ខេត្តកំពង់ធំ ៖ បុរសម្នាក់បានលង់ទឹករណ្តៅស្រះ បណ្ដាលឲ្យស្លាប់ បង្កការភ្ញាក់ផ្អើលកាលពីព្រឹកថ្ងៃទី២៩ ខែកក្កដា ឆ្នាំ២០១៩ នៅចំណុចកសិដ្ឋានក្រុមហ៊ុនបារៀ កំពង់ធំអភិវឌ្ឍន៍កៅស៊ូ ស្ថិតក្នុងភូមិថ្មសំលៀង ឃុំក្រយា ស្រុកសន្ទុក ខេត្តកំពង់ធំ ។
ជនរងគ្រោះដែលស្លាប់ឈ្មោះ ហែម ភព ភេទប្រុស អាយុ៤០ឆ្នាំ មុខរបរកម្មករ រស់នៅភូមិសង្កែជ្រុំ ឃុំឈូកខ្សាច់ ស្រុកបារាយណ៍ បច្ចុប្បន្នមកធ្វើជាកម្មករចៀជ័រកៅស៊ូ នៅកន្លែងកើតហេតុខាងលើ ។
តាមការបំភ្លឺរបស់ឈ្មោះ ផាន ភុន ភេទស្រី អាយុ៣៦ឆ្នាំ ត្រូវជាប្រពន្ធរបស់ជនរងគ្រោះបានប្រាប់ឱ្យដឹងថា ប្ដីគាត់មានជំងឺឆ្កួតជ្រូក និងតែងតែប្រកាច់ជាញឹកញាប់ តែត្រូវបានគ្រួសារបងប្អូនឃើញជួយសង្គ្រោះទាន់ពេលវេលា ។
តាមការបំភ្លឺរបស់ឈ្មោះ តោ សុខអាន់ ភេទប្រុស អាយុ៤០ឆ្នាំ ជាបងថ្លៃរបស់ជនរងគ្រោះនិងជាកម្មករចៀរជ័រកៅស៊ូជាមួយជនរងគ្រោះបានរៀបរាប់ឱ្យដឹងថា កាលពីរសៀលថ្ងៃទី២៨ ខែកក្កដា ឆ្នាំ២០១៩ ជនរងគ្រោះបានទៅស៊ីឈ្នួលលើកដីឱ្យឈ្មោះតា ភឿង ជាអ្នកម៉ៅការសំណង់ផ្ទះកម្មករនៅកសិដ្ឋានក្នុងកន្លែងធ្វើការនៅខាងត្បូងកសិដ្ឋានចំងាយប្រហែល២០០ម៉ែត្រ ។
តាមប្រភពដដែលបានបន្តថា ខណៈនោះមេឃភ្លៀងខ្លាំង គាត់ពុំឃើញជនរងគ្រោះមកផ្ទះវិញទេ ដោយនឹកស្មានថាជនរងគ្រោះដើរទៅលេងផ្ទះគេជិតខាង លុះព្រឹកឡើងក៏នាំគ្នាដើររក ស្រាប់តែប្រទះឃើញសពជនរងគ្រោះនៅក្នុងទឹករណ្ដៅស្រះអាអុិចកាយដើម្បីធ្វើបង្គន់ និងបានឃើញរទេះរុញដីមួយនៅក្បែរមាត់រណ្ដៅ នោះផងដែរ លុះពេលឃើញដូច្នេះក៏នាំគ្នាចុះស្រង់សពជនរងគ្រោះចេញពីក្នុងទឹករណ្ដៅយកមកកាន់កន្លែងស្នាក់នៅរបស់ជនរងគ្រោះក្នុងកសិដ្ឋាន ដើម្បីរាយការណ៍ជូនសមត្ថកិច្ចឱ្យចុះមកពិនិត្យ។
ក្រោយពេលទទួលបានព័ត៌មានខាងលើភ្លាម កម្លាំងជំនាញសហការជាមួយកម្លាំងនគរបាលប៉ុស្តិ៍រដ្ឋបាល និងបុគ្គលិកក្រុមហ៊ុននាំគ្នាចុះទៅពិនិត្យដល់កន្លែងកើតហេតុ និងពិនិត្យសពជនរងគ្រោះរកពុំឃើញមានស្លាកស្នាមអ្វីគួរកត់សម្គាល់ឡើយ សមត្ថកិច្ចបានសន្និដ្ឋានថា ជនរងគ្រោះពិតជាស្លាប់ដោយសារលង់ទឹករណ្តៅដីប្រាកដមែន ហើយមូលហេតុបណ្តាលមកពីជនរងគ្រោះមានជំងឺឆ្កួតជ្រូកប្រកាច់ធ្លាក់ចូលក្នុងទឹករណ្តៅ លុះពេលមិនមានអ្នកណាដឹង ទើបបណ្តាលឱ្យលង់ទឹករណ្តៅស្លាប់បែបនេះ។ បន្ទាប់ពីពិនិត្យរួច សមត្ថកិច្ចបានប្រគល់សពជូនគ្រួសារដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ