រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា បុរសជាអ្នករស់នៅក្នុងខេត្តក្រចេះម្នាក់បានចាញ់បោកមេខ្យល់ ដែលបាននាំទៅកាន់ខេត្តព្រះសីហនុ ដោយមេខ្យល់បានប្រាប់ថានៅទីនោះមានការងារធ្វើអាចរកប្រាក់ចំណូលបានច្រើន លុះពេលគាត់យល់ព្រមទៅជាមួយខណៈនោះមេខ្យល់នោះបែរ ជានាំគាត់ទៅកាន់ខេត្តកំពតវិញ ។ បន្ទាប់មកបានល្បួងស៊ីចាយរហូតដល់អស់លុយកាក់ដែលមានបន្តិចបន្តួចពីខ្លួន ស្រាប់តែមេខ្យល់ខាងលើគេចខ្លួនបាត់ ចំណែកបុរសនេះជាមនុស្សមិនធ្លាប់ដើរឆ្ងាយរកផ្លូវត្រឡប់មកផ្ទះវិញមិនឃើញឡើយ ។
សេចក្តីរាយការណ៍បានបន្ត ដោយម្យ៉ាងអត់លុយមួយសេនជាប់ខ្លួនផងនោះ ទើបដាច់ចិត្តសុំរថយន្តគេជិះរហូតមកដល់ចោមចៅ និងក្រោយពីចុះពីរថយន្តក៏ចេះតែដើរគ្មានគោលដៅទាំងអត់បាយ អត់ទឹករហូតដល់ទន់ដៃជើង និងដួលទៅមុខលែងរួចតែម្ដង ។ ខណៈនោះប្រជាពលរដ្ឋរួមជាមួយកម្មករកម្មការិនីរោងចក្រកាត់ដេរ ព្រមទាំងនគរបាលបាននាំគ្នាជួយឲ្យបាយទឹកហូបរួម និងថវិកាមួយចំនួនជូនដល់គាត់ធ្វើសោហ៊ុយត្រឡប់ទៅផ្ទះវិញ ។
បុរសនេះត្រូវបានគេប្រទះឃើញដួលដេកនៅតាមផ្លូវ មុខរោងចក្រហេនសាំ ភូមិត្រពាំងជ្រៃ សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ និងបង្កឲ្យមានការភ្ញាក់ផ្អើល កាលពីវេលារសៀល ថ្ងៃទី៣០ ខែកក្កដា ឆ្នាំ២០១៩ ។ បុរសខាងលើនេះឈ្មោះ សឿន យ៉ុន អាយុ៤៤ឆ្នាំ មុខរបរកសិករ មានទីលំនៅក្នុងភូមិតាម៉ៅលើ ឃុំកំពង់គរ ស្រុកព្រែកប្រសព្វ ខេត្តក្រចេះ ។ មានប្រពន្ធឈ្មោះ សៀប អាយុ៤៥ឆ្នាំ មុខរបរកសិករ ។
គាត់បានរៀបរាប់ប្រាប់កម្មករ និងអ្នកភូមិថា កាលពីថ្ងៃទី១៩ ខែកក្កដាកន្លងមកមានបុរសអ្នកស្គាល់គ្នាម្នាក់ឈ្មោះ ភឿន បានបបួលគាត់ទៅការងារធ្វើនៅឯខេត្តព្រះសីហនុ ដោយប្រាប់ថានៅទីនោះមានការងារច្រើន អាចរកប្រាក់កម្រៃបានច្រើន ។ ខណៈនោះដោយសារតែជីវភាពក្រីក្រខ្លាំងពេក ហើយគ្មានមុខរបរអ្វីក្រៅពីការងារធ្វើស្រែចំការផងនោះ គាត់ក៏បានយល់ព្រមទៅជាមួយ និងជននោះ បន្ទាប់មកឈ្មោះភឿន បាននាំខ្លួនធ្វើដំណើរចេញពីស្រុកកំណើតទៅកាន់ខេត្តកំពត ។ និងបានស្នាក់នៅទីនោះជាច្រើនថ្ងៃ ព្រមទាំងល្បួងនាំចាយលុយអស់ ស្រាប់តែឈ្មោះ ភឿន បានគេចខ្លួនទៅចោលគាត់បាត់ដោយមិនដឹងថា ទៅណាឡើយ ចំណែករូបគាត់មិនដែលដើរផ្លូវឆ្ងាយទើបមិនបានស្គាល់ផ្លូវទៅណាមកណាឡើយ ម្យ៉ាងអត់លុយផងនោះ មានតែសុំឡានគេជិះ ដើម្បីត្រឡប់មកភ្នំពេញវិញ ។
អ្នកឃើញហេតុការណ៍បាននិយាយថា នៅមុនពេលកើតហេតុគាត់បានប្រទះឃើញបុរសខាងលើដើរក្នុងស្ថានភាពហេវហត់ បន្ទាប់មកស្រាប់តែដួលដេកទាំងកម្រោល ខណៈនោះបានបង្កឲ្យមានការភ្ញាក់ផ្អើលយ៉ាងខ្លាំង ។ ពេលនោះកម្មករ និងអ្នកភូមិបាននាំគ្នាជួយសង្គ្រោះ ហើយអ្នកខ្លះបានឲ្យបាយទឹកហូប និងអ្នកខ្លះបានជួយជាថវិកា ចំណែកនគរបាលបានហៅម៉ូតូកង់បីដឹកជូនទៅរករថយន្តឈ្នួល ដើម្បីឲ្យគាត់ជិះធ្វើដំណើរទៅកាន់ស្រុកកំណើតវិញ ៕ កែសម្រួលដោយ ៖ សុឃាក់
ចែករំលែកព័តមាននេះ