ខេត្តមណ្ឌលគិរី ៖ គណៈកម្មការថ្នាក់ជាតិដើម្បីទប់ស្កាត់ និងបង្ក្រាបធនធានធម្មជាតិ កាលថ្ងៃទី២៨ កក្កដា បានចុះត្រួតពិនិត្យរោងសន្និធិ ហៅឃ្លាំងស្តុកឈើ និងច្រកព្រំដែនដាក់ដាំនៅស្រុកអូររាំង និងច្រកព្រំដែនឡាប៉ាខេ ស្រុកកែវសីមា ។
ប្រភពបានឲ្យដឹងថា សមត្ថកិច្ចបានត្រួតពិនិត្យឃ្លាំងលួចស្តុកឈើចំនួន២កន្លែង គឺ១-ឃ្លាំងឈើស្ថិតនៅក្នុងស្រុកកែវសីមា ចម្ងាយពីព្រំដែន ច្រកឡាប៉ាខេ ប្រហែល៣គីឡូម៉ែត្រ ឃ្លាំងមួយមានច្បាប់អនុញ្ញាត ប៉ុន្តែមិនទាន់ដំណើរការនោះទេ គ្មានប្រភពណាប្រាប់ពីឈ្មោះមន្ត្រីដែលចេញច្បាប់ឱ្យធ្វើឃ្លាំងនេះទេ ។២-ឃ្លាំងឈើឈ្មោះ សួន គឹមហេង នៅក្នុងស្រុកកែវសីមា ចម្ងាយពីច្រកឡាប៉ាខេ ប្រហែលជាង៧គីឡូម៉ែត្រ មានស្តុកឈើចំនួន៩៨ម៉ែត្រគូប ដែលឈើនេះជំនាញរដ្ឋបាលព្រៃឈើបានចុះពិនិត្យឃើញឈើល្មើសលើសចំនួន៦២ម៉ែត្រគូប ប៉ុន្តែប្រភពឈើក្នុងឃ្លាំងដឹកពីក្រុមហ៊ុនថាច់វូដ ដែលក្រុមហ៊ុននេះបានប្រមូលកាប់ពីដែនខាងក្រៅអូសចូលក្រុមហ៊ុន (កន្ទេលធំបន្លំដេក ក្បាលទំពែកបន្លំកោ) ហេតុនេះក្រុមការងារសន្មត់ថាឈើទាំង៩៨ម៉ែត្រគូបនេះខុសច្បាប់ទាំងអស់ ។ សង្ស័យណាស់មានអ្នកតាម្ចាស់ស្រុកអាចជាប់ពាក់ព័ន្ធ ។
មានមជ្ឈដ្ឋានជាច្រើនកំពុងតែឆ្ងល់ថា តើហេតុអ្វីបានជាចេញច្បាប់ឱ្យក្រុមឈ្មួញមានសិទ្ធិធ្វើឃ្លាំងស្តុកឈើនៅជិតព្រំដែនយួនបែបនេះ ? ដោយសារប្រការអស់នឹងហើយបានឈើស្រុកខ្មែរចូលទៅស្រុកយួនស្ទើរអស់បែបនេះ ។
ឱ ! ម្ចាស់ទឹក ម្ចាស់ដីខេត្តព្រៃឈើទាំងឡាយអើយ…បង្កើតឱ្យមានច្បាប់សម្រាប់ដុតខ្លួនឯងយ៉ាងនេះឬមួយបង្កើតឡើងសម្រាប់ប្រមូលវេច ?ឃ្លាំង២នេះហើយឱ្យឈ្មោះថា «កន្ទេលធំបន្លំដេក ក្បាលទំពែកបន្លំកោរ» យ៉ាងពិតប្រាកដ ។
ប្រភពបន្តថា នៅក្នុងឃ្លាំងស្តុកឈើក្នុងព្រៃនេះមិនឃើញមានម្ចាស់ ប៉ុន្តែមានបុរសម្នាក់ បានអះអាងថា ជាតំណាងក្រុមហ៊ុន ឈ្មោះ ធឿន កើត បានយកឯកសារមកបំភ្លឺជូនសមត្ថកិច្ចថា មានជនជាតិវៀតណាមម្នាក់ឈ្មោះ ប៊ីញ ជាយោធាវៀតណាមថ្នាក់វរសេនីយ៍ទោបានផ្តល់ប្រាក់រាប់ម៉ឺនរាប់សែនដុល្លារឱ្យទៅឈ្មោះ សួន គឹមហេង ម្ចាស់ឃ្លាំងឈើ និងឈ្មួញវៀតណាមម្នាក់ឈ្មោះ វ៉ាង ដើម្បីបង្កើតឃ្លាំងស្តុកឈើនេះនៅជិតព្រំដែន ដើម្បីដឹកឈើទៅប្រទេសវៀតណាម និងបានកក់លុយឱ្យក្រុមហ៊ុនថាច់វូដ ៥ម៉ឺនដុល្លារថ្មីៗនេះដើម្បីឱ្យក្រុមហ៊ុនប្រមូលឈើផ្គត់ផ្គង់ឱ្យដេប៉ូរបស់ខ្លួននៅស្រុកយួន ។
មានមតិខ្លះលើកឡើងថា គួរតែលុបបំបាត់ឈ្មោះឃ្លាំងឈើទាំងអស់នេះចោលទៅ ឬដុតចោលឱ្យដូចដុតឡានដឹកឈើ ទើបអស់ឈ្មួញកាប់ឈើពីខេត្តមណ្ឌលគិរីនាំទៅស្រុកយួន ៕
ចែករំលែកព័តមាននេះ