រាជធានីភ្នំពេញ ៖ រថយន្តម៉ាកហ៊ីយ៉ាន់ដាយដឹកទំនិញ១គ្រឿង ខណៈពេលកំពុងបើកបរក្នុងល្បឿនលឿន ត្រូវបានគេសង្ស័យថាអ្នកបើកបរងងុយដេក ស្រាប់តែរេចង្កូតប្រុងធ្លាក់ចូលទៅក្នុងប្រឡាយទឹក ពេលនោះអ្នកបើកបរបានកាច់ទាញចង្កូតឡើងមកវិញធ្វើឲ្យមានសភាពឃ្លេងឃ្លោងគ្រវីក្រវាត់ចុះឡើងៗម្ដងទៅខាងឆ្វេងនិងម្ដងទៅខាងស្ដាំ ស្រាប់តែក្រឡប់ផ្ងារជើងលើផ្លូវតែម្ដង និងបណ្ដាលឲ្យរថយន្តខាងលើរងការខូចខាតបែកកញ្ចក់មុខយ៉ាងដំណំ ប៉ុន្តែសំណាងល្អមិនបានបណ្ដាលឲ្យអ្នកបើកបររងរបួសនោះឡើយ។
ហេតុការណ៍ខាងលើនេះបានកើតឡើងកាលពីវេលាម៉ោង១និង៣០នាទីរសៀលថ្ងៃទី២៩ ខែកក្កដា ឆ្នាំ២០១៩ ស្ថិតនៅលើកំណាត់ផ្លូវ៥០ម៉ែត្រ ស្ថិតនៅក្នុងភូមិអន្លូងគងថ្មី សង្កាត់ព្រៃស ខណ្ខដង្កោ រាជធានីភ្នំពេញ។
រថយន្តមួយគ្រឿងដឹកទំនិញខាងលើនេះម៉ាកហ៊ីយ៉ាន់ដាយចំណុះ១តោនកន្លះ ពណ៌ស ពាក់ ស្លាកលេខ ភ្នំពេញ ២AD-៩៤០០ បើកបរដោយបុរសម្នាក់មិនស្គាល់អត្តសញ្ញាណឡើយ។
តាមប្រភពព័ត៌មានបានឲ្យដឹងថា នៅមុនពេលកតហេតុ រថយន្តមួយគ្រឿងខាងលើនោះបានបើកបរធ្វើដំណើរក្នុងទិសដៅពីជើងទៅត្បូងក្នុងល្បឿនលឿន និងរេពេញផ្លូវ ត្រូវបានគេសង្ស័យថាអ្នកបើកបរងងុយដេក។
តាមប្រភពព័ត៌មានបានឱ្យដឹងបន្តថា លុះពេលរថយន្តដឹកទំនិញធ្វើដំណើរទៅដល់ចំណុចកើតហេតុខាងលើបានរេចង្កូតប្រុងធ្លាក់ចូលក្នុងប្រឡាយ ប៉ុន្តែអ្នកបើកបរបានទាញចង្កូតមកវិញ ដែលជាហេតុធ្វើឲ្យមានសភាពឃ្លេងឃ្លោងគ្រវីក្រវាត់ចុះឡើងៗម្ដងទៅខាងឆ្វេងនិងម្ដងទៅខាងស្ដាំរួចក៏បានក្រឡប់ផ្ងារជើងលើផ្លូវតែម្ដង។
តាមប្រភពព័ត៌មានបានបន្តទៀតថា ខណៈនោះសំណាងដែលអ្នកបើកបរមិនមានរងរបួសអ្វីឡើយ ប៉ុន្តែរថយន្តខាងលើបានរងការខូចខាតយ៉ាងដំណំ ដោយបែកកញ្ចក់ខាងមុខផងដែរ។
ក្រោយពីកើតហេតុ ដោយសារតែគ្រោះថ្នាក់ខាងលើនេះកើតឡើងដោយខ្លួនឯងមិនមានប៉ះពាល់ដល់អ្នកដទៃទើបនគរបាលឲ្យម្ចាស់យករថយន្តទៅធ្វើការជួសជុលដោយខ្លួនឯង៕ (កែសម្រួលដោយ ៖ ធីតា)
ចែករំលែកព័តមាននេះ