ក្រុងហុងកុង ៖ រដ្ឋាភិបាលចិនកាលពីថ្ងៃទី២៩កក្កដា បានផ្ដល់ប័ណ្ណដើរផ្លូវរបស់ខ្លួនដល់់រដ្ឋាភិបាលក្រុងហុងកុង ក្រោយពីបាតុកម្មថ្មីៗក្នុងក្រុងអតីតអាណានិគមអង់គ្លេសនោះ។ កាលពីយប់ថ្ងៃទី២៨កក្កដាពួកបាតុករស្និទ្ធលទ្ធិប្រជាធិបតេយ្យ បានលើកគ្នាធ្វើបាតុកម្ម២ថ្ងៃជាប់ៗគ្នា ហើយប៉ះទង្គិចជាមួយកងកម្លាងប៉ូលិស។
ក្នុងស្ថានភាពបែបនេះគេរង់ចាំមើលប្រតិកម្មរបស់ក្រុងប៉េកាំង ប៉ុន្តែការិយាល័យកិច្ចការហុងកុងនិងម៉ាកាវរបស់ចិន ហាក់បង្ហាញពីការគាំទ្ររបស់ក្រុងប៉េកាំង ចំពោះប្រមុខប្រតិបត្តិក្រុងហុងកុងលោកស្រីCARRIE LAMនិងប៉ូលិសមូលដ្ឋាន ដោយថ្កោលទោសបាតុកម្មដែលធ្វើឲ្យប៉ះពាល់ដល់ភាពរុងរឿងនិងស្ថេរភាពក្នុងដែនដីនោះ។
អ្នកនាំពាក្យម្នាក់របស់ការិយាល័យនោះលោកស្រីXU LUYINGថ្លែងថា សម្រាប់ពេលនេះយើងយល់ថា ភារកិច្ចជាអាទិភាពរបស់ក្រុងហុងកុង គឺដាក់ទោសបណ្ដាសកម្មភាពហិង្សានិងខុសច្បាប់យោងទៅតាមច្បាប់ ស្ដារសណ្ដាប់ធ្នាប់ឡើងវិញឲ្យបានឆាប់រហ័សនិងថែរក្សាបរិយាកាសល្អសម្រាប់ការធ្វើពាណិជ្ចកម្ម។ គ្មានសង្គមស៊ីវីល័យណាអាចអនុគ្រោះដល់អំពើហិង្សាថោកទាបឡើយ។
បាតុកម្មនៅក្រុងហុងកុងចាប់ផ្ដើមកើតមានពីដើមខែមិថុនាមក តាមរយៈជាការតវ៉ាប្រឆាំងគម្រោងច្បាប់ធ្វើបត្យាប័នទៅចិនដីគោក តែទោះគម្រោងច្បាប់នេះត្រូវបានផ្អាក ក៏បាតុកម្មនៅបន្តច្រើនសប្ដាហ៍មកហើយ និងមានការទាមទារកាន់តែធំ ក្លាយជាការប្រឈមធំមួយរបស់ចិនពុំធ្លាប់មានចាប់តាំងពីការប្រគល់ដែនដីហុងកុងទៅឲ្យចិនវិញពីឆ្នាំ១៩៩៧មក។
អ្នកនាំពាក្យចិនម្នាក់ទៀតលោកYANG GUANGពេលឆ្លើយនឹងសំនួរមួយនិយាយថា កាលពីសប្ដាហ៍មុនក្រសួងការពារប្រទេសបានលើកឡើងថា ច្បាប់ហុងកុងអនុញ្ញាតឲ្យមានការដាក់ពង្រាយកងទ័ពចិនតាមសំណើរបស់អាជ្ញាធរមូលដ្ឋាន ដើម្បីស្ដាររបៀបរៀបរយសាធារណៈឡើងវិញ។
លោកស្នើឲ្យមើលរដ្ឋធម្មនុញ្ញក្រុងហុងកុង តែមិនបញ្ជាក់អ្វីច្រើនទៀតឡើយ។ លោកYANG គូសបញ្ជាក់ថា អំពើហិង្សារបស់ជនរ៉ាឌីកាល់មួយក្ដាប់តូច ហួសពីព្រំដែនរបស់ប្រទេសមួយមានប្រព័ន្ធ២ ជាគោលការណ៍ដែលបានចែងមុនការប្រគល់ដែនដីហុងកុង មកឲ្យចិនវិញក្នុងឆ្នាំ១៩៩៧។ ពួកមនុស្សទាំងនេះគ្មានគិតអ្វីក្រៅពីសាបព្រោះភាពចលាចលនៅហុងកុង ហើយប្រែក្លាយជាបញ្ហាសម្រាប់ចិនឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ