រាជធានីភ្នំពេញ ៖ «ខ្ញុំចង់ឲ្យមានការប្រើប្រាស់លុយរៀលឲ្យបានទូលំទួលាយជាងនេះ ក៏ប៉ុន្តែបញ្ហានោះគឺថានៅពេលទៅទិញឥវ៉ា់ន់ កម្រមានអ្នកលក់ដូរឆ្លើយថាឥវ៉ាន់នេះតម្លៃប៉ុណ្ណេះរៀលនោះទេ ។ អ្នកលក់គឺតែងតែថា ផលិតផលនេះតម្លៃ ៣០ ដុល្លារ ឬ ៤០ ដុល្លារជាដើម»។ នេះជាការលើកឡើងរបស់អ្នកនាង សុគា បុគ្គលិកក្រុមហ៊ុនមួយ ។
ជាមួយគ្នានោះផងដែរ បងប្អូនខ្លះទៀតបានប្រាប់អ្នកយកព័ត៌មានថា «លុយដុល្លារស្រួលទុកដាក់ជាងលុយរៀល ព្រោះដុល្លារក្រដាសប្រាក់ធំៗ ។មានន័យថា បើគេមាន២០ដុល្លារគិតជាលុយខ្មែរជាង៨ម៉ឺនរៀល ស្មើនឹងក្រដាស១ម៉ឺន៨សន្លឹក តែបើក្រដាសប្រាក់នោះតូចជាង១ម៉ឺនដូចជា៥០០០រៀល វាស្មើនឹង១៦សន្លឹកទៅហើយ» ។ យ៉ាងណាមិញ នៅក្នុងរយៈពេលប្រមាណ៤ឆ្នាំកន្លងទៅនេះ ធនាគារជាតិដែលជាធនាគារកណ្ដាលរបស់កម្ពុជា បានព្យាយាមបំផុសនិងជំរុញអោយពលរដ្ឋងាកមកប្រើប្រាស់ប្រាក់រៀល រូបិយបណ្ណជាតិកាន់តែច្រើន ស្របពេលប្រជាពលរដ្ឋកម្ពុជាមួយចំនួននៅតែបន្តប្រើប្រាស់ប្រាក់ដុល្លារច្រើនជាងប្រាក់រៀល ។
យោងតាមប្រសាសន៍លោកជា ចាន់តូ ទេសាភិបាលធនាគារជាតិនៃកម្ពុជា ថ្លែងនៅក្នុងសន្និបាតបូកសរុបការងារប្រចាំឆមាសកាលពីចុងសប្ដាហ៍កន្លងទៅនេះថា ការងារអាទិភាពរបស់ធនាគារជាតិនៃកម្ពុជា ដែលជាធនាគារកណ្ដាលនៅតែបន្តជំរុញអោយមានការប្រើប្រាស់ប្រាក់រៀលអោយបានកាន់តែច្រើនឡើងថែមទៀត បើទោះបីជារយៈពេល៣ឆ្នាំចុងក្រោយនេះ ការប្រើប្រាស់ប្រាក់រៀលនៅកម្ពុជាមានភាពល្អប្រសើរជាងមុន ។ លោកបានថា «រយៈពេល៣ឆ្នាំចុងក្រោយនេះ តម្រូវការប្រើប្រាស់ប្រាក់រៀលនៅកម្ពុជា បានកើនឡើងគួរឱ្យកត់សម្គាល់ ដែលជាកត្តាចំបងមួយតម្រូវឱ្យធនាគារជាតិនិងភាគីពាក់ព័ន្ធត្រូវបង្កើនការយកចិត្តទុកដាក់ និងចាត់ទុកការងារជំរុញប្រើប្រាស់ប្រាក់រៀលជាការងារអាទិភាព» ។ លោកបន្តថា ដើម្បីលើកកម្ពស់នូវការប្រើប្រាស់ប្រាក់រៀលនៅកម្ពុជាបន្ថែមទៀតនោះ លោកបានស្នើឱ្យភាគីពាក់ព័ន្ធទាំងឡាយត្រូវចូលរួមឱ្យបានកាន់តែច្រើនថែមទៀតគាំទ្រ និងជំរុញការប្រើប្រាស់ប្រាក់រៀលខ្មែរ និងដើម្បីឈានទៅរកភាពជោគជ័យមួយលើការប្រើប្រាស់ប្រាក់រៀលប្រកបដោយប្រសិទ្ធភាព ។
សូមរំលឹកថា ក្រោយពេលរាជរដ្ឋាភិបាលបានអំពាវនាវឱ្យមាន ការប្រើប្រាស់ប្រាក់រៀល នៅលើទីផ្សារហិរញ្ញវត្ថុគេមើលឃើញថាមានស្ថាប័នពាក់ព័ន្ធមួយចំនួនបានចាប់ផ្ដើមនិងបន្តអនុវត្តន៍គោលការណ៍របស់ខ្លួន ដើម្បីជំរុញនិងលើកកម្ពស់ប្រាក់រៀលនៅកម្ពុជា ជាក់ស្ដែងបណ្ដាធនាគារនិងមីក្រូហិរញ្ញវត្ថុមួយចំនួនបានបានលើកទឹកចិត្តដល់អតិថិជនរបស់ខ្លួន ដែលយកប្រាក់រៀលមកដាក់សន្សំនៅក្នុងប្រព័ន្ធធនាគារ និងមីក្រូហិរញ្ញវត្ថុ ដោយបានផ្ដល់ការប្រាក់ខ្ពស់ ។ ក្រៅពីនោះដែរ ធនាគារនិងមីក្រូហិរញ្ញវត្ថុមួយចំនួននៅកម្ពុជា ក៏បានបញ្ចុះអត្រាការប្រាក់សម្រាប់ឥណទានជាប្រាក់រៀល ។
បើតាមអ្នកជំនាញផ្នែកហិរញ្ញវត្ថុមួយរូប លោក ជាម ទៀង បានលើកឡើងថា តម្រូវការប្រាក់រៀលត្រូវបានគេមើលឃើញថាមានកំនើនខ្ពស់ទៅតាមរដូវ និងពេលវេលា ជាក់ស្ដែងនៅរៀងរាល់ចុងឆ្នាំ និងដើមឆ្នាំ ប្រាក់រៀលខ្មែរមានតម្រូវការខ្ពស់បើធៀបនឹងពេលវេលាផ្សេងទៀត ។ មូលហេតុដែលមានតម្រូវការខ្ពស់ដោយសារតែនៅដើមឆ្នាំការបង់ពន្ធនានា ត្រូវបានចាប់ផ្ដើម ហើយតម្លៃពន្ធទាំងនោះត្រូវគិតជារៀល ដូច្នេះទើបអ្នកជាប់ពន្ធត្រូវស្វងរកប្រាក់រៀលដើម្បីទៅបង់ជូនរដ្ឋ ។ ម្យ៉ាងទៀតនៅចុងឆ្នាំក៏មិនខុសគ្នា ជាពិសេសនៅរដូវកាលនេះ ជារដូវកាលដែលប្រជាជនកម្ពុជាប្រារព្ធពិធី បុណ្យភ្ជុំ និងកឋិន ហើយពួកគាត់ត្រូវការប្រាក់រៀលខ្មែរ ដើម្បីធ្វើទាននៅតាមវត្តអារាមឬជាមួយសាច់ញាតិជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ