រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់បានកាត់សំណាញ់របងរោងចក្រកាត់ដេរមួយកន្លែង រួចផ្លោះចូលក្នុងដើម្បីលួចយកក្រណាត់ក្នុងរោងចក្រ ប៉ុន្តែសំណាងអាក្រក់មិនទាន់បានលួចផង ក៏ត្រូវសន្តិសុខប្រទះឃើញទាន់បង្កឱ្យមានការភ្ញាក់ផ្អើលកាលពីម៉ោង៩និង៤០នាទីយប់ ថ្ងៃទី៣០ ខែកក្កដា ឆ្នាំ២០១៩ នៅចំណុចក្នុងបរិវេណរោងចក្រគង់ហុង ស្ថិតក្នុងភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ ។
ជនសង្ស័យខាងលើឈ្មោះ ស៊ុន សារ៉េត អាយុ៣៩ឆ្នាំ មានមុខរបរ និងការស្នាក់នៅមិនពិតប្រាកដឡើយ ហើយក្រុមសន្តិសុខធ្វើការដកហូតបានដែកកាប់១ ពិល១ និងថ្នាំញៀន២កញ្ចប់ថង់តូចផងដែរ។ រីឯអ្នកដាក់ពាក្យប្ដឹងតំណាងឲ្យថៅកែរោងចក្រនោះឈ្មោះ កែវ វុទ្ធធឿន ភេទប្រុស អាយុ៣៥ឆ្នាំ មុខរបររដ្ឋបាលរោងចក្រ បច្ចុប្បន្នស្នាក់នៅផ្ទះលេខ១៧២ ផ្លូវBT31 ភូមិសន្សំកុសល សង្កាត់បឹងទំពុន ខណ្ឌមានជ័យ។
បើតាមសន្តិសុខបានឲ្យដឹងថា នៅមុនកើតហេតុ គាត់បានឃើញជនសង្ស័យខាងលើមកអង្គុយលេងនៅផ្លូវរថភ្លើងដែលស្ថិតនៅក្បែររោងចក្រនោះដែរ លុះមកដល់វេលាកើតហេតុ ជនសង្ស័យរូបនោះបានដើរទៅក្នុងស្ថានីយប្រេងឥន្ធនៈនៅជាប់របងរោងចក្រ រួចហើយក៏ធ្វើសកម្មភាពកាត់សំណាញ់របង១ប្រឡោះ។ បន្ទាប់មកផ្លោះចូលទៅក្នុងរោងចក្រដើម្បីលួចក្រណាត់ ប៉ុន្តែត្រូវពួកគាត់ប្រទះឃើញទាន់ក៏ឃាត់ខ្លួនប្រគល់ជូននគរបាលប៉ុស្តិ៍កន្ទោកនាំទៅសាកសួរតែម្តង ។
ប្រភពដដែលបន្តថា ខណៈនោះជនសង្ស័យសារភាពថា ខ្លួនពិតជាផ្លោះរបងចូលទៅក្នុងរោងចក្រដើម្បីលួចក្រណាត់ពិតមែន ប៉ុន្តែមិនទាន់បានលួចផង ក៏ត្រូវក្រុមសន្តិសុខចាប់ខ្លួនបែបនេះ ។ ចំណែកនគរបាលក្រោយពីសាកសួររួចរាល់ ក៏បានកសាងសំណុំរឿងដើម្បីបញ្ជូនជននេះ ទៅកាន់សាលាដំបូងរាជធានីភ្នំពេញ ចាត់ការតាមច្បាប់ហើយ។ (កែសម្រួលដោយ ៖ បុប្ផា)
ចែករំលែកព័តមាននេះ