ប្រទេសអាហ្វហ្គានីស្ថាន ៖ បើតាមអាជ្ញាធរគូសបញ្ជាក់ថា មនុស្សយ៉ាងតិច២៨នាក់ ពិសេសនារី និងកុមារបានត្រូវស្លាប់ កាលពីព្រឹកថ្ងៃទី៣១ ខែកក្កដា ឆ្នាំ២០១៩ នៅភាគខាងលិចអាហ្វហ្គានីស្ថាន ពេលរថយន្តបឺសមួយគ្រឿងត្រូវគ្រាប់មីនដែលដាក់នៅគាមថ្នល់ដោយពួកតាលីបង់។
អ្នកនាំពាក្យម្នាក់របស់ប៉ូលិសខេត្តហ្វារ៉ាហ៍នាភាគខាងលិចអាហ្វហ្គានីស្ថាននិយាយថា នាព្រឹកនោះវេលាម៉ោង៦ម៉ោងក្នុងស្រុក រថយន្តបឺសមួយគ្រឿងដែលរត់រវាងក្រុងកាន់ដាហារនិងក្រុងហេរ៉ាត បានត្រូវគ្រាប់មីនដែលពួកតាលីបង់ដាក់នៅគាមថ្នល់។ សម្រាប់ពេលនេះមានអ្នកស្លាប់២៨នាក់ហើយមនុស្ស១០នាក់ទៀតរងរបួស។ លោកថាមីននោះដាក់សំដៅវាយប្រហារលើកងកម្លាំងសន្តិសុខ។ ចំនួនជនរងគ្រោះអាចមានច្រើនជាងនេះទៀត។
អ្នកស្លាប់ថ្មីទាំងនេះកើតមានបន្ទាប់ពីការចេញផ្សាយរបាយការណ៍មួយរបស់អ.ស.បដែលថា គួរឲ្យសោកស្ដាយដែលបណ្ដាជនស៊ីវិល បន្តស្លាប់និងរបួសក្នុងចំនួនមិនអាចទទួលយកបាន ក៏ទោះបីមានការចរចាគ្នាដែលសំដៅបញ្ចប់សង្គ្រាមច្រើនទសវត្សមកហើយក្ដី។ របាយការណ៍នេះនិយាយថា ទោះមានការចុះថយ២៧%នៃចំនួនជនរងគ្រោះ ក្នុងឆមាសទីមួយនៃឆ្នាំ២០១៩នេះ បើប្រៀបធៀបទៅនឹងរយៈពេលដូចគ្នានេះក្នុងឆ្នាំ២០១៨ក្ដី តែជនស៊ីវិល១៣៦៦នាក់បានត្រូវស្លាប់និង២៤៤៦នាក់រងរបួសដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ