ខេត្តមណ្ឌលគិរី ៖ អាជ្ញាធរខេត្តមណ្ឌលគិរី ក្រោមការដឹកនាំបញ្ជាផ្ទាល់ពីសំណាក់លោក ស្វាយ សំអ៊ាង អភិបាលខេត្តបានចុះដករបងថ្មរាប់រយបង្គោល ដែលជនខិលខូចបោះព័ទ្ធរំលោភយកដីគម្រោងសាងសង់ព្រលានយន្តហោះ ដែលមានទីតាំងនៅភូមិពូហ្សាម ឃុំសែនមនោរម្យ…
ខេត្តមណ្ឌលគិរី ៖ អាជ្ញាធរខេត្តមណ្ឌលគិរី ក្រោមការដឹកនាំបញ្ជាផ្ទាល់ពីសំណាក់លោក ស្វាយ សំអ៊ាង អភិបាលខេត្តបានចុះដករបងថ្មរាប់រយបង្គោល ដែលជនខិលខូចបោះព័ទ្ធរំលោភយកដីគម្រោងសាងសង់ព្រលានយន្តហោះ ដែលមានទីតាំងនៅភូមិពូហ្សាម ឃុំសែនមនោរម្យ ស្រុកអូររាំង ដែលប្រតិបត្តិការនេះបានធ្វើឡើង តាំងពីព្រឹកថ្ងៃទី២៦ កក្កដា កន្លងមករហូតបង្គោលទាំងនោះត្រូវដកចេញអស់ ។
លោកអភិបាលបានឲ្យដឹងថា សកម្មភាពដែលអាជ្ញាធរបានចុះធ្វើនេះ គឺដើម្បីការពារដីបម្រុងទុករបស់រដ្ឋសម្រាប់ធ្វើការសាងសង់ព្រលានយន្តហោះនាពេលខាងមុខ ។ លោកអភិបាលខេត្តបន្តថា ដោយមើលឃើញមានសកម្មភាពបោះបង្គោលកំណត់ព្រំដីយកជាកម្មសិទ្ធិផ្ទាល់ខ្លួនយ៉ាងអនាធិបតេយ្យ លើដីព្រលានទើបលោកសម្រេចដឹកនាំមន្ត្រីជំនាញបរិស្ថាន នគរបាល និងអាវុធហត្ថ ចុះដកបង្គោលរបងថ្មទាំងនោះ យកទៅរក្សាទុកបណ្តោះអាសន្ននៅអធិការដ្ឋាននគរបាលស្រុកអូររាំង ដើម្បីស្រាវជ្រាវបន្តទៅតាមនីតីវិធី។
លោក ស្វាយ សំអ៊ាង បានបញ្ជាក់ថា មិនត្រឹមតែដីទីតាំងព្រលានហោះនេះទេ ដែលអាជ្ញាធរចុះអនុវត្តន៍ការពារដីទុកជាសម្បត្តិសាធារណៈ សូម្បីដីចំការស្រល់ដែលកំពុងរងការទន្ទ្រានពីជនមួយក្តាប់តូច ក៏លោកដាក់បញ្ជាឲ្យមន្ត្រីជំនាញ និងពាក់ព័ន្ធទាំងអស់ចុះត្រួតពិនិត្យ និងរឹបអូសទុកជាសម្បត្តិរដ្ឋវិញដែរ ។
គេសង្កេតឃើញថា នៅតាមអមសងខាងផ្លូវចូលទៅទឹកជ្រោះលែងអង ឡែងឃិន ដែលឆ្លងកាត់ដីព្រលានយន្តហោះ គឺមានគេបោះបង្គោលយកដីរាប់រយម៉ែត្រ ដែលតាមការប៉ាន់ស្មានក្រៅផ្លូវការអាចមានចំនួនជិត២០០ហិកតា ។ សកម្មភាពចាប់ដីរដ្ឋលក់បានផ្ទុះយ៉ាងខ្លាំងក្នុងទឹកដីខេត្តមណ្ឌលគិរី ជាពិសេសតំបន់ស្រុកអូររាំង ដែលដីនៅទីនោះសម្បូរភ្នំនឹងព្រៃឈើដ៏ស្រស់ស្អាត ហើយភាគច្រើនគេចាប់ទុកលក់ឲ្យជនជាតិចិនក្នុងតម្លៃថ្លៃកប់ពពក ។
ក្រុមអ្នកតាមដានបរិស្ថានបាននិយាយថា ការទិញលក់ដីរដ្ឋនៅខេត្តមណ្ឌលគិរី ជាពិសេស ស្រុកអូររាំងចំណុចដីព្រលានយន្តហោះនេះ គឺកើតចេញពីអាជ្ញាធរស្រុកផ្ទាល់ ជាអ្នកចេញលិខិតស្នាមឲ្យក្រុមឈ្មួញ បើមិនដូច្នេះទេ ក៏គ្មានអ្នកណាគេថ្លើមពាសមេឃ ហ៊ានយកលុយរាប់ម៉ឺនដុល្លារទៅបោះចោលដែរ ។
សូមរំឭកថា អាជ្ញាធរខេត្តមណ្ឌលគិរី សហការជាមួយក្រុមមន្ត្រីអាកាសចរណ៍ស៊ីវិល ចុះកំណត់ព្រំដី និងសិក្សាបន្ថែម ដើម្បីឈានដល់ការអភិវឌ្ឍអាកាសយានដ្ឋានលើផ្ទៃដីទំហំជាង៩០០ហិកតា ស្ថិតនៅភូមិពូហ្សាម ឃុំសែនមនោរម្យ ស្រុកអូររាំង ។
លោក សៀក មុន្នី អភិបាលស្រុកអូររាំងបានឲ្យដឹងថា កាលពីថ្មីៗនេះប្រតិភូរបស់អាកាសចរណ៍ស៊ីវិល បានចុះពិនិត្យលើទីតាំងជាក់ស្តែង ដែលបានកំណត់តាំងពីយូរមកហើយសម្រាប់អភិវឌ្ឍន៍ទៅជាព្រលានយន្តហោះ ។ លោក សៀក មុន្នី ថា ដោយសារតែនៅទីតាំងនេះត្រូវអភិវឌ្ឍន៍មានគម្រោងច្រើន ដូច្នេះផ្ទៃដីដែលទុកសម្រាប់ធ្វើព្រលានមានទំហំធំរាប់រយហិកតា ពោលគឺមានការសង់ហេដ្ឋារចនាសម្ព័ន្ធជាច្រើនបន្ថែមទៀត ។
លោក ស្វាយ សំអ៊ាង អភិបាលខេត្តមណ្ឌលគិរីបានថ្លែងថា«គម្រោងសាងសង់ព្រលានយន្តហោះនេះ គឺគ្រាន់តែខេត្ត និងអាកាសចរណ៍ស៊ីវិលបានសហការគ្នា ដើម្បីរៀបចំទីតាំងដីទុកសម្រាប់កសាងព្រលានយន្តហោះ នេះជាគម្រោងមួយដែលខេត្តបានរកដីទុក ប៉ុន្តែពាក់ព័ន្ធនឹងគម្រោងសាងសង់យើងនៅមិនទាន់ប្រាកដថា តើត្រូវសាងសង់នៅពេលឆាប់ៗនេះឬក៏ទៅអនាគតខាងមុខ ពោលគឺមិនទាន់កំណាត់ថាយ៉ាងណានោះទេ ។
លោកថា ដោយសារឥឡូវនេះយើងក៏មិនទាន់មានថវិកា ឬដៃគូសម្រាប់សាងសង់ព្រលានហ្នឹងទេ ប៉ុន្តែជាការសំខាន់យើងត្រូវត្រៀមដីបម្រុងទុក ជៀសវាងគ្មានទីតាំងនៅពេលដែលគម្រោងត្រូវចាប់ផ្តើមយើងមានដីទុកតែម្តង ។
លោកអភិបាលខេត្តបញ្ជាក់ថា បើយើងមិនធ្វើអុីចឹងទេ យើងអត់មានទីតាំងសម្រាប់សាងសង់ទេ ដូច្នេះ ហើយបានជាអាជ្ញាធរខិតខំការពារដី ទុករហូតទំហំជាង៩០០ហិកតា» ។ មានមជ្ឈដ្ឋានជាច្រើនកំពុងចង់ដឹងតើមហាបុរសណាយកបង្គោលមកបោះបំពានលើដីបម្រុងទុករបស់រដ្ឋយ៉ាងនេះ ? ឬមួយដឹងដែរ តែមិនហ៊ានប្រាប់ ? (សម្រួលដោយ៖ ស្រីណា)
ចែករំលែកព័តមាននេះ