេលកន្លងមកនេះស្ថានទូតអាមេរិកប្រចាំកម្ពុជា តែងតែវាយប្រហារមកលើរាជរដ្ឋាភិបាលជាបន្តបន្ទាប់ពាក់ព័ន្ធនឹងបញ្ហានយោបាយរបស់បក្សប្រឆាំង ៕ កែសម្រួលដោយ ៖សុឃាក់
ចែករំលែកព័តមាននេះ