រាជធានីភ្នំពេញ៖ ក្នុងរយៈពេល ៦ ខែដើមឆ្នាំ ២០១៩ នេះ ការផ្តល់ឥណទានសរុបរបស់គ្រឹះស្ថានធនាគារ និងហិរញ្ញវត្ថុមានទឹកប្រាក់ប្រមាណ ២៧ ប៊ីលានដុល្លារអាមេរិកកើនឡើងប្រមាណ…
រាជធានីភ្នំពេញ៖ ក្នុងរយៈពេល ៦ ខែដើមឆ្នាំ ២០១៩ នេះ ការផ្តល់ឥណទានសរុបរបស់គ្រឹះស្ថានធនាគារ និងហិរញ្ញវត្ថុមានទឹកប្រាក់ប្រមាណ ២៧ ប៊ីលានដុល្លារអាមេរិកកើនឡើងប្រមាណ ២២% ។ នេះបើតាមធនាគារជាតិនៃកម្ពុជា ។
យោងតាមរបាយការណ៍ប្រចាំឆមាសទី ១ របស់ធនាគារជាតិនៃកម្ពុជាបានឱ្យដឹងថា ឥណទានរបស់គ្រឹះស្ថានធនាគារ និងហិរញ្ញវត្ថុមានកំណើន ២២,៤% កើនដល់ជាង ២៧ ប៊ីលានដុល្លារអាមេរិក ។ ឥណទានសរុបរបស់គ្រឹះស្ថានធនាគារមានជាង ២១ ប៊ីលានដុល្លារអាមេរិក និងបានផ្តល់ទៅកាន់វិស័យសេដ្ឋកិច្ចសំខាន់ដូចជាការជួញដូររាយ ១៦%, ការជួញដូរដុំ១១%, ការខ្ចីទិញលំនៅឋានជាកម្មសិទ្ធិផ្ទាល់ខ្លួន ១០% , កសិកម្ម ៩%, សំណង់១០%, តម្រូវការផ្ទាល់ខ្លួន ៨%, ការជួញដូរអចលនទ្រព្យ ៧%, និងកម្មន្តសាលកម្ម ៥% ។ គ្រឹះស្ថានមីក្រូហិរញ្ញវត្ថុបានផ្តល់ឥណទានសរុបមានទឹកប្រាក់ ៦,២ ប៊ីលានដុល្លារអាមេរិក ទៅកាន់ក្រុមគ្រួសារ ៣៦%, វិស័យកសិកម្ម ២០%, វិស័យពាណិជ្ជកម្ម ១៨%, សេវា ១៣%និងសំណង់ ៣% ។
លោក ចូវ សោភ័ណ្ឌ នាយកប្រតិបត្តិសមាគមមីក្រូហិរញ្ញវត្ថុមានប្រសាសន៍ថា គិតត្រឹមត្រីមាសទី ២ (៦ខែ) ដើមឆ្នាំ ២០១៩ នេះការផ្តល់ឥណទាននៅក្នុងវិស័យមីក្រូហិរញ្ញវត្ថុជារួម មានទឹកប្រាក់ជាង ៦ ពាន់លានដុល្លារអាមេរិក មានកំណើនប្រមាណ ១៦% ។ អ្នកប្រើប្រាស់សេវាឥណទានមានជាង ២,១ លាននាក់ ហើយប្រាក់បញ្ញើសន្សំទទួលពីអតិថិជនមានប្រមាណ ២.៥៤៣ លានដុល្លារ មានកំណើនជាង ២០%, អ្នកប្រើប្រាស់សេវាប្រាក់បញ្ញើរសន្សំមានជាង ២,៥ លាននាក់ ។ លោកលើកឡើងថា កាលពីឆ្នាំ ២០១៨ គិតត្រឹមត្រីមាសទី ២ ដូចគ្នា ការផ្តល់ឥណទាន មានកំណើនប្រមាណ ១២% ហើយប្រាក់បញ្ញើសន្សំ មានកំណើនប្រមាណ ១២.៨៣% ។ ឥណទានមិនដំណើរការជាមធ្យមមានអត្រាប្រមាណជា ១% មានន័យថាអតិថិជនមានលទ្ធភាពសងត្រលប់បានល្អ និងទៀងទាត់ ។
នាយកប្រតិបត្តិសមាគមគូសបញ្ជាក់ថា «យោងតាមរបាយការណ៍ឥណទាន និងប្រាក់បញ្ញើសន្សំដែលសមាគមទទួលបានពីសមាជិកក្នុងរយៈពេល ៦ ខែឆ្នាំ ២០១៩ នេះ បង្ហាញឲ្យឃើញថា ការផ្តល់ឥណទានមានការកើនប្រហែល ១៦ ភាគរយ និងការទទួលប្រាក់បញ្ញើពីអតិថិជន មានការកើនប្រហែល ២០ ភាគរយ ។ កត្តាមួយចំនួនដែលជំរុញឱ្យមានកំណើនរួមមាន ៖ ស្ថេរភាពនយោបាយ និងសន្តិភាពក្នុងប្រទេស ដែលទាក់ទាញការវិនិយោគ, ស្ថេរភាពម៉ាក្រូសេដ្ឋកិច្ច, កំណើនផលិតផលក្នុងស្រុកសរុប និងសកម្មភាពសេដ្ឋកិច្ចដែលគាំទ្រកំណើន,ទំនុកចិត្ត និងតម្រូវការសេវាហិរញ្ញវត្ថុសម្បូរបែប ដែលផ្តល់ដោយគ្រឹះស្ថានមីក្រូហិរញ្ញវត្ថុ, ការពង្រីកប្រព័ន្ធសេវា និងផ្តល់ភាពងាយស្រួលក្នុងការទទួលបានផលិតផល និងសេវាហិរញ្ញវត្ថុ, ចំណេះដឹងផ្នែកហិរញ្ញវត្ថុរបស់អតិថិជនលើការប្រើប្រាស់ផលិតផល និងសេវាហិរញ្ញវត្ថុមានភាពប្រសើរឡើង និងការផ្តល់សេវាហិរញ្ញវត្ថុប្រកប ដោយការទទួលខុសត្រូវដោយគ្រឹះស្ថានមីក្រូហិរញ្ញវត្ថុ ដូចជា ការអនុវត្តគោលការណ៍ការពារអតិថិជនជាដើម» ។
យោងតាមធនាគារជាតិនៃកម្ពុជា វិស័យធនាគារ និងហិរញ្ញវត្ថុបន្តរីកចម្រើនទាំងទំហំ និងវិសាលភាពប្រកបដោយបរិយាប័ន្នដោយបច្ចុប្បន្នវិស័យធនាគាររួមមាន ៖ ធនាគារពាណិជ្ជ៤៤, ធនាគារឯកទេស ១៥, គ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជន ៧, គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ ៧៤, គ្រឹះស្ថានឥណទានជនបទ ២៥៤, ក្រុមហ៊ុនភតិសន្យាហិរញ្ញវត្ថុ ១៥, អ្នកដំណើរការតតិយភាគី ៤ និងគ្រឹះស្ថានសេវាទូទាត់ ១៦ ។ ទ្រព្យសកម្មរបស់គ្រឹះស្ថានធនាគារ និងមីក្រូហិរញ្ញវត្ថុបានកើនឡើង ១៩% ដល់ ១៨០ ទ្រីលានរៀល ឬស្មើ ៤៤,៨ ប៊ីលានដុល្លារអាមេរិក ដែលគាំទ្រដោយកំណើនដើមទុន ២០% កំណើនមូលនិធិកម្ចី ១៧% និងកំណើនប្រាក់បញ្ញើអតិថិជន ២២% ។ ជាមួយគ្នាបណ្តាសាខារបស់គ្រឹះស្ថានធនាគារ និងហិរញ្ញវត្ថុបានកើនដល់ជាង ២,៣ ពាន់កន្លែង, ម៉ាស៊ីនដកប្រាក់ និងដាក់ប្រាក់ដោយស្វ័យប្រវត្តិមានជាង ២,២ ពាក់គ្រឿង ។
ទន្ទឹមនឹងវិស័យធនាគារ និងហិរញ្ញវត្ថុមានការរីកចម្រើនបើតាមធនាគារជាតិ អង្គភាពស៊ើបការណ៍ហិរញ្ញវត្ថុកម្ពុជាបានបន្តពង្រឹងប្រតិបត្តិការប្រឆាំងការសម្អាតប្រាក់ និងហិរញ្ញប្បទានភេរវកម្ម តាមរយៈការពង្រឹងការងារទទួល វិភាគ និងបញ្ជូនរបាយការណ៍ និងការចុះត្រួតពិនិត្យគ្រឹះស្ថានធនាគារ និងហិរញ្ញវត្ថុ ។ ស.ហ.ក បានលើកកម្ពស់ការយល់ដឹងពីបទប្បញ្ញត្តិ និងយន្តការប្រឆាំងការសម្អាតប្រាក់ និងហិរញ្ញប្បទានភេរវកម្មដល់វិស័យសាធារណៈ និងឯកជន ព្រមទាំងបានបន្តពង្រឹងកិច្ចសហប្រតិបត្តិការទាំងក្នុងស្រុក និងអន្តរជាតិ ។ ទន្ទឹមនេះ ស.ហ.ក បានរៀបចំសម្ពោធដាក់ឱ្យប្រើប្រាស់ជាផ្លូវការនូវយុទ្ធសាស្ត្រជាតិ ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ឆ្នាំ ២០១៩-២០២៣ ដែលជាមគ្គុទ្ទេសក៍រយៈពេលវែង ៕ កែសម្រួលដោយ ៖សុឃាក់
ចែករំលែកព័តមាននេះ